اۋىل شارۋاشىلىعى سالاسىندا قۇنى 1 ميلليارد دوللاردى قۇرايتىن 15 جوبا ازىرلەنۋدە
بۇل تۋرالى بۇگىن ەلباسى نۇرسۇلتان نازاربايەۆتىڭ توراعالىعىمەن وتكەن ق ر پرەزيدەنتى جانىنداعى شەتەل كاسىپكەرلەرىنىڭ 28- كەڭەسىندە اۋىل شارۋاشىلىعى ءمينيسترى اسىلجان مامىتبەكوۆ ءمالىم ەتتى.
«قازىرگى ۋاقىتتا اۋىل شارۋاشىلىعى مينيسترلىگى 15 جوبا بويىنشا ينۆەستيتسيالىق ۇسىنىستاردى قاراستىرۋدا. ونىڭ تورتەۋىن كەڭەس باستالار الدىندا، نۇرسۇلتان ءابىش ۇلى، مەن سىزگە بايان ەتتىم. ولاردىڭ قاتارىندا تولىعىمەن ەكسپورتقا باعدارلانعان قۋاتى 17 مىڭ توننالىق ەتتى قايتا وڭدەۋ كەشەنىن سالۋدى جوسپارلاپ وتىرعان «ەۋرازيا اگرو حولدينگ» ج ش س بار»، - دەدى مينيستر ق ر پرەزيدەنتىنە قاراتا.
سونىمەن قاتار ونىڭ سوزىنە قاراعاندا ءسۇت ونىمدەرىن، وسىمدىك مايىن جانە قۇس شارۋاشىلىعىن قامتيتىن جوبالار دا ازىرلەنۋدە. ماسەلەن، اتالعان 15 جوبانىڭ ۇشەۋى مايلى داقىلداردى قايتا وڭدەۋدى كوزدەيدى. ال ءسۇت ونىمدەرى سالاسىنا گەرمانيالىق Megli سىندى كومپانيانى تارتۋ ەلىمىزدە بۇل سالاعا زاماناۋي ءوندىرىس پەن تەحنولوگيا تارتۋعا، سونىمەن بىرگە شىعارىلعان ونىمدەر ەكسپورتى گەوگرافياسىن ۇلعايتۋعا مۇمكىندىك بەرەدى.
«بۇل 15 جوبانىڭ جالپى بولجامدى قۇنى شامامەن 200 ميلليارد تەڭگەنى نەمەسە 1 ميلليارد دوللاردان استام قارجىنى قۇرايدى. بۇل جوبالاردىڭ بارلىعىندا دا شەتەلدىك كاپيتالدىق قاتىسۋى بار. ءتىپتى، كەيبىرى 100 پايىز شەتەلدىك كومپانيا بولىپ تابىلادى. اسىرەسە، جوبا باستاماشىلارىن ينۆەستيتسيالىق شىعىستاردىڭ ءبىر بولىگىنىڭ بيۋدجەتتەن قايتارىلۋى قاتتى قىزىقتىرىپ وتىر. بۇل باعىتتاعى جۇمىستاردى جالعاستىرامىز»، - دەدى ا. مامىتبەكوۆ.
