ۋ ي: ALLUR - تەك زاۋىت قانا ەمەس، ۇلتتىق برەند قالىپتاستىرۋعا نەگىز
استانا. KAZINFORM - قىتايدىڭ جەتەكشى «جەنمين جيباو» باسىلىمىنىڭ باستاماسىمەن 29- مامىردا «ورتالىق ازيا - قىتاي» حالىقارالىق مەديافورۋمى ءوتىپ جاتىر. ءىس-شارانىڭ تەڭ ۇيىمداستىرۋشىسى - قازاقستان رەسپۋبليكاسى پرەزيدەنتىنىڭ تەلەراديوكەشەنى.
اشىلۋ راسىمىندە ارنايى شاقىرىلعان قوناق - قىتايدىڭ Genertec International Holding Co.، Ltd. كومپانياسى باس ديرەكتورىنىڭ ورىنباسارى ۋ ي ءسوز سويلەپ، قازاقستاننىڭ اۆتوكولىك ونەركاسىبىن دەربەس ۇلتتىق برەندكە اينالدىرۋداعى قىتايلىق كاسىپورىنداردىڭ ءرولىن ەرەكشە اتاپ ءوتتى.
- ALLUR - جاي عانا قۇراستىرۋ زاۋىتى ەمەس، تولىققاندى عىلىمي-زەرتتەۋ جانە تەحنولوگيالىق مۇمكىندىكتەرى بار قازاقستاننىڭ ۇلتتىق اۆتوكولىك برەندىنە اينالۋى كەرەك، - دەدى ۋ ي ءوز بايانداماسىندا.
ول Genertec International Holding كومپانياسى 2019 -جىلى ALLUR كومپانياسىنا ينۆەستيتسيا قۇيعاننان كەيىن، ونىڭ جىلدىق ءوندىرىسى 100 مىڭ داناعا دەيىن وسكەنىن، ال بۇگىندە بۇل كاسىپورىن قازاقستاندا تولىق جيناقتاۋ (CKD) ءوندىرىسىن يگەرگەن جالعىز اۆتوكولىك ءوندىرۋشىسى ەكەنىن ايتتى.
ونىڭ ايتۋىنشا، كومپانيا 2026 -جىلى ىسكە قوسىلاتىن اۆتوكولىك قوسالقى بولشەكتەرىن شىعاراتىن جاڭا زاۋىت ارقىلى تاعى 600 جۇمىس ورنىن اشپاق. سونىمەن قاتار، قىتايلىق JETOUR كومپانياسىمەن بىرلەسىپ تەحنيكالىق مامانداردى وقىتۋ جوباسى اياسىندا جۇزدەگەن قازاقستاندىق مامان دايارلانعان. بۇل شارالار قازاقستانداعى اۆتوونەركاسىپتىڭ تەحنولوگيالىق الەۋەتىن ارتتىرىپ، «ورتالىق ازيادا ءوندىرىپ، ەۋرازياعا تاراتۋ» يندۋستريالىق تىزبەگىن قالىپتاستىرۋعا ىقپال ەتپەك.
ۋ ي سونىمەن قاتار قىتاي مەن ورتالىق ازيا ەلدەرى اراسىنداعى كولىك جانە ەنەرگەتيكا سالاسىنداعى وزگە دە جوبالار تۋرالى قىسقاشا بايانداپ ءوتتى. اتاپ ايتقاندا، وزبەكستانداعى 100 م ۆ ت قۋاتىنداعى جىلۋ ەلەكتر ورتالىعى، قازاقستانداعى 150 م ۆ ت جەل ەلەكتر ستانسياسى جانە گرۋزياداعى Е60 حالىقارالىق اۆتوماگيسترالى سىندى ءىرى جوبالار ورتالىق ازيانىڭ جاسىل دامۋ باعىتىنا ناقتى ۇلەس قوسىپ وتىرعانىن جەتكىزدى.
فورۋم اياسىندا ۋ ي ورتالىق ازياداعى ب ا ق وكىلدەرىن ىنتىماقتاستىقتى كۇشەيتۋگە شاقىرىپ، قىتايلىق جانە جەرگىلىكتى كاسىپورىنداردىڭ بىرلەسكەن تابىستارى تۋرالى شىنايى وقيعالاردى كوپشىلىككە جەتكىزۋدىڭ ماڭىزدىلىعىن اتاپ ءوتتى. ونىڭ ايتۋىنشا، فورۋمنان كەيىن دەلەگاتتار الماتىداعى ALLUR 4S ورتالىعىنا بارىپ، قىتاي اۆتوكولىك برەندتەرىنىڭ جەرگىلىكتى نارىقپەن قالاي ىقپالداسىپ جاتقانىن ءوز كوزدەرىمەن كورەدى.
- شاڭاننان سامارقانعا دەيىن - ۇلى جىبەك جولىنىڭ باستى رۋحى - ءوزارا تيىمدىلىك پەن سەنىم. ءبىز ورتالىق ازيامەن ورتاق بولاشاقتى بىرگە قۇرۋ جولىندا مەديا مەن ءوندىرىس اراسىنداعى بايلانىستى تەرەڭدەتە بەرەمىز، - دەدى ۋ ي.
Allur قازاقستان اۋماعىنداعى Chevrolet ،Kia ،JAC ،Jetour ،Hongqi جانە Skoda سياقتى الەمدىك اۆتوموبيل برەندتەرىنىڭ رەسمي ءوندىرۋشىسى، ديستريبيۋتورى جانە سەرىكتەسى. كومپانيا برەند ديستريبيۋتورى بولىپ كەلە جاتقان ۋاقىت ارالىعىندا Chevrolet برەندى ەلىمىزدە جاڭا اۆتوموبيلدەر ساتىلىمىندا ءبىرىنشى ورىنعا شىقتى، نارىقتاعى ۇلەسىن 4 ەسە ارتتىردى. 2021 -جىلى Allur پورتفەلىنە Kia برەندى قوسىلعاننان كەيىن ساتىلىمدار بىردەن ءۇش ەسەگە دەيىن ءوسىپ، برەندتىڭ سوڭعى بەس جىلداعى رەكوردىن تىركەدى.
ايتا كەتەيىك، فورۋمنىڭ اشىلۋ سالتاناتىندا قىتايدىڭ قازاقستانداعى توتەنشە جانە وكىلەتتى ەلشىسى حان چۋنلين نەگىزگى بايانداما جاساپ، قىتاي مەن ورتالىق ازيا ەلدەرى اراسىنداعى دوستىقتى نىعايتۋ مەن ورتاق تاعدىر قاۋىمداستىعىن قالىپتاستىرۋدا بۇقارالىق اقپارات قۇرالدارىنىڭ ماڭىزىن اتاپ ءوتتى.
اۆتور
مۇقتار مۇرات
