ۇ و ك وكىلدەرى حاربين قىسقى ازيا ويىندارىنا دايىندىق سەمينارىنا قاتىستى
استانا. KAZINFORM - حاربيندە (قىتاي) 2025 -جىلعى قىسقى ازيا ويىندارىنا دايىندىق بويىنشا سەمينار ءوتتى. وعان ازيا وليمپيادالىق كەڭەسىنىڭ وكىلدەرى قاتىستى.
سەمينار بارىسىندا الداعى ازيادانى ۇيىمداستىرۋ كوميتەتىنىڭ ءار ءبولىمى تۋرنيرگە دايىندىق قاي دەڭگەيدە جۇرگىزىلىپ جاتقانى تۋرالى بايانداما جاسادى.
«حاربين ازيا ويىندارىن وتكىزۋ قۇقىعىن ءبىر جىل بۇرىن السا دا، سپورت نىساندارى قازىردىڭ وزىندە سپورتشىلاردى قابىلداۋعا دايىن. ۇيىمداستىرۋ كوميتەتىنىڭ قۇرامىنا 2022 -جىلعى بەيجىڭدەگى وليمپيادادا جانە 2022 -جىلعى حاڭجوۋداعى ازيا ويىندارىندا جۇمىس ىستەگەن ادامدار ەندى. ازيا ءاردايىم كەشەندى جارىستاردى جوعارى دەڭگەيدە وتكىزەدى. سوندىقتان ءبىز حاربيندە وتەتىن 2025 -جىلعى قىسقى ازيادا ويىندارىنىڭ ۇيىمداستىرىلۋى ەش قيىندىقسىز وتەتىنىنە سەنىمدىمىز. ۇيىمداستىرۋ كوميتەتىمەن كۇندەلىكتى بايلانىستامىز، سەبەبى اقپارات ۇدايى جاڭارتىلىپ وتىرادى»، - دەدى بەكتۇر قياتباي.
سەميناردان بولەك ۇ و ك قىزمەتكەرلەرى جەكە كەزدەسۋ وتكىزىپ، وندا ۇيىمداستىرۋعا قاتىستى ماسەلەلەر، اتاپ ايتار بولساق، نەگىزگى مەرزىمدەر، لوگيستيكا، تۇراتىن جەرلەردىڭ جاعدايلارى، جۇك تاسىمالداۋ جانە سپورتتىق جابدىقتاردى راسىمدەۋ ماسەلەلەرى تالقىعا سالىندى.
ايتا كەتەلىك، حاربين ازيا ويىندارىن وتكىزۋ قۇقىعىنا ەكىنشى مارتە يە بولىپ وتىر. 2025 -جىلعى مۋلتيسپورتتىق وقيعا اقپان ايىنىڭ 7-14 ارالىعىندا وتەدى. جارىستار اياسىندا سپورتشىلار 12 سپورت ءتۇرى بويىنشا 64 مەدال جيىنتىعىن تالاسقا سالادى.
اۆتور
مۇحتار قاليموللا ۇلى
