ۇ ق ك-دا كادرلاردى ىرىكتەۋ قالاي جۇرگىزىلەدى، قانداي ماماندىقتار سۇرانىسقا يە

استانا. KAZINFORM - كادرلىق جۇمىس كوميتەت ءۇشىن ستراتەگيالىق باسىمدىق سانالادى. كوميتەتكە كىم كەلىپ، قالاي دايىندالاتىنى ەلدىڭ قاۋىپسىزدىگىنە تىكەلەي اسەر ەتەدى. بۇل ساۋالعا ۇ ق ك ءتوراعاسى ەرمەك ساعىمبايەۆ Kazinform اگەنتتىگىنە ەكسكليۋزيۆتى سۇحباتىندا جاۋاپ بەردى.

- قازىر بىزدە ەكى مامانداندىرىلعان جوعارى وقۋ ورنى جۇمىس ىستەيدى: ۇ ق ك اكادەمياسى جانە شەكارا اكادەمياسى. جۋىردا وسى وقۋ ورىندارىندا جاس وفيتسەرلەردىڭ كەزەكتى تۇلەكتەرى وقۋىن ءبىتىرىپ شىقتى.

بولاشاق قىزمەتكەرلەردى وقىتۋ بارىسىندا ءبىز جاڭا تەحنولوگيالاردى، قولدانبالى ادىستەر مەن شىنايى پراكتيكالىق تاجىريبەلەردى ەنگىزىپ وتىرمىز، - دەدى ۇ ق ك ءتوراعاسى ەرمەك ساعىمبايەۆ.

ۇقك- گە قابىلداۋ قاتاڭ تارتىپپەن جۇزەگە اسادى.

- قىزمەتكە تەك قازاقستان ازاماتتارى قابىلدانادى، ولار ءبىلىم، فيزيكالىق دايىندىق، مورالدىق تۇراقتىلىق جانە اناليتيكالىق ويلاۋ سياقتى ءبىرقاتار تالاپتارعا ساي بولۋعا ءتيىس.

تسيفرلىق تەحنولوگيالار ءداۋىرى زاماناۋي تالاپتاردى كۇن ساناپ كۇشەيتىپ وتىر. سوندىقتان كيبەرقاۋىپسىزدىك پەن اقپاراتتىق قاۋىپسىزدىك سالاسىندا ءىت، تەلەكوممۋنيكاتسيالار جانە تسيفرلىق اناليتيكا سالاسىنداعى ماماندار ۇلكەن سۇرانىسقا يە، - دەدى ول.