ە. باپي: ارالاس سايلاۋ جۇيەسىنىڭ مۇمكىندىگىن دامىتا ءتۇسۋىمىز كەرەك

استانا. KAZINFORM - ءماجىلىس دەپۋتاتى ەرمۇرات باپي پالاتانىڭ جالپى وتىرىسىندا پارلامەنت سايلاۋىنىڭ ارالاس جۇيەسىن دامىتا ءتۇسۋدى ۇسىندى.

- مەن - 25 جىلدىق وپپوزيتسيالىق قوعامدىق قىزمەتتەن كەيىن مەملەكەتتىك بيلىكتىڭ ءبىر وكىلەتتى بۇتاعىنا سايلاۋ ارقىلى كەلگەن اداممىن. بۇل اراداعى نەگىزگى تىرەك تىركەس - سايلاۋ ارقىلى. بۇدان 20 جىل بۇرىن جويىلعان ءبىر مانداتتى ماجوريتارلىق سايلاۋ جانە سايلانۋ مۇمكىندىگى پرەزيدەنت قاسىم-جومارت توقايەۆ باستاماشىلىق ەتكەن رەفورمانىڭ ارقاسىندا قايتادان قالپىنا كەلگەنى داۋسىز. ءبىز بۇل سايلاۋ جۇيەسىنىڭ مۇمكىندىگىن دامىتا ءتۇسۋىمىز كەرەك، - دەدى ەرمۇرات باپي.

ونىڭ پايىمىنشا، ۋاقىت وتكەن سايىن اتالعان ءتاسىل ارقىلى ماجىلىستەن ورىن العان دەپۋتاتتاردىڭ ىقپالى ارتىپ كەلەدى.

- قازاقستان پارلامەنتىنىڭ ماجىلىسىندە ماجوريتارلىق مانداتپەن كەلگەن دەپۋتاتتاردىڭ ءبىر شوعىرى پايدا بولدى. قوعام مەن مەملەكەتتىك بيلىك اراسىندا دانەكەر كوپىر سالۋعا ارەكەت قىلىپ جۇرگەن بۇل دەپۋتاتتاردىڭ دارمەنسىز داۋسى بارعان سايىن باتىل شىعا باستاعانىن قۇلاعىندا ساياسي مۇكىستىگى جوق قاۋىم ەستىپ وتىرعانى ايدان انىق، - دەدى دەپۋتات.

ايتا كەتەيىك، بۇگىنگى ءماجىلىس جيىنىندا پرەزيدەنت قاسىم-جومارت توقايەۆتىڭ ساياسي رەفورماسى تالقىلانىپ جاتىر. وعان پالاتا دەپۋتاتتارىنان بولەك، عالىمدار مەن ساراپشىلار، ب ا ق باسشىلارى قاتىسىپ وتىر.

اۆتور

ەسىمجان ناقتىباي