زەلەنسكي قاۋىپسىزدىك كەڭەسىنە رەسەيمەن كەلىسسوزدەردى جانداندىرۋدى تاپسىردى
استانا. KAZINFORM - ۋكراينا پرەزيدەنتى ۆلاديمير زەلەنسكي ۇلتتىق قاۋىپسىزدىك جانە قورعانىس كەڭەسىنىڭ جاڭادان تاعايىندالعان حاتشىسى رۋستەم ۋمەروۆكە رەسەيمەن ىستانبۇلداعى كەلىسسوز پروتسەسىن جانداندىرۋدى تاپسىردى، دەپ جازادى ت ا س س.
«بۇگىن رۋستەم ۋمەروۆپەن ۋكراينا ۇلتتىق قاۋىپسىزدىك جانە قورعانىس كەڭەسىنىڭ جانە جوعارعى باس قولباسشى ستاۆكاسىنىڭ جۇمىسىن، سونداي-اق قورعانىس پەن كەلىسسوزدەر سالاسىنداعى جەكەلەگەن مىندەتتەردى تالقىلادىق. كەلىسسوزدەر باعىتىن جانداندىرۋ قاجەت. قازىرگى تاڭدا ىستانبۇلداعى ەكىنشى كەزدەسۋ شەڭبەرىندەگى ۋاعدالاستىقتاردى ورىنداۋ جالعاسىپ جاتىر. بۇل پروتسەسكە كوبىرەك سەرپىن كەرەك»، - دەپ جازدى زەلەنسكي Telegram-ارناسىندا.
بۇعان دەيىن رەسەي سىرتقى ىستەر مينيسترلىگىنىڭ رەسمي وكىلى ماريا زاحاروۆا رەسەيلىك دەلەگاتسيانىڭ ۋكراين تاراپىمەن ءۇشىنشى كەلىسسوز راۋندىن وتكىزۋ ءۇشىن ىستانبۇلعا بارۋعا دايىن ەكەنىن مالىمدەگەن بولاتىن.
الايدا، ول ۋكراينادان جاڭا كەلىسسوزدەرگە ازىرلىك جونىندە ەشقانداي بەلگى تۇسپەگەنىن اتاپ ءوتتى.
سونىمەن بىرگە ول كييەۆتىڭ بۇرىن قول جەتكىزىلگەن ۋاعدالاستىقتار باعىتىندا ارەكەت ەتىپ، كەلىسسوز پروتسەسىن جالعاستىراتىنىنا ءۇمىت ءبىلدىردى.
ايتا كەتەيىك، ىستانبۇلدا وتكەن 26-مامىر مەن 2-ماۋسىمداعى ەكى راۋند قورىتىندىسى بويىنشا رەسەي مەن ۋكراينا «مىڭعا مىڭ» فورمۋلاسىمەن اسكەري تۇتقىنداردى الماسۋعا جانە اۋىر ناۋقاس پەن 25 جاسقا دەيىنگى تۇتقىنداردى «بارلىعىنا بارلىعىن» قاعيداسىمەن قايتارۋعا كەلىسكەن بولاتىن. وسى كەلىسىم اياسىندا ماۋسىم ايىندا رەسەي تاراپى ۋكرايناعا 6060 قازا تاپقان ۋكراين اسكەري قىزمەتشىسىنىڭ دەنەسىن، ال ۋكراينا رەسەيگە 78 جاۋىنگەردىڭ دەنەسىن قايتاردى.
17-شىلدە كۇنى رەسەي تاعى 1000 ۋكراين جاۋىنگەرىنىڭ دەنەسىن كيەۆكە تاپسىردى، ال ۋكراينا 19 رەسەيلىك ساربازدىڭ دەنەسىن قايتاردى.
