ۇزدىك قىمىز بايقاۋىنىڭ جەڭىمپازدارى 45 ميلليون تەڭگە جۇلدە الادى
استانا. KAZINFORM - استانادا ۇلتتىق ءداستۇردى دارىپتەيتىن ەرەكشە شارا - قىمىزمۇرىندىق فەستيۆالى ءوتتى. فەستيۆالگە كەلۋشىلەر ۇلتتىق تاعامداردان ءدام تاتىپ، سالت-داستۇرمەن جاقىن تانىسۋعا مۇمكىندىك السا، ۇيىمداستىرۋشىلار جازدا وتەتىن اۋقىمدى قىمىز فەستيۆالىنە دايىندىعىن ءبىر پىسىقتاپ الدى. وندا قازاقستاننىڭ ۇزدىك قىمىز وندىرۋىشلەرىنە 45 ميلليون تەڭگە جۇلدە بەرىلمەك.
كۇن رايىنىڭ قۇبىلعانىنا قاراماستان قىمىز فەستيۆالىنە كەلگەندەردىڭ قاراسى قالىڭ بولدى. ەلىمىزدىڭ 10 ايماعىنان جەتكەن قىمىز وندىرۋشىلەر باس قوسىپ، ءاربىرى ءوزىنىڭ ءونىمىن جارنامالاپ الەككە ءتۇستى. جالپى قىمىزمۇرىندىق - تىرشىلىگى تابيعاتپەن ەتەنە بايلانىسقان حالقىمىزدىڭ ناۋرىز بەن سابانتوي سەكىلدى ماڭىزدى مەرەكەسىنىڭ ءبىرى ءارى ىنتىماق پەن ەڭبەكتىڭ كورىنىسى.
قىمىزمۇرىندىق حالىق جايلاۋعا شىعىپ، بيە قۇلىنداپ، اق كوبەيگەندە تويلانا باستايدى. «كوپكە بۇيىرسىن» دەگەن تىلەكپەن اقساقالدار، اعايىن-تۋىس، كورشى-قولاڭ ارنايى شاقىرىلىپ، العاشقى ءدام ۇسىنىلادى. حالىق تا بۇل مەرەكەدە «ساۋار كوپ بولسىن!»، «اق مول بولسىن!»، «اقتان ايىرماسىن» دەپ تىلەك ايتقان.
- قىمىزمۇرىندىق - كوشپەلى جۇرتتىڭ مەرەكەسى عوي، سونى زاماناۋي تۇرعىدا تويلاعىمىز كەلەدى. ونىڭ ار جاعىندا حالىقتى قىمىز ىشۋگە شاقىرامىز. قىمىزدى داستارحانىمىزعا قايتارعىمىز كەلەدى. جاستار ءقازىر قىمىز ىشپەيدى، ءىشىم اۋىرادى دەيدى. ءبىراق نەگىزى ەڭ پايدالى سۋسىن، قۇدايدىڭ بىزگە بەرگەن سۋسىنى وسى قىمىزىمىز. وسىنى ءبىز ءىشۋىمىز كەرەك. ۇلتىمىزدىڭ دەنساۋلىعى مىقتى بولۋى كەرەك، - دەدى فەستيۆال اۆتورى جۇماجان قالتايەۆ.
بۇل سۋسىننىڭ قۇنان قىمىز، دونەن قىمىز، تۇنەمەل قىمىز، بال قىمىز سەكىلدى تۇرلەرى بار. ولاردى دايىنداۋ ءتاسىلى ءارتۇرلى. قىمىزدىڭ قۇرامىندا پايدالى ەلەمەنت كوپ، ءشولدى قاندىرىپ، ءتىپتى وعان بيداي، مەيىز، قازى، ماي سالىپ ىشكەن. توبىلعىمەن ىستالعان كۇبىدە پىسكەن. ەندى وسى مادەني بايلىقتى الەمگە تانىتۋ ءۇشىن شىلدە ايىندا استانادا ۇلكەن فەستيۆال وتەدى.
- 19-20-شىلدەدە استاندا بايقىمىز فەستيۆالى وتەدى. وعان قازاقستاننىڭ بارلىق وڭىرىندەگى فەرمەرلەردى شاقىرامىز. قازاق اسحاناسى ەت، باۋىرساق، قۋىرداقپەن شەكتەلمەيدى. باسقا دا الۋان ءتۇرلى تاعامداردى كورسەتەمىز، كەپتىرۋ، قاقتاۋ، ىستاۋ جولدارىن ۇيرەتەمىز. ەڭ ۇزدىك قىمىز وندىرۋشىلەرگە جالپى قورى 45 ميلليون تەڭگە جۇلدە بەرەمىز. وسىلايشا ۇلتتىق سۋسىن وندىرەتىن كاسىپكەرلەردى قولداعىمىز كەلەدى. قازىر ءبىز ەتنو جانە گاستروتۋريزمدى دامىتىپ جاتىرمىز. قىمىز ءىشۋ ءۇشىن فرانسيادان، يتاليادان، اۋستراليادان تۋريستەر كەلگەنىن قالايمىز. ويتكەنى قىمىز - حالقىمىزدىڭ قۋاتتى سۋسىنى. ءبىز قىمىزدى جاڭا دەڭگەيگە كوتەرگىمىز كەلەدى. «قىمىز ىشسە، ءىش اۋىرتادى» دەگەن ستەرەوتيپتەردى جويعىمىز كەلەدى. ساپالى قىمىز ەشقاشان اسقازاندى اۋىرتپايدى، كەرىسىنشە دەنساۋلىققا پايدالى بولادى، - دەدى تانىمال ەتنوگراف، BaiQymyz فەستيۆالىنىڭ ۇيىمداستىرۋشىسى ايگەرىم مۇساعاجينوۆا.
جوبانىڭ باستى ماقساتى - وتاندىق قىمىز وندىرۋشىلەرىنە قولداۋ كورسەتۋ، قازاقتىڭ ءداستۇرلى سۋسىنىن قازىرگى ادامداردىڭ داستارحانىنا قايتا ورالتۋ جانە ونىڭ پايدالى قاسيەتتەرى تۋرالى كەڭ اۋديتورياعا جەتكىزۋ.
- قىمىزدا 37 ءتۇرلى دارۋمەن بار، ونىمەن تۋبەركۋلەزدەن ەمدەلىپ، گەموگلوبيندى قالىپقا كەلتىرۋگە بولادى. بۇل - ءبىزدىڭ قىمىزدىڭ باستى ەرەكشەلىگى. ەڭ الدىمەن بيە ساۋىلعان سوڭ، مىندەتتى تۇردە كوبىگىن ءىشىپ كورۋ كەرەك، سەبەبى بار دارۋمەن سول كوبىكتە بولادى. ادامدار قىمىز ۇزاق تۇرسا، ساپاسى بۇزىلادى دەپ ويلايدى. بۇل قاتە پىكىر. قىمىز نەعۇرلىم ۇزاق تۇرسا، سوعۇرلىم قۇنارلى بولادى، - دەپ اڭگىمەلەدى جاڭاارقانىڭ قىمىز ءوندىرۋشىسى انار قۇرمانوۆا.
فەستيۆالدە قىمىز عانا ەمەس، ۇلتتىق سپورت تۇرلەرى بويىنشا جارىستار، ەتنوونىمدەر مەن قولونەر بۇيىمدارىنىڭ كورمەسى، مەرەكەلىك كونتسەرت پەن گاسترونوميالىق فەستيۆال ءوتتى. سونىمەن بىرگە، ۇلتتىق تاعامداردىڭ زاماناۋي ومىرگە قالاي بەيىمدەلىپ جاتقانىن كورىپ، قىمىزدان جاسالعان بالمۇزداق سياقتى جاڭا، ەرەكشە جانە قىزىقتى تاعامداردى تاتىپ كوردى.
بۇعان دەيىن قازاقستاننىڭ پاريج ورتالىعىندا وتكەن حالىقارالىق گاسترونوميالىق فەستيۆالگە قاتىسقانىن حابارلاعان ەدىك.
