زايساننان تاعى گاز تابىلسا، قىتايعا ەكسپورتتاۋىمىز مۇمكىن - ەنەرگەتيكا ءمينيسترى

استانا. KAZINFORM - ەنەرگەتيكا ءمينيسترى ەرلان اقكەنجەنوۆ ۇكىمەت وتىرىسىنان كەيىن وتكەن باسپا ءسوز ءماسليحاتىندا زايسان اۋدانىنداعى سارىبۇلاق كەنىشىنىڭ ماڭىندا قوسىمشا گاز بارلاۋ جۇمىستارى ءجۇرىپ جاتقانىن ايتتى.

جۋرناليستەر بارلاۋ قورىتىندىسى بويىنشا گاز قورى بار ەكەنى بەلگىلى بولسا، تاعى دا قىتايعا ەكسپورتتالا ما دەپ سۇرادى.

- ەندى ونى انىقتالاتىن گاز قورى بويىنشا قاراستىرۋ كەرەك. نەگە دەسەڭىز زايسان وڭىرىندە گاز جەتكىلىكتى دەپ ايتۋعا كەلمەيدى. سول ءۇشىن، ارينە، ءبىرىنشى ىشكى نارىققا الۋدى قاراستىرامىز، - دەگەن مينيستر ناقتى شەشىم قابىلداۋ ءۇشىن قوسىمشا بارلاۋ جۇمىستارىنىڭ قورىتىندىسىن كۇتۋ كەرەكتىگىن جەتكىزدى.

مينيستر گاز تابىلعان جاعدايدا ىشكى نارىققا جىبەرىلەتىنىن ايتتى.

- ءبىرىنشى گاز تابۋ كەرەك. تابىلعان جاعدايدا ىشكى نارىققا جىبەرەمىز. جاڭا كولەمدەر تابىلعان كەزدە نەشە پايىزىن ىشكى نارىققا، نەشە پايىزىن ەكسپورتقا شىعاراتىنىمىزدى انىقتاۋ ءۇشىن كەلىسىمشارت جۇرگىزەمىز. بىرىنشىدەن، ول كوممەرتسيالىق، ەكونوميكالىق زاڭ، سالالارعا سايكەس كەلەدى. ويتكەنى قوسىمشا قوردى ىزدەۋگە شىعىن جۇمسايدى عوي، - دەدى ول.

جۋرناليست «گاز تابىلىپ جاتسا، قورى ۇلكەن بولسا، قىتايعا ەكسپورتتالۋى مۇمكىن بە» دەپ ناقتىلادى.

ەرلان اقكەنجەنوۆ ءبىرىنشى كەزەكتە زايسان اۋدانى مەن وعان ىرگەلەس جاتقان اۋدانداردى گازداندىرۋ ماسەلەسىنە باسىمدىق بەرىلەتىنىن ايتتى.

- قىتايعا ەكسپورتتالۋى مۇمكىن. ءبىراق ءبىرىنشى ماقساتىمىز - ىشكى نارىقتى قامتاماسىز ەتۋ. زايساننان بولەك تارباعاتاي، كوكپەكتى جانە باسقا دا اۋداندار بار. ناقتى نەشە اۋدانعا گاز تارتىلاتىنىن ايتۋ ءۇشىن اۋەلى قوسىمشا بارلاۋ كەزىندە گاز قورى تابىلۋ كەرەك، - دەدى مينيستر.

اتالعان جيىندا رەسەي وزبەكستانعا قازاقستان ارقىلى ەكسپورتتايتىن گازدىڭ كولەمىن 11 ميلليارد تەكشە مەترگە دەيىن ۇلعايتاتىنى بەلگىلى بولدى.

اۆتور

ەسىمجان ناقتىباي