يزرايلدىڭ سوققىسىنان گازادا تاعى 40 ادام مەرت بولدى

استانا. KAZINFORM - يزرايلدىڭ گازا سەكتورىنىڭ وڭتۇستىگىندەگى حان-يۋنيس اۋداندارىنىڭ بىرىنە جاساعان سوققىسىنان كەمىندە 40 ادام قازا تاۋىپ، 60 ى جاراقات العان، دەپ حابارلايدى حاماس باقىلاۋىنداعى گازا ازاماتتىق قورعانىس باسقارماسى. يزرايلدىڭ مالىمدەۋىنشە، سوققى سودىرلاردىڭ باسقارۋ ورتالىعىنا باعىتتالعان، دەپ جازادى BBC.

اقپاراتقا سايكەس، سوققى بوسقىندارعا ارنالعان شاتىرلى لاگەر ورنالاسقان ءال-ماۆاسي اۋدانىندا جاسالدى.

«ءبىزدىڭ ەكيپاجدار كوشىرىلگەن ادامداردىڭ شاتىرلارىنا جاسالعان شابۋىلدان ءىز- ءتۇسسىز جوعالعان 15 ادامدى تابۋ ءۇشىن ءالى جۇمىس ىستەپ جاتىر»، - دەدى AFP اگەنتتىگىنە گازا ازاماتتىق قورعانىس باسقارماسىنىڭ وكىلى موحاممەد ءال-مۋگاير.

كۋاگەرلەردىڭ حابارلاۋىنشا، ءتۇن ورتاسىنان كەيىن كوپ ۇزاماي ءال-ماۆاسي ايماعىندا كۇشتى جارىلىستار ەستىلىپ، اسپاندى جالىن شارپىدى.

سوققى جاسالعان جەرگە جاقىن تۇراتىن قايىرىمدىلىق ۇيىمىنىڭ ەرىكتىسى حالەد ماحمۋدتىڭ ايتۋىنشا، ول جانە باسقا ەرىكتىلەر كومەكتەسۋگە اسىقتى، ءبىراق وقيعانىڭ اۋقىمى تاڭقالدىردى.

«سوققى سالدارىنان تەرەڭدىگى جەتى مەترلىك ءۇش شۇڭقىر پايدا بولعان، 20 دان استام شاتىر سوندا كومىلىپ قالدى»، - دەدى ول تەلەفون ارقىلى BBC-گە.

گازا ازاماتتىق قورعانىسىنىڭ وكىلى ماحمۋد ءباسسالدىڭ ايتۋىنشا، ءال-ماۆاسي ايماعىندا 200 دەن استام شاتىر بولعان جانە ونىڭ 40 شاقتىسى قيراعان.

ول سونداي-اق ايماقتاعى پالەستينالىقتارعا سوققى تۋرالى الدىن الا ەسكەرتۋ جاسالماعانىن قوسىپ ءوتتى.

حاماس-قا باعىنىشتى گازا دەنساۋلىق ساقتاۋ مينسترلىگىنىڭ مالىمەتىنشە، بىلتىرعى قازاننان بەرى گازادا 40900 شاماسىندا حالىق مەرت بولعان.

اۆتور
زارينا تۋعانبايەۆا