يزرايلدەگى قاقتىعىس: قاي ەلدەر ءوز ازاماتتارىن ەۆاكۋاتسيالاۋدى باستادى

 سەنبى كۇنى پالەستينانىڭ حاماس قوزعالىسى يزرايلگە شابۋىل جاسادى. وسىعان بايلانىستى شەت مەملەكەتتەر قاقتىعىس ايماقتارىنان ءوز ازاماتتارىن ەۆاكۋاتسيالاپ جاتىر، دەپ حابارلايدى Kazinform اگەنتتىگى.

палестина
Фото: Фото: pixabay.com

العاشقىلاردىڭ ءبىرى بولىپ پولشا ءوز ازاماتتارىن ەۆاكۋاتسيالاۋدى باستادى. مۇنى اتالعان ەلدىڭ پرەزيدەنتى اندجەي دۋدا ءمالىم ەتتى. بۇعان دەيىن پولشانىڭ LOT مەملەكەتتىك اۆياكومپانياسى تەل- اۆيۆتەگى بەن- گۋريون اۋەجايىنا رەيستەردى توقتاتقان بولاتىن.

«قازىرگى ۋاقىتتا يزرايلدەگى پولياكتاردى ەۆاكۋاتسيالاۋ ءۇشىن اۋە كۇشتەرىنىڭ ۇشاقتارىن جىبەرەمىز. ءبىزدىڭ ساربازدار ازاماتتاردى بورتقا مىنگىزۋ كەزىندە ءتارتىپ پەن قاۋىپسىزدىكتى قامتاماسىز ەتەدى»، - دەپ جازدى اندجەي دۋدا «X» الەۋمەتتىك جەلىسىندەگى ءوز پاراقشاسىندا.

بۇگىن تاڭەرتەڭ پولشا تاراپى جىبەرگەن ءۇش اسكەري ۇشاقتىڭ ءبىرىنشىسى تەل- اۆيۆ اۋەجايىنا قونىپ، وندا جينالعان 120 عا جۋىق ادامدى ۆارشاۆاعا جەتكىزدى.

سونىمەن قاتار پولشا گرەتسيانىڭ اۋە كەڭىستىگى ارقىلى ۇشۋعا رۇقسات الۋ بويىنشا كەلىسسوز جۇرگىزىپ جاتىر. وعان پورتۋگاليا دا قوسىلدى. ويتكەنى ول ەلدە تاياۋدا يزرايلگە ەۆاكۋاتسيالىق ماقساتتاعى بورتتار جىبەرمەك.

برازيليا ۇكىمەتى دە قاقتىعىس ايماقتارىنان ءوز ازاماتتارىن الىپ شىعۋدى جوسپارلاپ وتىر. اتالعان ەلدىڭ سىرتقى ىستەر مينيسترلىگى ۇسىنعان اقپاراتقا ساي، بۇگىن يزرايلگە 6 ۇشاق جىبەرىلەدى.

تايلاندتىڭ پرەمەر- ءمينيسترى سترەتتا تاۆيسين گازا سەكتورىنداعى حاماس سودىرلارىنىڭ شابۋىلىنان كەيىن تاي ازاماتتارىن يزرايلدەن ەۆاكۋاتسيالاۋعا بۇيرىق بەردى. رەسمي مالىمەتكە سايكەس، شيەلەنىس كەزىندە تايلاندتىڭ ەكى ازاماتى قازا تاۋىپ، 8 ءى جارالانىپ، 12 ءسى تۇتقىنعا الىنعان.

ليتۆا بيلىگى دە يزرايلدەگى ءوز ازاماتتارىن ۆيلنيۋسكە ەۆاكۋاتسيالاماق. بۇگىن وتانىنا ورالۋعا نيەتتى ليتۆالىقتار ءۇشىن ارنايى رەيس ۇيىمداستىرىلادى.

ۆەنگريا بولسا بۇگىنگى تۇندە ەكى ۇشاقپەن يزرايلدەن 215 ادامدى ەۆاكۋاتسيالادى. مۇنى وسى ەلدىڭ سىرتقى ىستەر ءمينيسترى پيتەر سييارتو Facebook تەگى پاراقشاسىندا جازدى.

بۇگىن تاڭەرتەڭ بولگاريا ۇكىمەتى جىبەرگەن ەكىنشى ۇشاق يزرايلدەگى 87 ادامدى ەلگە جەتكىزدى. وسىدان ءبىر كۇن بۇرىن 92 بولگار ازاماتى ارنايى رەيسپەن وتانىنا ورالعان ەدى.

تەل- اۆيۆتەگى ا ق ش كونسۋلدىعى پالەستينا مەن يزرايلدەگى امەريكالىقتاردى لود اۋەجايى ارقىلى كەز كەلگەن ۋاقىتتا ەۆاكۋاتسيالاۋعا دايىن ەكەنىن ءمالىم ەتتى.

حاماس قوزعالىسىنىڭ شابۋىلىنا بايلانىستى ۆيفلەەم قالاسىندا قالىپ قويعان ءۇندىستاننىڭ 27 ازاماتى ەگيپەتكە ەۆاكۋاتسيالاندى.

ولار ودان ءارى وتانىنا ورالماق. Air India اۋە كومپانياسى يزرايلمەن تىكەلەي اۋە قاتىناسى توقتاعاننان كەيىن ەكيپاج مۇشەلەرىن جانە باسقا دا ەكى قىزمەتكەردى تەل- اۆيۆتەن ەفيوپيانىڭ اۋە كەڭىستىگى ارقىلى ەۆاكۋاتسيالاعانىن حابارلادى. سونداي- اق ءۇندىستان ۇكىمەتى قالىپ قويعان ستۋدەنتتەردى يزرايلدەن قايتارۋ بويىنشا جۇمىس جۇرگىزىپ جاتىر.

وسى ۋاقىتقا دەيىن بىرنەشە ءىرى اۆياكومپانيا تەل- اۆيۆ باعىتىنداعى رەيستەردى توقتاتتى. ولاردىڭ اراسىندا American Airlines, Air France, Lufthansa, Emirates, Air France, Ryanair جانە Aegean Airlines سياقتى كومپانيالار بار.

ال قازاقستان ەۆاكۋاتسيالىق رەيستى 10-قازان كۇنى ۇيىمداستىرادى. Air Astana اۋە كومپانياسى اقتاۋ قالاسىنا تەحنيكالىق قونۋ ارقىلى الماتى- تەل- اۆيۆ- الماتى باعىتى بويىنشا كس-6490/6500 رەيسىن ورىنداۋدى جوسپارلاپ وتىر. الماتى قالاسىنان ۇشۋ ساعات 08:00 گە، تەل- اۆيۆ قالاسىنان ۇشۋ جەرگىلىكتى ۋاقىت بويىنشا ساعات 12:50 گە جوسپارلانعان.

بارلىق سۇراقتار بويىنشا اۆياكومپانيانىڭ help.airastana.com كومەك ورتالىعىنا حابارلاسۋ قاجەت، تەل.: 77272444478 ( قوڭىراۋلار ءۇشىن) جانە 77027020074 (WhatsApp) .

سوڭعى جاڭالىقتار