يزرايل حاماس-تىڭ اسكەري جەتەكشىسى موحاممەد دەيفتىڭ كوزى جويىلعانىن راستادى
استانا. KAZINFORM - بەيسەنبى كۇنى يزرايل قورعانىس كۇشتەرى اسكەري بارلاۋ قورىتىندىسى بويىنشا شىلدە ايىنداعى اۋە شابۋىلى كەزىندە حاماس-تىڭ اسكەري قولباسشىسى موحاممەد دەيفتىڭ قازا تاپقانىن حابارلادى. سودىرلار گازا سەكتورىنداعى حان-يۋنيستەگى نىسانعا سوققى بەردى، دەپ جازادى Euronews.
گازانىڭ دەنساۋلىق ساقتاۋ مينيسترلىگى سول كەزدەگى سوققىدان 90-نان استام ادامنىڭ، سونىڭ ىشىندە جاقىن ماڭداعى شاتىرلاردا قونىس اۋدارعان بەيبىت تۇرعىنداردىڭ قازا تاپقانىن حابارلادى. يزرايل قورعانىس ءمينيسترى يواۆ گاللانت بۇل سوققىنىڭ سوعىس ماقساتىنا جەتۋ جولىنداعى «ماڭىزدى كەزەڭ» ەكەنىن ايتتى.
«بۇل وپەراتسيانىڭ ناتيجەسى حاماس- تىڭ كۇيرەۋ جاعدايىندا تۇرعان ۇيىم ەكەنىن كورسەتەدى»، - دەدى مينيستر.
يزرايلدە دەيفتى «گازانىڭ وساما بەن لادەنى» دەپ اتايدى. دەيف 1990 -جىلدارى حاماس-تىڭ اسكەري قاناتى يزز اد-دين ءال-كاسسام بريگاداسىنىڭ نەگىزىن قالاۋشىلاردىڭ ءبىرى بولدى جانە ءبولىمدى ونداعان جىلدار بويى باسقاردى. ونىڭ قولباسشىلىعىمەن اۆتوبۋستار مەن كافەلەردە يزرايلدىكتەرگە قارسى ونداعان جانكەشتى جارىلىستار، يزرايلگە شابۋىل جاساۋ ءۇشىن زىمىرانداردىڭ ارسەنالى جاسالدى.
يزرايل بيلىگى موحاممەد دەيفتى 7-قازاندا يزرايلدىڭ وڭتۇستىگىندەگى لاڭكەستىك ارەكەتتى ۇيىمداستىرۋشىلاردىڭ نەگىزگىسى دەپ سانايدى.
اۆتور
ەركەجان سماعۇلوۆا
