يزمير اكىمشىلىگىندە سىبايلاس جەمقورلىق ءىسى بويىنشا 126 ادام قاماۋعا الىندى
استانا. KAZINFORM - يزميردە سىبايلاس جەمقورلىققا قارسى ءىرى وپەراتسيانىڭ ناتيجەسىندە تۇرىك پوليتسەيلەرى 126 ادامدى ۇستادى. ولاردىڭ اراسىندا قالالىق اكىمدىكتىڭ بۇرىنعى جانە قازىرگى قىزمەتكەرلەرى، مۋنيتسيپالدى كومپانيالاردىڭ قىزمەتكەرلەرى مەن مەردىگەر ۇيىمداردىڭ وكىلدەرى بار، دەپ حابارلايدى Kazinform ءتىلشىسى.
بەلگىلى بولعانداي، جەدەل-تەرگەۋ شارالارى قالالىق جوبالاردى جۇزەگە اسىرۋدا ءىرى كولەمدەگى قارجىلىق بۇزۋشىلىقتار فاكتىسى بويىنشا جۇرگىزىلگەن.
يزمير پروكۋراتۋراسى جەرگىلىكتى مەملەكەتتىك ورگانداردا مەملەكەتتىك ساتىپ الۋلار سالاسىنداعى تەرىس پايدالانۋ، بيۋدجەت قاراجاتىن ماقساتسىز پايدالانۋ جانە تەندەر راسىمدەرىن بۇرمالاۋ بەلگىلەرى انىقتالعانىن حابارلادى. كۇدىكتىلەرگە قىلمىستىق كودەكس بويىنشا تەندەرلەردىڭ تۇتاستىعىنا مەن مەملەكەتتىك بيۋجەتكە زالال كەلتىرەتىن قىلمىستىق سحەماعا قاتىسۋ باپتارى بويىنشا ايىپ تاعىلدى.
الدىن الا مالىمەت بويىنشا، اڭگىمە 280 ميلليون تۇرىك ليراسىنان (شامامەن 7 ميلليارد دوللار) اساتىن سومالار تۋرالى بولىپ وتىر. تەرگەۋ 2021-2024-جىلدار ارالىعىن قامتيدى، ول كەزدە قالادا İZBETON A. Ş. كوممۋنالدىق كاسىپورنىنىڭ قاتىسۋىمەن اۋقىمدى ينفراقۇرىلىمدىق جانە الەۋمەتتىك جوبالار جۇزەگە اسىرىلعان.
ۇستالعان 126 ادامنىڭ اراسىندا ءيزميردىڭ بۇرىنعى مەرى تۋنچ سويەر، قالالىق اكىمدىككە قاراستى مەكەمەلەردىڭ بۇرىنعى باسشىلارى، سونداي-اق قالا ۇكىمەتىنىڭ قازىرگى وكىلدەرى بار. تەرگەۋ اياسىندا 300 دەن استام مەكەنجايدا ءتىنتۋ جۇرگىزىلىپ، قۇجاتتار مەن سيفرلىق ساقتاۋ قۇرالدارى تاركىلەندى.
پروكۋراتۋرا وكىلدەرى تەرگەۋ جۇمىستارى زاڭ اياسىندا قاتاڭ تۇردە جۇرگىزىلىپ جاتقانىن ايتتى.
- ءبىز تەك زاڭ اياسىندا ارەكەت ەتەمىز. قىزمەتىنە قاراماستان، سىبايلاس جەمقورلىققا قاتىسى بار دەگەن كۇدىكتىلەردىڭ بارلىعى جاۋاپقا تارتىلۋى كەرەك، - دەلىنگەن ۆەدومستۆونىڭ رەسمي حابارلاماسىندا.
بۇل رەتتە مۇشەلەرى تەرگەۋدە جاتقان وپپوزيتسيالىق رەسپۋبليكالىق حالىق پارتياسى (ر ح پ) تەرگەۋدىڭ اشىقتىعىن قامتاماسىز ەتۋ قاجەتتىگىن جانە سوت تورەلىگىن ساياسي قۇرال رەتىندە پايدالانۋعا جول بەرىلمەيتىنىن مالىمدەدى.
- ءبىز سىبايلاس جەمقورلىقپەن كۇرەسۋدى جاقتايمىز، ءبىراق ءبىز زاڭ ۇستەمدىگى مەن ءادىل سوت پرينتسيپتەرىن ساقتاۋعا شاقىرامىز، - دەپ اتاپ ءوتتى پارتيانىڭ باسپا ءسوز قىزمەتى.
كۇدىكتىلەردەن جاۋاپ الۋ جالعاسىپ جاتىر. الدىن الۋ شاراسىن تاڭداۋ تۋرالى شەشىم جاقىن كۇندەرى قابىلدانادى. قۇقىق قورعاۋ ورگاندارىنىڭ مالىمەتىنشە، ءىس بويىنشا ايىپتالۋشىلاردىڭ سانى ارتۋى مۇمكىن.
