ۇيىقتاپ قالىپ، سارەسىن وتكىزىپ العان كىسىلەر نە ىستەيدى؟
ق م د ب ۇيىقتاپ قالىپ، سارەسىن وتكىزىپ العان جاندارعا كەڭەس بەردى. ءدىني باسقارما مالىمەتىنشە، سارەسىن ءىشۋ پارىز ەمەس، ۇيىقتاپ ياكي باسقا سەبەپتەرمەن سارەسىن وتكىزىپ العاندار ەشتەڭە ءىشىپ-جەمەستەن ورازا ۇستاۋىن ءارى قاراي جالعاستىرا بەرەدى. ءبىراق سارەسىن جىبەرىپ الماۋعا تىرىسقان ءجون.
«حاديستە: «سارەسىن ىشىڭىزدەر، سەبەبى سارەسىندە بەرەكەت بار. ءبىر جۇتىم سۋ ىشسەڭدەر دە سارەسىن تاستاماڭدار. سەبەبى سارەسىنە تۇرعاندارعا اللا تاعالا راقىم ەتىپ، پەرىشتەلەر كەشىرىپ تىلەيدى»، - دەلىنگەن.
سارەسى - دۇعا-تىلەكتەر قابىل بولاتىن ۋاقىت. سارەسىن ءىشۋ ادامعا كۇش بەرەدى، كۇندىزگى جۇمىستارىن تىڭعىلىقتى اتقارۋعا، عيباداتتارىن كەمشىلىكسىز ورىنداۋعا كومەكتەسەدى»، - دەپ جازىلعان مالىمەتتە.
ورازا - 2025 قاشان باستالدى؟
قازاقستان مۇسىلماندارى ءدىني باسقارماسىنىڭ شاريعات جانە ءپاتۋا ءبولىمى تۇركى مەملەكەتتەرى ۇيىمىنا قاراستى مۇفتيلەر القاسى جانىنداعى ءپاتۋا كەڭەسىمەن اقىلداسا كەلە بيىل رامازان ايى باستالاتىن كۇندى بەكىتتى.
ورتاق ءپاتۋاعا سايكەس قاسيەتتى رامازان ايى 1-ناۋرىزدا باستالدى.
رامازان 2025: قادىر ءتۇنى قاشان؟
ق م د ب مالىمەتىنشە، 27-ناۋرىزعا قاراعان ءتۇن - قاسيەتتى قادىر ءتۇنى. 30-ناۋرىز - ورازا ايت مەرەكەسى.
ءپىتىر ساداقا مولشەرى قانشا؟
باس ءمۇفتي ناۋرىزباي قاجى تاعان ۇلىنىڭ توراعالىعىمەن وتكەن قازاقستان مۇسىلماندارى ءدىني باسقارماسىنىڭ ءتورالقا ماجىلىسىندە ءپىتىر ساداقا ەلىمىز بويىنشا ەكى كەلى ۇننىڭ ورتاشا باعاسى نەگىزىندە 655 تەڭگە بولىپ بەكىتىلگەن.
