ۇيىقتاپ بارا جاتىپ دەنەنىڭ سەلك ەتە ءتۇسۋى نەنى بىلدىرەدى؟

استانا. قازاقپارات - كەيدە ۇيىقتاپ بارا جاتىپ كەنەتتەن قۇلاپ كەتكەندەي بولاسىڭ. دەنەڭ سەلك ەتە قالادى، ۇيقىڭ بۇزىلادى.

بۇل نەدەن بولادى جانە ول قاۋىپتى مە، سونى انىقتاپ كورەيىك، دەپ حابارلايدى El.kz ينتەرنەت پورتالى.

بۇل نە؟

ۇيىقتاپ بارا جاتقاندا دەنەنىڭ ەرىكسىز سەلت ەتۋى - گيپنيكالىق سىلكىنىس دەپ اتالادى. بۇل - ۇيقى مەن وياۋ كۇيدىڭ اراسىنداعى وتپەلى ساتتە جيى بولاتىن قىسقا ءارى كۇرت بۇلشىقەت جيىرىلۋى. ادام ءوزىن جوعارىعا سەكىرىپ كەتكەندەي نەمەسە تومەنگە تارتىلىپ بارا جاتقانداي سەزىنۋى مۇمكىن. كەيدە قۇلاۋ سەزىمى، جارق ەتكەن جارىق، توسىن دىبىس نەمەسە قىسقا ءتۇس كورۋ قاتار ءجۇرۋى مۇمكىن.

Sleep Foundation دەرەكتەرىنە سايكەس، گيپنيكالىق سىلكىنىستى ساۋ ەرەسەكتەردىڭ شامامەن 70 پايىز دەيىن باستان وتكەرەدى. ادەتتە ونىڭ ەشقانداي قاۋپى جوق جانە ەمدەۋدى قاجەت ەتپەيدى. ءبىراق جيىلىگى مەن قارقىنى ءار ادامدا ءارتۇرلى: بىرەۋلەر ونى سيرەك جانە ءالسىز بايقاسا، ەندى بىرەۋلەردە كۇن سايىن بولۋى مۇمكىن.

گيپنيكالىق سىلكىنىس - ميوكلونيانىڭ ءبىر ءتۇرى. بۇل - بۇلشىقەتتىڭ كەنەتتەن جيىرىلۋىن بىلدىرەتىن جالپى اتاۋ (مىسالى، قۇرىسۋ نەمەسە تۇنشىعۋ سەكىلدى). پاتولوگيالىق فورمالارىنان ايىرماشىلىعى - گيپنيكالىق سىلكىنىس ۇيقى كەزىندە بولاتىن قالىپتى قۇبىلىس.

بۇل نە سەبەپتى بولادى؟

ناقتى سەبەبى بەلگىسىز، ءبىراق عالىمداردىڭ بىرنەشە نۇسقاسى بار. ۇيىقتاپ بارا جاتقاندا بۇلشىقەتتەر بوساڭسىپ، تىنىس باياۋلايدى، ال مي ونى قاتەلەسىپ قۇلاۋ رەتىندە قابىلداۋى مۇمكىن. سوعان جاۋاپ رەتىندە مي بۇلشىقەتكە كۇرت جيىرىلۋ سيگنالىن بەرەدى - بۇل وزىندىك قورعانىس رەفلەكسى.

كەيبىر زەرتتەۋشىلەردىڭ پىكىرىنشە، بۇل قۇبىلىس تورلى قۇرىلىمنىڭ (رەتيكۋليارلىق فورماتسيا) قىزمەتىمەن بايلانىستى. ول ميداعى ۇيقى مەن وياۋ كۇي اراسىنداعى ءوتۋ كەزەڭىن رەتتەيدى. سيگنالداردىڭ دۇرىس بەرىلمەۋى سالدارىنان كۇتپەگەن جيىرىلۋ تۋىنداۋى مۇمكىن.

تريگگەر بولاتىن فاكتورلار

گيپنيكالىق سىلكىنىس قالىپتى قۇبىلىس سانالسا دا، كەيبىر جاعدايلار ونىڭ جيىلىگى مەن قارقىنىن ارتتىرادى:

ۇيقىنىڭ جەتىسپەۋى مەن شارشاۋ - ۇيقى فازاسىنا مي تەز اۋىسادى دا، جۇمىسى تۇراقسىز بولۋى مۇمكىن.

سترەسس پەن مازاسىزدىق - ۇيىقتار الدىندا ميدىڭ بەلسەندىلىگى تومەندەمەيدى.

كوفەين مەن نيكوتين - جۇيكە جۇيەسىن قوزدىرادى جانە ۇيقى ساپاسىن تومەندەتەدى.

الكوگول - ۇيقىشىلدىقتى ارتتىرعانىمەن، ۇيقى قۇرىلىمىن بۇزادى.

فيزيكالىق شارشاۋ - كەشكى قارقىندى جاتتىعۋلار جۇيكە جۇيەسىنىڭ سەزىمتالدىعىن ارتتىرادى.

كەيبىر دارىلەر - انتيدەپرەسسانتتار، ستيمۋلياتورلار جانە كەيبىر ۇيىقتاتاتىن دارىلەر ميوكلونيانى جاناما اسەر رەتىندە تۋدىرۋى مۇمكىن.

نە كومەكتەسەدى؟

تۇراقتى رەجيم ساقتاڭىز - كۇن سايىن ءبىر ۋاقىتتا ۇيىقتاپ، ءبىر ۋاقىتتا ويانىڭىز.

جايلى ورتا قالىپتاستىرىڭىز - بولمە قاراڭعى، تىنىش ءارى سالقىن بولسىن. ەلەكتروندى قۇرىلعىلاردى الىپ تاستاڭىز.

ۇيقى الدىندا بوساڭسۋ - جىلى دۋش، تىنىس الۋ جاتتىعۋلارى، جەڭىل سوزىلۋ، كىتاپ وقۋ، باياۋ اۋەن تىڭداۋ نەمەسە ءالسىز شاي ءىشۋ پايدالى.

كۇندەلىكتى قايتالاناتىن ارەكەتتەر ميعا «ۇيىقتاۋ ۋاقىتى كەلدى» دەگەن بەلگى بەرەدى.

دارىگەرگە قاشان قارالۋ كەرەك؟

ميوكلونيا:

كۇن سايىن قايتالانىپ، ۇيىقتاۋعا كەدەرگى كەلتىرسە؛

ۇيىقتاپ جاتقاندا دا جالعاسسا؛

بۇكىل دەنەگە تاراسا، اۋىرسىنۋ، شاتاسۋ، باس اينالۋ سەكىلدى بەلگىلەرمەن قاتار جۇرسە؛

جۇيكە جۇيەسىمەن نەمەسە ۇيقى ساپاسىمەن بايلانىستى باسقا بەلگىلەر پايدا بولسا، وندا دارىگەرگە قارالعان ءجون.