يسلامدىق قارجىلاندىرۋ نەسىمەن ەرەكشە - ساراپشى جاۋابى
استانا. KAZINFORM - يسلامدىق قارجى جۇيەسى ءداستۇرلى قارجىلاندىرۋدان نەسىمەن ەرەكشەلەنەدى؟ بۇل ساۋالدى يسلامدىق قارجى جانە بيزنەس قاۋىمداستىعىنىڭ ءتوراعاسى، استانا حالىقارالىق قارجى ورتالىعىنىڭ يسلامدىق قارجى باعىتى بويىنشا جەتەكشىسى ءمادينا تۋكۋلوۆاعا قويعان ەدىك.
- بىرىنشىدەن - مۇندا ءوسىم پايىزى بولمايدى، ياعني اقشادان اقشا جاساۋعا رۇقسات ەتىلمەيدى. يسلامدىق قارجى ادالدىققا، ەتيكاعا جانە اشىقتىققا نەگىزدەلگەن. سونىمەن قاتار، بانك پەن كليەنت اراسىنداعى قارىم-قاتىناس سەرىكتەستىككە نەگىزدەلگەن. بانك پەن كليەنت ءبىر-بىرىمەن سەرىكتەس رەتىندە جۇمىس ىستەيدى. جاقىندا سەميناردا بولدىم، سوندا تۇرىك يسلام بانكتەرىنىڭ وكىلى وتە قىزىقتى جايتپەن ءبولىستى، ءداستۇرلى بانك ءۇشىن جاقسى كليەنت دەگەن كىم؟ بۇل - قارىزىن ۋاقىتىندا تولەيتىن كليەنت، ءبىراق ۇنەمى كليەنت ەمەس، نەلىكتەن؟ سەبەبى تولەم كەشىكتىرىلگەن جاعدايدا ءوسىم مەن ايىپپۇل جينالادى، ال ول ءداستۇرلى بانكتەر ءۇشىن ول تابىس كوزى، - دەپ ءتۇسىندىردى ءمادينا تۋكۋلوۆا.
ماماننىڭ مالىمدەۋىنشە، يسلام بانكتەرىندە ايىپپۇل مەن ءوسىم الۋعا تىيىم سالىنعان.
- الايدا، كليەنتتى تارتىپكە سالۋ قاجەتتىلىگىنە بايلانىستى شاريعات عالىمدارى بەلگىلى ءبىر جاعدايدا ايىپپۇل سالۋعا رۇقسات بەرگەن. ءبىراق، بۇل ايىپپۇلدىڭ سوماسى قايىرىمدىلىققا باعىتتالادى. ول قاراجات بانكتىڭ اتىنان ەمەس، كليەنتتەردىڭ اتىنان قايىرىمدىلىققا بەرىلەدى. بانك بۇل اقشانى «مەن قايىرىمدىلىق جاسادىم» دەپ جاريالاي المايدى، - دەيدى ول.
بۇگىن استانادا العاش يسلامدىق قارجىلاندىرۋ جانە بيزنەس فورۋمى ءوتىپ جاتىر. فورۋمدى يسلامدىق قارجى جانە بيزنەس قاۋىمداستىعى TIDAM اگەنتتىگىمەن بىرلەسىپ، استانا حالىقارالىق قارجى ورتالىعىنىڭ قولداۋىمەن ۇيىمداستىرىپ وتىر. وعان 200 دەن استام ادام قاتىستى.
