يسپان فۋتبولى قازاق جەرىندە: «اتلەتيكو مادريد» اكادەمياسى بىزگە نە بەرەدى
فۋتبول سپورتى تانىمالدىلىقتان كەم ەمەس، جانكۇيەرلەرى جىل سايىن ارتىپ وتىرماسا، كەمىمەيدى. ەموتسياعا بولەيتىن جۇلدىزدارعا باي فۋتبول قازىر الەمدەگى №1 سپورت سانالادى.
قازاقستاندا دا وعان قىزىعۋشى جاستار از ەمەس. تاياۋدا ەلدەگى فۋتبول جانكۇيەرلەرىن قۋانتقان جاڭالىق جاريا بولدى. يسپانيالىق «اتلەتيكو مادريد» فۋتبول كلۋبى قازاقستاندا اكادەمياسىن اشپاق. بۇل باستاما كەلەشەكتە ەل فۋتبولىنا قالاي اسەر ەتپەك؟ Kazinform ءتىلشىسىنىڭ تالداۋىنان وقىڭىز.
داڭقى جاھانعا جايىلعان كلۋب
تاياۋدا مەملەكەت باسشىسى قاسىم-جومارت توقايەۆ پەن «اتلەتيكو مادريد» فۋتبول كلۋبىنىڭ پرەزيدەنتى ەنريكە سەرەسو توررەس كەزدەسكەن بولاتىن. وسى جيىندا اتالعان كلۋب تالعار قالاسىنداعى Akbulak وليمپيادا ورتالىعىنىڭ بازاسىندا فۋتبول اكادەمياسىن قۇراتىنىن مالىمدەدى.
جاڭالىق كوپشىلىكتى قىزىقتىرعانى انىق، «اتلەتيكو مادريد» كلۋبىنىڭ دا رەسمي سايتى بۇل جاڭالىقتى ءبولىستى.
كوماندانى جانكۇيەرلەرگە تانىستىرۋدىڭ قاجەتى جوق، 120 جىلدان استام تاريحى بار ۇجىمنىڭ جەتىستىكتەرى از ەمەس. بىرنەشە مارتە يسپانيانىڭ ىشكى بىرىنشىلىگىندە چەمپيون اتانىپ، كەيىنگى 14 جىلدا ەۋروپا ليگاسىندا 3 رەت توپ جاردى. ەڭ ايتۋلى دودا چەمپيوندار ليگاسىنىڭ فينالىنا دەيىن جەتكەن كەزدەرى بار.
جالپى، ەۋروپاداعى توپ كلۋبتار اراسىندا «اتلەتيكو مادريد» تۇراقتى دەڭگەيدەگى كوماندا سانالادى. وزگە كلۋبتار بىرنەشە جىل بويى دۇركىرەپ، بەلگىلى ءبىر كەزەڭدە بۋىن الماسۋدىڭ قيىندىعىنان السىرەپ جاتسا، اتالعان كلۋب ناتيجەسىن بۇلايشا قۇلدىراتپايدى. يسپانيا ليگاسىندا جىل سايىن العاشقى تورتتىك قاتارىنا ەنىپ، چەمپيوندار ليگاسىنىڭ پلەي-وفف كەزەڭىندە الپاۋىت كلۋبتارعا باسەكەلەس بولادى. اتلەتيكو مادريد كلۋبىنىڭ اكادەمياسى وسى كۇنى يسپانيادا مىقتى ويىنشىلاردى تاربيەلەۋ جاعىنان «بارسەلونا» مەن «رەال مادريدتەن» كەيىن ءۇشىنشى ايتىلادى.
ال كلۋب اكادەمياسىنان شىققان جۇلدىز ويىنشىلاردى كوپشىلىك جاقسى تانيدى. ولاردىڭ اراسىندا قاقپاشى داۆيد دە حەا، كوكە، گابي، الۆارو موراتا مەن 2008 -جىلى ەڭ ۇزدىك فۋتبولشىعا بەرىلەتىن «التىن دوپ» جۇلدەسىنە باستى ۇمىتكەرلەردىڭ ءبىرى بولعان فەرناندو توررەس تە بار. ياعني، اكادەميانىڭ تاريحى تەرەڭ، الەۋەتى زور. ايتسە دە كلۋبتىڭ شەت ەلدەردەگى اكادەمياسىنان شىققان اسا تانىمال ويىنشىلار كەزدەسپەيدى.
كوماندا نەگە قازاقستاندى تاڭدادى؟
«اتلەتيكونىڭ» 17 ەلدە اكادەمياسى بار، باسىم بولىگى كارى قۇرلىق ەلدەرىندە. وزگە قۇرلىقتان تەك ا ق ش، مەكسيكا، يندونەزيا، كونگو مەن دومينيكان رەسپۋبليكاسىنان عانا اكادەمياسىن اشقان. قازاقستان «اتلەتيكو ءمادريدتىڭ» ءتول اكادەمياسىن اشقان 18-ەل رەتىندە قاتارعا قوسىلعالى تۇر.
سونىمەن، «اتلەتيكو مادريد» اكادەمياسىنىڭ اشىلۋى بىزگە كەلەشەكتە قانداي ارتىقشىلىقتار بەرەدى. سپورت ساراپشىسى جاندوس ءبايدىلدانىڭ ايتۋىنشا، قازىر يسپانيالىق ماماندار الەم فۋتبولىندا سۇرانىسقا يە، سول ءۇشىن الداعى ۋاقىتتا ولاردىڭ جەتەكشىلىگىمەن قازاقستاندىق جاستار جاقسى ناتيجە كورسەتۋى مۇمكىن.
- مەنىڭ بىلۋىمشە، «اتلەتيكو مادريد» اكادەميا اشۋدا ت م د ەلدەرىنىڭ اراسىنان ءبىرىنشى بولىپ قازاقستاندى تاڭداپ وتىر. كلۋب باسشىلىعى مۇنداعى اكادەميانىڭ ساپالى جۇمىس ىستەۋىن قامتاماسىز ەتەدى، ويتكەنى كەلەشەكتە باسقا دا ەلدەردەن اكادەميا اشۋ ءۇشىن رەپۋتاتسياسى جاقسى بولۋى كەرەك. قازىر الەمدە يسپان فۋتبولى وتە ابىرويلى، بۇل ەلدەن شىققان ماماندارعا سۇرانىس جوعارى. مىسالى، «مانچەستەر ءسيتيدى» باپتايتىن پەپ گۆارديولا، «ارسەنال» باپكەرى ميكەل ارتەتا، «بايەردى» بيىككە شىعارعان حابي الونسو - يسپانيالىقتار. ءبىز ايتىپ وتىرعان «اتلەتيكو مادريدتىڭ» رەزەرۆىن جاتتىقتىراتىن فەرناندو توررەس پەن يتاليادا باپكەرلىك مانسابىن ءساتتى باستاعان سەسك فابرەگاسءقازىر يسپانيا فۋتبولىنىڭ وركەندەگەن شاعى ەكەنىن دالەلدەي ءتۇستى. سوندىقتان «اتلەتيكو مادريد» كلۋبى اكادەمياسىنىڭ اشىلعانى قازاقستان فۋتبولىنا ۇلكەن سەرپىلىس بەرەدى دەپ ويلايمىن، - دەدى ول.
ال كلۋبتىڭ قازاقستاندى تاڭداۋ سەبەبىنە كەلسەك، وعان بىرنەشە فاكتورلار اسەر ەتكەن بولۋى ءتيىس. بىرىنشىدەن، قازاقستان ۇلتتىق قۇراماسى كەيىنگى 2 جىلدىڭ ىشىندە فۋتبولدان جاقسى كورسەتكىشتەرگە جەتتى. دانيا، فينليانديا سەكىلدى ازۋلى قارسىلاستاردى جەڭدى. بيىل وتەتىن ەۋروپا چەمپيوناتىنىڭ توپتىق كەزەڭىنە وتۋگە ءبىر قادام قالعاندا عانا ءسۇرىندى. كوپ ۇزاماي ەۋروپا چەمپيوناتتارىندا وينايتىن كلۋبتار قازاقستاندىق ويىنشىلارعا قىزىعا باستاعانىن بايقادىق. ەكىنشىدەن، وزگە ەلدەر قازاقستاندىق جانكۇيەرلەردىڭ بەلسەندىلىگىن بايقادى. ەل قۇراماسىنىڭ ويىنشىلارى ەۋروپالىق كوماندالارعا اۋىسقاندا، اۋىسۋى مۇمكىن دەگەن ءتارىزدى جاڭالىقتار تارالعاندا ازاماتتار الەۋمەتتىك جەلىدە كلۋبتاردى قولپاشتاپ الا جونەلدى. ءوز كەزەگىندە بۇل كلۋبتارعا جارناما مەن تانىمالدىلىق تۇرعىسىنان تاپتىرماس ءتاسىل. ياعني، قازاقستاندا اكادەميا اشۋ ارقىلى «اتلەتيكو مادريد» فاناتتارى ءبىرشاما كوبەيەدى.
قورىتا ايتقاندا، اكادەميا جۇمىسىنىڭ ناتيجەسىن بولاشاق كورسەتەدى. ايتسە دە اكادەميا كەلەشەكتەگى جۇلدىز ويىنشىلارعا باسپالداق بولارىنا ءۇمىت باسىم.
