ۆيرۋستىق گەپاتيتتەن قالاي قورعانۋعا بولادى

ونىڭ ايتۋىنشا، جەدەل ۆيرۋستىق ۆ گەپاتيتىمەن سىرقاتتانۋشىلىق كورسەتكىشى 100 مىڭ تۇرعىنعا شاققاندا 0,38 بولدى. بۇل وتكەن جىلدىڭ وسى كەزەڭىمەن سالىستىرعاندا 28 پايىزعا تومەن. سونىمەن قاتار 14 جاسقا دەيىنگى بالالار اراسىندا ءبىر اۋرۋ جاعدايى تىركەلگەن.

ال جەدەل ۆيرۋستىق س گەپاتيتىمەن 14 ادام اۋىرعان. بالالار اراسىندا مۇنداي جاعدايلار انىقتالماعان. اۋرۋشاڭدىق كورسەتكىشى 100 مىڭ تۇرعىنعا شاققاندا 0,89 عا جەتىپ، وتكەن جىلعى دەڭگەيدەن 1,4 ەسە جوعارى بولدى.

- ۆيرۋستىق ۆ جانە س گەپاتيتتەرى باۋىردى زاقىمدايتىن قاۋىپتى جۇقپالى اۋرۋلار. ۆيرۋس اعزاعا زاقىمدانعان تەرى نەمەسە شىرىشتى قابىق ارقىلى ەنگەن كەزدە جۇعادى. ينفەكسيانىڭ كوزى - اۋرۋدىڭ جەدەل نەمەسە سوزىلمالى تۇرىمەن اۋىراتىن ادام، سونداي-اق ۆيرۋس تاسىمالداۋشىسى، - دەدى مامان.

سونىمەن قاتار جاننا پراليەۆا جۇقتىرۋ كوبىنەسە جۇقتىرىلعان قانمەن بايلانىس كەزىندە، قورعانىسسىز جىنىستىق قاتىناس ارقىلى، زارارسىزداندىرىلماعان مەديتسينالىق جانە كوسمەتولوگيالىق قۇرالداردى قولدانعاندا، سانيتاريالىق تالاپتار ساقتالماعان جاعدايدا تاتۋيروۆكا نەمەسە پيرسينگ جاساتقاندا، ۇستارا، ءتىس شەتكاسى جانە باسقا دا جەكە گيگيەنا قۇرالدارىن ورتاق پايدالانعاندا، سونداي-اق بوسانۋ كەزىندە انادان بالاعا بەرىلەتىنىن اتاپ ءوتتى.

ونىڭ ايتۋىنشا، ۆيرۋستىق ۆ جانە س گەپاتيتتەرى كوبىنە ەڭبەككە قابىلەتتى جاستاعى ادامدار اراسىندا انىقتالادى. اۋرۋعا شالدىققانداردىڭ شامامەن 64 پايىزى 20-40 جاس ارالىعىنداعى ازاماتتار. بۇل ينفەكسيانىڭ بەرىلۋ جولدارىنىڭ ەرەكشەلىگىمەن بايلانىستى.

سونداي-اق ول اۋرۋدىڭ العاشقى كەزەڭدەرىندە ەشقانداي بەلگىسىز ءوتۋى مۇمكىن ەكەنىن ەسكە سالدى. السىزدىك، تەز شارشاعىشتىق، تابەتتىڭ تومەندەۋى، وڭ جاق قابىرعا استىنداعى اۋىرلىق نەمەسە اۋىرسىنۋ، جۇرەك اينۋ، بۇلشىقەت پەن بۋىنداردىڭ سىرقىراۋى، تەرى مەن كوزدىڭ اق قابىعىنىڭ سارعايۋى، ءزاردىڭ قويۋلانىپ، ءناجىستىڭ تۇسسىزدەنۋى بايقالسا، مىندەتتى تۇردە دارىگەرگە قارالۋ قاجەت.

جاننا پراليەۆا ۆ گەپاتيتىنىڭ الدىن الۋدىڭ ەڭ ءتيىمدى جولى - ۆاكسينا سالدىرۋ. قازاقستاندا ەكپەلەر ۇلتتىق پروفيلاكتيكالىق ەگۋ كۇنتىزبەسى اياسىندا تەگىن جۇرگىزىلەدى. نارەستەلەر العاشقى دوزانى ءومىرىنىڭ العاشقى تاۋلىگىندە الادى، ال كەلەسى دوزالار ەكى جانە ءتورت ايلىق كەزىندە ەگىلەدى دەدى.

سونىمەن قاتار ۆ گەپاتيتىنە قارسى ۆاكسينا ينفەكسيا وشاعىنداعى بايلانىستا بولعان ادامدارعا الدىن الا تەكسەرۋدەن كەيىن، سونداي-اق مەديتسينا قىزمەتكەرلەرىنە 0-1-6 ايلىق سحەما بويىنشا ەگىلەدى.

قازىرگى ۋاقىتتا ۆيرۋستىق س گەپاتيتىنە قارسى ۆاكسينا جوق. سوندىقتان بۇل اۋرۋدىڭ الدىن الۋدا ارنايى ەمەس پروفيلاكتيكا شارالارىنىڭ ماڭىزى ەرەكشە.

ماماندار مەديتسينالىق جانە كوسمەتولوگيالىق قىزمەتتەردى تەك ليتسەنزياسى بار ۇيىمداردا الۋعا، ستەريلدى نەمەسە ءبىر رەت قولدانىلاتىن قۇرالداردىڭ پايدالانىلۋىن قاداعالاۋعا، كەزدەيسوق جىنىستىق قاتىناستان ساقتانۋعا جانە توسقاۋىلدىق قورعانىس قۇرالدارىن قولدانۋعا، وزگەنىڭ جەكە گيگيەنا زاتتارىن پايدالانباۋعا كەڭەس بەرەدى. ال مەديتسينا قىزمەتكەرلەرى ينفەكسيالىق قاۋىپسىزدىك تالاپتارىن ساقتاپ، ۆ گەپاتيتىنە قارسى تولىق ۆاكسيناتسيا كۋرسىنان ءوتۋى ءتيىس.

جاننا پراليەۆا ۋاقىتىلى ۆاكسينا سالدىرۋ، جەكە باس گيگيەناسىن ساقتاۋ، ستەريلدى قۇرالداردى پايدالانۋ جانە ءوز دەنساۋلىعىنا جاۋاپكەرشىلىكپەن قاراۋ ۆيرۋستىق گەپاتيتتەردى جۇقتىرۋ قاۋپىن ەداۋىر تومەندەتىپ، اۋرۋدىڭ اۋىر اسقىنۋلارىنىڭ الدىن الۋعا مۇمكىندىك بەرەتىنىن اتاپ ءوتتى.