يراندا جالعان ىشىمدىك ىشكەن 48 ادام كوز جۇمدى
استانا. KAZINFORM - يراننىڭ ءتورت پروۆينسياسىندا سوڭعى ۋاقىتتا مەتيل سپيرتىنەن جاسالعان كونترافاكتىلى الكوگولدى ىشكەن ادامداردىڭ ءولىمى مەن ۋلانۋ فاكتىسى ارتىپ كەلەدى. جاساندى سۋسىنداردى وندىرۋمەن اينالىسقان كۇدىكتىلەر قاماۋعا الىندى، ءبىراق وتە قاۋىپتى سۋسىندار يران نارىعىندا ءالى دە بار، دەپ جازادى Hamshahri.
باسىلىمنىڭ حابارلاۋىنشا، ەلدىڭ ءتورت وبلىسىندا مەتيل سپيرتىنەن جاسالعان الكوگول ونىمدەرىن تۇتىنۋ سالدارىنان كوز جۇمعاندار جانە كورۋ قابىلەتىنەن ايىرىلعاندار سانى ارتىپ كەلەدى.
وسى ۋاقىتقا دەيىن 48 ادامنىڭ قايتىس بولعانى بەلگىلى بولعان. ولاردىڭ جارتىسىنان استامى مازونداران ايماعىن، قالعانى گيلان، زاندجان جانە حامادان ايماقتارىن مەكەن ەتكەن. ءتورت پروۆينسيادا جۇزدەگەن ادام ۋلانىپ اۋرۋحاناعا تۇسكەن، ولاردىڭ كەيبىرەۋلەرى كورۋ قابىلەتىنەن ايىرىلدى.
قايتىس بولعاندار مەن زارداپ شەككەندەردىڭ قانداي سۋسىن ىشكەنى جانە ونى قاي كومپانيا جاساعانى تۋرالى اقپارات جوق. كونترافاكتىلىك ونىمدەردى دايىنداۋعا جانە تاراتۋعا قاتىسى بار كۇدىكتىلەر ۇستالعانىمەن، ۇكىمەت قاۋىپتى ونىمدەردى نارىقتان جۇيەلى تۇردە الىپ تاستاۋعا قاۋقارى جەتپەي وتىر.
اۆتور
جاراسقان نۇرىبايەۆ
