يران يزرايلگە 48 ساعات ىشىندە سوققى بەرۋى مۇمكىن: شەتەلدىكتەر ەلدەن كەتىپ جاتىر
استانا. KAZINFORM - يران يزرايلگە سوققى بەرۋى مۇمكىن. ا ق ش مەملەكەتتىك حاتشىسى ەنتوني بلينكەن وداقتاستارىنا 48 ساعات ىشىندە شابۋىل جاساۋ مۇمكىندىگى تۋرالى ەسكەرتتى، دەپ جازادى Euronews.
امەريكالىق اقپارات كوزدەرىنە سايكەس، يران مەن ونىڭ وداقتاستارى تاراپىنان يزرايلگە شابۋىل جاسالۋى مۇمكىن. يزرايل بيلىگى كەز كەلگەن سەناريگە دايىن ەكەنىن مالىمدەدى.
ايماقتاعى قاقتىعىستىڭ ورشۋىنەن قاۋىپتەنىپ، فرانسيا باسقا باتىس ەلدەرى سياقتى ءوز ازاماتتارىن ليۆاننان تەز ارادا كەتۋگە شاقىردى.
بۇعان دەيىن حابارلاعانىمىزداي، ق ر سىرتقى ىستەر مينيسترلىگى قازاقستاندىقتارعا يزرايل مەن ليۆانعا بارۋدان ۋاقىتشا باس تارتۋدى ۇسىندى.
«قازىرگى ۋاقىتتا اتالعان ەلدەردە جۇرگەن قازاقستان ازاماتتارىنان اسا قاجەتتىلىك بولماسا ۇيلەرىنەن شىقپاۋدى، قاۋىپسىزدىك شارالارىن بارىنشا كۇشەيتۋدى، ساقتىق پەن قىراعىلىق تانىتۋدى، سوڭعى جاڭالىقتاردى قاداعالاۋدى، سونداي-اق قازاقستان سىرتقى ىستەر مينيسترلىگى جانە يزرايل مەن ليۆانداعى ەلشىلىكتەرىمەن بايلانىستا بولۋدى سۇرايمىز»، - دەلىنگەن مينيسترلىك حابارلاماسىندا.
