يران سىرتقى ىستەر مينيسترلىگى ەۋروپانىڭ ءتورت ەلىنىڭ ەلشىلەرىن شاقىردى

استانا. KAZINFORM - يران سىرتقى ىستەر مينيسترلىگى بەيسەنبى كۇنى رەسەيگە قىسقا قاشىقتىقتاعى بالليستيكالىق زىمىرانداردى جەتكىزگەنى، سونداي-اق بۇل ەلدەردىڭ جاڭا سانكتسيالار ەنگىزۋى تۋرالى ايىپتاۋدان كەيىن ۇلى بريتانيا، فرانسيا، گەرمانيا جانە نيدەرلاندى ەلشىلىكتەرىنىڭ باسشىلارىن شاقىردى.

يران سىرتقى ىستەر مينيسترلىگى باتىس ەۋروپا ىستەرى دەپارتامەنتىنىڭ باس ديرەكتورى مادجيد نيلي يراننىڭ نارازىلىعىن ءبىلدىرىپ، ءتورت باتىس مەملەكەتىنىڭ «دەسترۋكتيۆتى مالىمدەمەلەرى مەن ارەكەتتەرىن» قاتاڭ ايىپتادى، دەپ حابارلايدى IRNA اقپارات اگەنتتىگى.

- مۇنداي كوزاراستاعى شارانى قالايدا قولدانۋعا دەگەن ۇمتىلىس باتىستىڭ يران حالقىنا قارسى وشپەندىلىك ساياساتىنىڭ جالعاسى دەپ بىلەمىز جانە وعان قاتىستى يران يسلام رەسپۋبليكاسى تاراپىنان ءتيىستى جاۋاپ بولادى»، - دەدى ول.

ۆەدومستۆو سونداي-اق ۇلى بريتانيا، فرانسيا جانە گەرمانيانى يرانعا قارسى بىرلەسكەن مالىمدەمە جاريالاعانى ءۇشىن ايىپتاپ، ونى «داستۇردەن تىس جانە كونسترۋكتيۆتى ەمەس مالىمدەمە» دەپ اتادى. ول يراننىڭ بالليستيكالىق زىمىراندارىن رەسەيگە تاپسىردى دەگەن كەز كەلگەن ايىپتاۋلاردىڭ «مۇلدەم نەگىزسىز جانە جالعان» ەكەنىن اتاپ ءوتتى. مادجيد نيلي امەريكا قۇراما شتاتتارى مەن ونىڭ كەيبىر ەۋروپالىق وداقتاستارى بەيبىتشىلىك پەن قاۋىپسىزدىك تۋرالى سويلەسەتىنىن، سونىمەن بىرگە «ولاردىڭ وزدەرى الەمدە شيەلەنىستىڭ كوزى بولىپ، جويقىن قارۋلاردى يزرايلگە ساتاتىنىن» اتاپ ءوتتى.

سەيسەنبى كۇنى ا ق ش-تىڭ قارجى مينيسترلىگى رەسەيگە قىسقا قاشىقتىقتاعى بالليستيكالىق زىمىرانداردى تاسىمالداۋعا قاتىسى بار دەگەن ايىپپەن 20 يراندىق جەكە جانە زاڭدى تۇلعاعا سانكسيا سالدى. سەيسەنبى كۇنى جاريالانعان بىرلەسكەن مالىمدەمەدە ۇلى بريتانيا، فرانسيا جانە گەرمانيا بەرىلۋى مۇمكىن زىمىراندار تاسىمالىن ايىپتاپ، ونى «يران مەن رەسەيدىڭ جاعدايدى شيەلەنىستىرۋگە ۇمتىلۋى جانە «ەۋروپالىق قاۋىپسىزدىككە تىكەلەي قاتەر» ەكەنىن ايتتى.

ولار سونداي-اق يرانعا قارسى جاڭا سانكسيالاردى، سونىڭ ىشىندە يرانمەن اۋە قاتىناسى تۋرالى كەلىسىمدەردى بۇزاتىنىن جاريالادى، بۇل يران ەيردىڭ ۇلى بريتانيا مەن ەۋروپاعا ۇشۋ مۇمكىندىگىن شەكتەيدى. ءوز كەزەگىندە، سارسەنبى كۇنى نيدەرلاندى يران ەلشىسىن زىمىران تاسىمالىنا بايلانىستى شاقىرىپ، تەگەراننىڭ كەك قايتارۋىنا سەبەپ بولدى. بريتانيالىق، فرانسيالىق، نەمىس جانە گوللانديالىق ديپلوماتتار يراننىڭ نارازىلىعىن ءوز استانالارىنا جەتكىزۋگە ۋادە بەردى.

اۆتور
زارينا تۋعانبايەۆا