يران حاماس- تىڭ شابۋىلىنا قاتىسى جوق ەكەنىن مالىمدەدى
يران يزرايل اۋماعىنا حاماس اسكەرى جاساعان شابۋىلدارعا قاتىسى جوق ەكەنىن ءمالىم ەتتى، دەپ حابارلايدى kazinform اگەنتتىگىنىڭ مەنشىكتى ءتىلشىسى.

«ءبىز پالەستيناعا قولداۋ كورسەتۋدى تاباندى تۇردە قۋاتتايمىز. ءبىراق ءبىز پالەستينانىڭ جاۋاپتى رەاكسياسىنا قاتىسىپ جاتقان جوقپىز. سەبەبى مۇنداي شەشىمدى پالەستينا ءوزى قابىلدايدى. پالەستينا قابىلداعان شەشۋشى شارالار - جەتپىس جىلعا جالعاسقان زاڭسىز سيونيزم رەجيمى جاساعان باسقىنشىلىق پەن زۇلىم قىلمىستاردان تولىعىمەن زاڭدى تۇردە قورعانۋدى بىلدىرەدى»، - دەلىنگەن بۇۇ جانىنداعى يران ميسسياسىنىڭ مالىمدەمەسىندە.
يران سىرتقى ىستەر مييسترلىگىنىڭ وكىلى وڭىردەگى جاعدايعا بايلانىستى اتالعان ەل جەدەل تۇردە يسلام ىنتىماقتاستىعى ۇيىمىنىڭ (ي ى ۇ) وتىرىسىن شاقىراتىنىن ءمالىم ەتتى.
جەرگىلىكتى ب ا ق حابارلاۋىنشا، وڭتۇستىكتەگى جانە ورتالىقتاعى قالالاردا زىمىراندار تۋرالى جاڭا ەسكەرتۋلەر جاريالاندى. سوققىلار جونىندە دابىل بارلىق وڭتۇستىك وڭىردە جانە تەل- اۆيۆتەن وڭتۇستىككە قاراي ورنالاسقان قالالاردا، ونىڭ ىشىندە حولون مەن ريشون- لە- تسيوندا ەستىلىپ جاتىر.
سەنبى كۇنى پالەستينالىق حاماس توبى يزرايلگە شابۋىل جاساپ، ەل سوعىس جاعدايىنا كوشكەننەن كەيىن ءبىرقاتار مەملەكەت ازاماتتارىن يزرايلدەن ەۆاكۋاتسيالاۋدى ۇيىمداستىرعانىن ەسكە سالا كەتەيىك.
دۇيسەنبى كۇنى تاڭەرتەڭ يزرايل اسكەرىنىڭ رەسمي وكىلى بارلىق ەلدى مەكەن باقىلاۋعا الىنعانىن جانە يزرايل اۋماعىندا اسكەري ءىس- قيمىل جۇرگىزىلىپ جاتقان جوق دەپ مالىمدەدى. دەگەنمەن يزرايل اۋماعىندا ءالى دە حاماس اسكەرى بولۋى مۇمكىن ەكەنى ايتىلادى.
بۇگىن حاماس تەل- اۆيۆتەگى اۋەجايعا زىمىران ۇشىرعانى بەلگىلى بولدى. سونداي- اق يزرايل قورعانىس ءمينيسترى يواۆ گاللانت گازانىڭ تولىق وقشاۋلانعانىن ءمالىم ەتتى. ول جاقتا جارىق، تاماق جانە وتىن جوق.