يران بيلىگى حالىقتى WhatsApp قوسىمشاسىن جويۋعا شاقىردى
استانا. KAZINFORM - تەگەران تانىمال مەسسەندجەردى قولدانۋشىلاردىڭ دەرەكتەرىن جينادى دەپ ايىپتاپ وتىر، الايدا ناقتى دالەلدەر كەلتىرىلگەن جوق، دەپ حابارلايدى Kazinform ءتىلشىسى.
سەيسەنبى كۇنى يراننىڭ مەملەكەتتىك تەلەارناسى ازاماتتارعا ۇيالى تەلەفوندارىنان WhatsApp قوسىمشاسىن وشىرۋگە كەڭەس بەردى. مۇنداي ۇسىنىس مەسسەندجەردىڭ قولدانۋشىلار دەرەكتەرىن يزرايلگە جولدايدى دەگەن ايىپتاۋلار نەگىزىندە ايتىلدى، الايدا ناقتى دالەلدەر كەلتىرىلگەن جوق.
Meta كورپوراتسياسىنا تيەسىلى WhatsApp كومپانياسى رەسمي مالىمدەمەسىندە بۇل ايىپتاۋلاردى تەرىسكە شىعارىپ، «وسى جالعان حابارلامالار قىزمەتتى بۇعاتتاۋعا سەبەپ بولۋى مۇمكىن، ال ادامدار ءۇشىن بايلانىستا بولۋ اسىرەسە ماڭىزدى» دەپ اتاپ ءوتتى.
سونداي-اق ولار «قولدانۋشىلاردىڭ ناقتى ورنالاسقان جەرىن باقىلامايتىنىن، سويلەسۋ جۋرنالدارىن ساقتامايتىنىن جانە ۇكىمەتتەرگە جاپپاي اقپارات بەرمەيتىنىن» مالىمدەدى.
WhatsApp كومپانياسى دا سوڭعى شيفرلاۋ تەحنولوگياسىن قولداناتىنىن ەسكە سالدى، بۇل دەگەنىمىز تەك جىبەرۋشى مەن قابىلداۋشى حابارلامالاردىڭ مازمۇنىن كورە الادى. دەرەكتەر ۇستالعان جاعدايدا دا، ولار ارنايى كىلتسىز قولجەتىمسىز بولىپ قالادى.
دەگەنمەن، ساراپشىلار قوسىمشا ءالى دە شيفرلانباعان مەتادەرەكتەردى جيناۋى مۇمكىن ەكەنىن اتاپ ءوتتى.
كورنەلل ۋنيۆەرسيتەت ينجەنەرلىك فاكۋلتەتىنىڭ پروفەسسورى گرەگوري فالكو Associated Press اگەنتتىگىنە بەرگەن سۇحباتىندا بۇل ۇزاق ۋاقىت بويى ماسەلە بولىپ كەلگەنىن جانە كەيبىر پايدالانۋشىلاردىڭ WhatsApp قولدانباۋىن تاڭداۋىنىڭ سەبەبى ەكەنىن ايتتى.
ونىڭ ايتۋىنشا، تاعى ءبىر الاڭداۋشىلىق تۋىنداتاتىن ماسەلە - دەرەكتەردىڭ ەلدەن تىس جەردە ساقتالۋى ەكەنىن اتاپ ءوتتى، بۇل سيفرلىق ەگەمەندىك ماسەلەلەرىن كوتەرەدى.
- مەملەكەتتەر وزدەرىنىڭ الگوريتمدەرىن پايدالانىپ، دەرەكتەردى ءوز اۋماعىندا ورنالاستىرىپ، وڭدەۋى كەرەك. گلوبالدى ساقتاۋ ينفراقۇرىلىمىنا دەگەن سەنىم تومەندەپ كەلەدى، - دەپ قوستى ول.
يراندا الەۋمەتتىك جەلىلەرگە قولجەتىمدىلىك ۋاقىتشا شەكتەلىپ تۇرادى. رەسمي تىيىمدارعا قاراماستان، كوپتەگەن پايدالانۋشى ولاردى VPN ارقىلى اينالىپ وتەدى. 2022 -جىلى ايەلدەرگە قاتىستى مورالدىق پوليتسيانىڭ ۇستاۋىنان كەيىنگى جاپپاي نارازىلىقتار اياسىندا بيلىك WhatsApp پەن Google Play- ءدى بۇعاتتادى، ءبىراق 2024 -جىلدىڭ سوڭىندا تىيىم الىنىپ تاستالدى. وعان دەيىن WhatsApp ەلدە Telegram جانە Instagram قوسىمشالارىمەن قاتار ەڭ تانىمال مەسسەندجەرلەردىڭ ءبىرى بولعان ەدى.
سونىمەن قاتار، سەيسەنبى كۇنى يراننىڭ كيبەرقاۋىپسىزدىك باسقارماسى مەملەكەتتىك قىزمەتكەرلەر مەن ولاردىڭ قاۋىپسىزدىك قىزمەتتەرىنە ينتەرنەتكە قوسىلعان بارلىق قۇرىلعىنى پايدالانۋعا تىيىم سالدى. بۇل ديرەكتيۆا سمارتفوندار، اقىلدى ساعاتتار، پلانشەتتەر جانە باسقا دا قوسىلعان قۇرىلعىلارعا قاتىستى جانە وتكەن جىلى «حەزبوللا» مۇشەلەرىنە قارسى يزرايلدىڭ «پەيدجەرلىك شابۋىلىنا» ۇقساس وقيعالاردىڭ الدىن الۋ ماقساتىندا قابىلدانعان كورىنەدى.
سەيسەنبى كۇنى يراننىڭ جەتەكشى مەملەكەتتىك بانكتەرىنىڭ ءبىرى Sepah Bank حاكەرلىك توپتىڭ اۋقىمدى كيبەرشابۋىلىنا ۇشىراپ، كليەنتتەرگە قىزمەت كورسەتۋ مەن بانكتىك جۇيەلەرگە قولجەتىمدىلىكتە ۇزىلىستەر بولدى.
بۇدان بولەك ا ق ش پرەزيدەنتى يراننىڭ جوعارعى جەتەكشىسى الي حامەنەيدى جويۋعا قابىلەتتى ەكەنىن، ءبىراق ازىرگە ونى جويۋدى جوسپارلامايتىنىن مالىمدەدى.
ءوز كەزەگىندە اياتوللا حامەنەي يراننىڭ تاڭىلعان سوعىسقا دا، تاڭىلعان بەيبىتشىلىككە دە كونبەيتىنىن ايتتى.
