يران ا ق ش سوققىلارى يادرولىق نىساندارعا ەلەۋلى زيان تيگىزگەنىن مالىمدەدى
استانا. KAZINFORM - يران سىرتقى ىستەر ءمينيسترى ابباس اراگچي CBS News تەلەارناسىنا بەرگەن سۇحباتىندا ا ق ش- تىڭ سوققىسىنان يراننىڭ يادرولىق نىساندارىنا قاتتى زاقىم كەلگەنىن ايتتى، دەپ حابارلايدى Kazinform.
- فوردودا نە بولعانىن ەشكىم ناقتى بىلمەيدى. الايدا، قازىرگى ۋاقىتتا بەلگىلى بولعانى، نىسانداردىڭ ايتارلىقتاي قاتتى زاقىمدالعانى. يران يسلام رەسپۋبليكاسىنىڭ اتوم ەنەرگياسى ۇيىمى باعالاۋ جانە تالداۋ جۇمىستارىن جۇرگىزىپ جاتىر، ەسەپ ۇكىمەتكە ۇسىنىلادى، - دەدى ابباس اراگچي يادرولىق نىسانداعى جاعداي تۋرالى سۇراققا جاۋاپ بەرە وتىرىپ.
ول زالالدىڭ سيپاتى تۋرالى ناقتى اقپاراتقا يە ەمەس ەكەنىن جانە نىسانداردى قايتادان ىسكە قوسۋعا بولاتىن-بولمايتىنىن ءتۇسىنۋ ءۇشىن ەسەپتەردى كۇتۋ كەرەكتىگىن ايتتى.
- يراننىڭ بەيبىت ماقساتتاعى يادرولىق باعدارلاماسى ۇلتتىق ماقتانىش پەن ابىروي ىسىنە اينالدى. ءبىز، ارينە، حالىقارالىق قاۋىمداستىق پەن مۇددەلى ەلدەردى ءبىزدىڭ باعدارلامامىزدىڭ، يادرولىق باعدارلامامىزدىڭ مۇلدەم بەيبىت سيپاتتا بولاتىنىنا سەندىرۋدى جالعاستىرامىز، - دەدى يران سىرتقى ىستەر ءمينيسترى.
تەگەراننىڭ امەريكالىق تاراپتىڭ مالىمدەمەلەرىنە قاراماستان، ا ق ش- پەن كەلىسسوزدەردى قايتا باستاۋعا ءالى كەلىسىم بەرمەگەنى بۇعان دەيىن حابارلانعان. ا ق ش پرەزيدەنتى دونالد ترامپ بۇعان دەيىن امەريكالىقتاردىڭ سوققىسى يراننىڭ يادرولىق نىساندارىن «جويعانىن» بىرنەشە رەت مالىمدەپ، كەلىسسوزدەردىڭ جاقىن ارادا قايتا باستالاتىنىنا سەنىم ءبىلدىردى.
ايتا كەتەلىك يراندا يزرايل شابۋىلدارىنان قازا تاپقاندار سانى 950 ادامعا جەتكەنى تۋرالى جازعان ەدىك.
