گيپنوزداپ تاستاعان: شىمكەنتتىك اجەلەر الاياققا بار جيعانىن بەرە سالدى
شىمكەنتتە قارت كىسىلەردى الداپ، قارجىسىن يەمدەنىپ كەلگەن الاياق ۇستالدى، دەپ حابارلايدى Kazinform.
الاياقتىڭ قۇرباندارى 73 جانە 68 جاستاعى جەرگىلىكتى تۇرعىندار بولىپ شىقتى. ەكى مەكەنجايعا دا كۇدىكتى ءۇي ساتىپ الۋ ماقساتىندا بارعان.
اڭگىمەلەسۋ بارىسىندا وتباسىنا دۋا جاسالعانىن جانە ونى تەز ارادا جويماسا، ءبىر جاماندىق بولاتىنىن ايتىپ سەندىرگەن. ءۇيدى تازارتۋ ءراسىمىن وتكىزۋ ءۇشىن التىن مەن اقشا سۇراعان. بارلىق باعالى زاتتى العان سوڭ، وقيعا ورنىنان بوي تاسالاعان.
«جابىرلەنۋشىلەردىڭ ايتۋىنشا، قاسكۇنەم گيپنوزدى قولدانعان. سەبەبى، ولار الاياققا قالاي الدانعانىن بىلمەيدى. كۇدىكتىنى ەڭبەكشى اۋداندىق پوليتسيا باسقارماسىنىڭ جەدەل ۋاكىلدەرى ءىزىن سۋىتپاي ۇستادى. بۇل ىسكە جەدەل باسقارۋ ورتالىعىنىڭ بەينەباقىلاۋ كامەرالارى كومەكتەستى. الماتى قالاسىنىڭ تۇرعىنى قۇرباندارىن تەك ەگدە جاستاعى، سەنگىش ازاماتتاردىڭ اراسىنان تاڭداپ وتىرعان» - دەلىنگەن شىمكەنت قالاسى پوليتسيا دەپارتامەنتىنىڭ باسپا ءسوز قىزمەتى تاراتقان اقپاراتتا.
