ينتەرپول قازاقستاندىق قىزدى كامبودجاداعى ەڭبەك قۇلدىعىنان قۇتقارىپ قالدى

استانا. KAZINFORM - قازاقستان ىشكى ىستەر مينيسترلىگىنىڭ ينتەرپولى كامبودجاعا جۇمىسقا ورنالاسۋ ماقساتىندا بارعان قازاقستاندىق ازاماتتى ەڭبەك قۇلدىعىنا ءتۇسۋ قاۋپىنەن قۇتقارىپ قالدى، دەپ حابارلايدى Polisia.kz.

قازاقستاندىق قىز كامبودجا كورولدىگىنە قوناقۇي اكىمشىسى قىزمەتىنە جۇمىسقا تۇرۋ ءۇشىن ۇشىپ بارعان. الايدا بارعان سوڭ جۇمىس ۇسىنىسىنىڭ جالعان ەكەنى انىقتالىپ، ول ەڭبەك قۇلدىعىنا تارتىلۋ قاۋپىنە تاپ بولعان.

وقيعاعا جەدەل دەن قويعان ءىىم ينتەرپولى كامبودجاداعى ينتەرپولدىڭ ۇلتتىق ورتالىق بيۋروسىنا جانە ينتەرپولدىڭ ادام ساۋداسىنا قارسى كۇرەس توبىنا رەسمي سۇرانىستار جولدادى. شەتەلدىك ارىپتەستەرمەن ۇيلەسىمدى ارەكەت ناتيجەسىندە ازاماتشا دەر كەزىندە قۇتقارىلىپ، امان- ەسەن قازاقستانعا قايتارىلدى.

قازىرگى ۋاقىتتا قىزدى شەتەلگە جۇمىسقا ورنالاستىرۋ سىلتاۋىمەن زاڭسىز ەڭبەككە تارتپاق بولعان ادامداردى انىقتاۋ جۇمىستارى جۇرگىزىلىپ جاتىر. ولار زاڭناماعا سايكەس جاۋاپقا تارتىلاتىن بولادى.

ءى ءى م مالىمەتىنشە، بۇل وقيعا ادام ساۋداسىنا قارسى حالىقارالىق ىنتىماقتاستىقتىڭ تيىمدىلىگىن كورسەتەدى. بۇعان دەيىن قازاقستان ىشكى ىستەر ءمينيسترى ەرجان سادەنوۆ ينتەرپولدىڭ فرانسيانىڭ ليون قالاسىنداعى شتاب-پاتەرىنە جۇمىس ساپارىمەن بارىپ، حالىقارالىق قاۋىپسىزدىك ماسەلەلەرى بويىنشا كەلىسسوزدەر جۇرگىزگەن ەدى. سونداي-اق قازاقستان ينتەرپولدىڭ ادام ساۋداسىنا قارسى «ليبەرتەررا II» وپەراتسياسىنا قوسىلىپ، لاوستا ەركىنەن تىس ۇستالعان تاعى ءبىر قازاقستاندىق قىزدى قۇتقاردى.

ءى ءى م  شەتەلدەگى «تارتىمدى» جۇمىس ۇسىنىستارىنان ساق بولۋعا شاقىرادى. ازاماتتارعا جۇمىس بەرۋشى تۋرالى اقپاراتتى رەسمي كوزدەردەن تەكسەرىپ، ساق بولۋ قاجەتتىگىن ەسكەرتەدى.