يندونەزيادا جانارتاۋ اتقىلاۋىنا بايلانىستى حالىقارالىق اۋە رەيستەرى توقتادى
استانا. KAZINFORM - يندونەزيانىڭ شىعىس كىشى زوند ارالدارى پروۆينتسياسىنا قاراستى شىعىس فلورەس اۋدانىندا ورنالاسقان ليەۆوتوبي لاكي-لاكي ستراتوجانارتاۋى اتقىلاپ، كۇشتى ۆۋلكاندىق كۇل بۇلتىن تۋدىردى. بۇل جاعداي ايماقتاعى حالىقارالىق اۋە رەيستەرىنىڭ توقتاۋىنا سەبەپ بولدى، دەپ جازدى انادولى اگەنتتىگى.
فلورەس ارالىنداعى ليەۆوتوبي لاكي-لاكي جانارتاۋى كۇلدى 10 شاقىرىم بيىكتىككە دەيىن لاقتىردى.
Angkasa Pura Indonesia مەملەكەتتىك باسقارۋشى كومپانياسى تاراتقان مالىمدەمەگە سايكەس، جانارتاۋ بەلسەندىلىگىنىڭ كۇشەيۋىنە بايلانىستى بالي ارالىنداعى نگۋراح-راي حالىقارالىق اۋەجايىندا، سونداي-اق ايماقتاعى ءبىرقاتار باسقا اۋەجايلاردا رەيستەر ۇشپاي قالدى.
توقتاتىلعان رەيستەردىڭ قاتارىندا اۋستراليالىق Jetstar مەن Virgin Australia، ءۇندىستاندىق Air India, جاڭا زەلانديالىق Air New Zealand, سينگاپۋرلىق Singapore Airlines جانە قىتايلىق Juneyao Airlines كومپانيالارىنىڭ ۇشاقتارى بار.
يندونەزيالىق AirAsia اۋە كومپانياسى دا كوپتەگەن ىشكى رەيستەرىن توقتاتتى.
ليەۆوتوبي لاكي-لاكي - ليەۆوتوبي دەپ اتالاتىن قوس جانارتاۋدىڭ ءبىر شىڭى. ول كۇلدى 10 شاقىرىمعا دەيىن اسپانعا لاقتىردى. قالىپتاسقان ساڭىراۋقۇلاق تارىزدەس كۇل بۇلتى جانارتاۋدان شامامەن 150 شاقىرىم قاشىقتاعى ەلدى مەكەندەردەن دە كورىندى.
اپات ايماعىندا توتەنشە جاعداي جاريالانىپ، جاقىن ماڭداعى اۋىلداردىڭ تۇرعىندارى ەۆاكۋاتسيالانىپ جاتىر. كۇلدىڭ تارالۋى تۇرعىنداردىڭ دەنساۋلىعىنا قاۋىپ ءتوندىرىپ وتىر.
يندونەزيا تىنىق مۇحيتىنداعى «وتتى شەڭبەردە»، ياعني سەيسميكالىق جانە جانارتاۋ بەلسەندىلىگى جوعارى ايماقتا ورنالاسقان. ەل اۋماعىندا 130 بەلسەندى جانارتاۋ بار.
ايتا كەتەيىك، 2024 -جىلعى قاراشادا ليەۆوتوبي لاكي-لاكي جانارتاۋى اتقىلاعان كەزدە 9 ادام قازا تاۋىپ، ونداعان ادام جارالانعان بولاتىن.
ەسكە سالا كەتەيىك، بۇعان دەيىن يسلانديانىڭ وڭتۇستىك-باتىس بولىگىندەگى رەيكيانەس تۇبەگىندە ورنالاسقان سۋندحنۋكۋر جانارتاۋى اتقىلاعانىن جازعان ەدىك.
