يەمەن تەل-اۆيۆ پەن ەيلات پورتىنا ۇشقىشسىز ۇشاقتارمەن سوققى جاسادى

استانا. KAZINFORM - يەمەن قارۋلى كۇشتەرىنىڭ رەسمي وكىلى تەل-اۆيۆتەگى اسكەري نىساندار مەن ەيلات پورتىنا ۇشقىشسىز باسقارىلاتىن ۇشاقپەن سوققى بەرگەنى تۋرالى حابارلادى، دەپ جازدى IRNA اقپارات اگەنتتىگى.

ياحيا ساري ءوز مالىمدەمەسىندە يەمەن قارۋلى كۇشتەرى پالەستينا مەن ليۆانعا قولداۋ كورسەتۋ ماقساتىندا تەل- اۆيۆتەگى يزرايل اسكەري نىساناسىنا شابۋىل جاساۋ ءۇشىن «يافا» ۇشقىشسىز باسقارىلاتىن ۇشاعىن پايدالانعانىن اتاپ ءوتتى.

ول سونداي-اق يەمەن قارۋلى كۇشتەرىنىڭ «ساماد 4» ءتيپتى ۇشقىشسىز باسقارىلاتىن ءتورت ۇشاعىنىڭ كومەگىمەن ۋمم- ەر- راشراش ايماعىندا (ەيلات پورتى) سيونيستىك اسكەري نىساندارعا دا شابۋىل جاساعانىن قوستى.

ساري ەكى وپەراتسيانىڭ ءساتتى وتكەنىن حابارلادى.

يەمەن قارۋلى كۇشتەرىنىڭ رەسمي وكىلى پالەستينا مەن ليۆان حالقىنا «باسقىنشىلاردى قۋىپ شىققانشا جانە ولاردىڭ جاۋلاپ الۋ جوسپارلارى بۇزىلمايىنشا» قولداۋ كورسەتۋدى جالعاستىراتىنىن باسا ايتتى.

30-قىركۇيەكتە يزرايل اسكەرىنىڭ ونداعان ۇشاعى يزرايلگە جاسالعان شابۋىلعا جاۋاپ رەتىندە يەمەندەگى حۋسيتتەر نىساندارىنا سوققى بەرگەنىن مالىمدەدى. سوققى نىسانى - حودەيدا پورتىنداعى ەلەكتر ستانتسيالارى مەن مۇناي سيستەرنالارى.

سول كۇنى يزرايل ارمياسى ليۆاننىڭ وڭتۇستىگىندە ورنالاسقان شەكارالىق اۋداندارداعى ليۆاندىق «حەزبوللا» توبىنىڭ نىساندارىنا «شەكتەلگەن وپەراتسيا» باستاعانىن حابارلادى.

ليۆان پرەمەر- ءمينيسترىنىڭ مىندەتىن اتقارۋشى نادجيب ميكاتي ءوز ەلىنىڭ «تاريحىنداعى ەڭ ءقاۋىپتى كەزەڭدەردىڭ ءبىرىن» باستان وتكەرىپ جاتقانىن ايتىپ، بىرىككەن ۇلتتار ۇيىمىن يزرايلدىڭ اۋە شابۋىلى سالدارىنان باسپاناسىز قالعان ميلليون ادامعا كومەك كورسەتۋگە شاقىردى.

1-قازاندا يران يزرايل اۋماعىنا بالليستيكالىق زىمىران ۇشىردى.