يەلىگىندە بىرنەشە كولىك پەن جىلجىمايتىن مۇلكى بار وتباسىلاردى الەۋمەتتىك قولداۋ توقتاتىلۋى مۇمكىن
استانا. KAZINFORM - ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا سەنات كۋلۋارىندا جۋرناليستەرگە الەۋمەتتىك كومەكتى سارالاپ تولەۋدىڭ جاڭا ءتارتىبىنىڭ ءمانىن ءتۇسىندىردى.
- بۇگىنگى تاڭدا بۇل ءتارتىپتى ىلكى جوبا رەتىندە شىمكەنت قالاسى مەن قاراعاندى وبلىسىندا ىسكە اسىرىپ باستادىق. كەيىن ونى بۇكىل رەسپۋبليكاعا تاراتۋ جوسپارى بار. ءبىراق تاراتپاي تۇرىپ نورماتيۆتىك- قۇقىقتىق اكتىلەر قابىلداۋ كەرەك. ءبىز مەملەكەتتەن الەۋمەتتىك كومەك الىپ جۇرگەنىمەن يەلىگىندە كوتتەدجى، 2-3 كولىگى بار ازاماتتاردى انىقتادىق. كوپبالالى انالاردىڭ اراسىندا وندايلار بار دەپ ناقتى ايتا المايمىن. ءبىراق 6-ساناتقا وتباسىلار كوپ اراسىنان ونداي فاكتىلەر كوپ. بۇل وتباسىلاردا 800 مىڭنان استام ادام تۇرىپ جاتىر، - دەدى مينيستر.
ۆەدومستۆو باسشىسى بۇل وزگەرىس وتباسىنىڭ جان باسىنا شاققانداعى تابىسىن يەلىگىندەگى كولىك پەن جىلجىمايتىن مۇلىك قۇنىمەن قوسىپ ەسەپتەۋدى كوزدەيتىنىن ايتتى.
- وتباسىنىڭ جان باسىنا شاققانداعى تابىسى ەڭ تومەنگى كۇنكورىس دەڭگەيىنىڭ 4 ەسەلەنگەن مولشەرىنەن اسسا، 2 جانە ودان كوپ اۆتوكولىك قۇرالى بولسا، ەكى جانە ودان كوپ جىلجىمايتىن مۇلىك بولسا، ءوزىنىڭ دامۋىنا ينۆەستيتسيا سالاتىن ادامدار تۋرالى ايتىپ وتىرمىز. الەۋمەتتىك ادىلدىك قاعيداتى دەپ وتىرعانىم دا وسى. ولارعا قولداۋ قاجەت ەمەس. رەفورما سولارعا قاتىستى. قالعان ساناتتارعا ۋايىمداۋدىڭ قاجەتى جوق، - دەدى سۆەتلانا جاقىپوۆا.
بۇعان دەيىن ول الەۋمەتتىك قامسىزداندىرۋ سالاسىن سيفرلاندىرۋ قاعاز جۇزىندە نەگىزسىز جازىلعان مالىمەتتەر اشىپ جاتقانىن ايتقان ەدى.
