ۋيليام حانزادا قازاقستاندىق ەكولوگيالىق جوبانى ماراپاتقا ۇسىندى
لوندون. KAZINFORM - قازاقستاندىق «التىن دالا» تابيعاتتى قورعاۋ باستاماسى الەمدىك ەكولوگيالىق بايقاۋدا 15 فيناليستىڭ قاتارىنان تابىلدى.
بۇل تۋرالى ۋيليام حانزادا حابارلادى. ۇلى بريتانيانىڭ بولاشاق تاق مۇراگەرى ەلىمىزدە فلورا مەن فاۋنانى قورعاۋ جانە قالپىنا كەلتىرۋ باعىتىندا جاسالىپ جاتقان جوباعا جوعارى باعا بەردى، دەپ حابارلايدى Kazinform ءتىلشىسى.
«التىن دالا» 2005 -جىلى اقبوكەندەردىڭ جويىلىپ كەتۋىنە جول بەرمەۋ ءۇشىن قۇرىلعان. زور ەڭبەكتىڭ ناتيجەسىندە ءتۇز تاعىلارىنىڭ پوپۋلياتسياسى بۇرىن- سوڭدى بولماعان 2,8 ميلليونعا جەتتى. «التىن دالا» سەرىكتەستەرىمەن بىرلەسىپ، اقبوكەندەردەن بولەك دالا بۇركىتى، قۇلان جانە پرجيەۆالسكي جىلقىسىنىڭ تۇقىمىن قايتا قالپىنا كەلتىرۋ ءۇشىن ارەكەت ەتتى.
EarthShot Prize سىيلىعىن ۇلى بريتانيا حانزاداسى ۋيليام مەن ايگىلى تەلەجۇرگىزۋشى ءارى ناتۋراليست دەۆيد اتتەنبورو تاعايىنداعان. ماقساتى جاھاندىق ەكولوگيالىق پروبلەمالاردى شەشۋگە اتسالىسۋ.
«باۋقاۋدىڭ 15 فيناليسى بۇرىن- سوڭدى بولماعان، يننوۆاتسياعا تولى، ءتيىمدى شەشىمدەر ۇسىندى. ۇسىنىس يەلەرى - عالامشاردى جاقسى جاعىنا قاراي وزگەرتۋگە نيەتتىلەر. ارالارىندا تابيعاتتى قورعاۋ جانە قالپىنا كەلتىرۋگە اتسالىسقان «التىن دالا» باستاماسى دا بار»، - دەيدى ۋيليام حانزادا.
«التىن دالا» جوباسى قازاقستاننىڭ بيوالۋانتۇرلىگىن ساقتاۋ قاۋىمداستىعىمەن، قازاقستان رەسپۋبليكاسى ەكولوگيا جانە تابيعي رەسۋرستار مينيسترلىگىمەن جانە ءبىرقاتار حالىقارالىق ۇيىمدارمەن بىرلەسىپ جۇزەگە اسىرىلىپ كەلەدى.
«قازاقستاندىق قوعامدىق جانە مەملەكەتتىك ۇيىمداردىڭ ەڭبەگى الەمدىك دەڭگەيدە باعالانىپ جاتقانى قۋانتادى. بۇل قولداۋ بولاشاقتا كوكجيەگىمىزدى كەڭەيتىپ، جاڭا ءبىلىم مەن تاجىريبەگە جول اشىپ، تابيعاتتىڭ، كليماتتىڭ جانە ادامداردىڭ يگىلىگى ءۇشىن سەپتىگى تيەدى دەپ دەپ ۇمىتتەنەمىز»، - دەيدى «التىن دالا» تابيعاتتى قورعاۋ باستاماسىنىڭ اتقارۋشى ديرەكتورى ۆەرا ۆورونوۆا.
15 فيناليستىڭ بەسەۋى ۇزدىكتەردىڭ ۇزدىگى دەپ تانىلىپ، ءارقايسىسى 1 ميلليون فۋنت ستەرلينگ كولەمىندە سىياقى الادى. قازاقستاندىق باستاما ۇلى بريتانيا، ەكۆادور جانە پەرۋ جوبالارىمەن باسەكەگە تۇسپەك. ماراپاتتاۋ ءراسىمى وتكەن جىلى سينگاپۋردە ۇيىمداستىرىلسا، بيىل 6-قاراشادا وڭتۇستىك افريكادا وتەدى.
عالىمجان قارامان ۇلى
