پيلوتتىق اۋىل شارۋاشىلىعى ساناعى قازاقستاننىڭ 54 ەلدى مەكەنىن قامتيدى
استانا. KAZINFORM - بيىلعى 20-تامىز بەن 30-قىركۇيەك ارالىعىندا قازاقستاندا پيلوتتىق اۋىل شارۋاشىلىعى ساناعى وتەدى. بۇل كەزەڭ اياسىندا ەلىمىزدىڭ ءار وڭىرىندە ەكى اۋىلدان جانە ءبىر قالادان - بارلىعى 54 ەلدىمەكەن قامتىلادى.
ساناقتى ۇلتتىق ستاتيستيكا بيۋروسىنىڭ اۋماقتىق بولىمشەلەرىنىڭ قىزمەتكەرلەرى جۇرگىزەدى. وعان زاڭدى تۇلعالار، ولاردىڭ قۇرىلىمدىق بولىمشەلەرى، شارۋا جانە فەرمەر قوجالىقتارىن قوسا العاندا، دارا كاسىپكەرلەر، سونداي-اق اۋىل شارۋاشىلىعى قىزمەتىن جۇزەگە اسىراتىن ءۇي شارۋاشىلىقتارى قاتىسادى.
«اۋىل شارۋاشىلىعىنىڭ پيلوتتىق ساناعى كەمشىلىكتەردى انىقتاپ، نەگىزگى ساناق پروتسەسىن جەتىلدىرۋگە مۇمكىندىك بەرەدى. ويتكەنى تەستىلەۋ كەزەڭىندە ءبىز دەرەكتەردى جيناۋ ادىستەرىن تالداپ، قولدانىلاتىن تەحنولوگيالاردىڭ تيىمدىلىگىن باعالاپ، جۇمىس پروتسەسى كەزىندە تۋىنداۋى مۇمكىن پروبلەمالاردى انىقتاي الامىز. بۇل تاسىلدەردى تۇزەتۋگە، كادر دايارلىعىن جاقسارتۋعا جانە 2025 -جىلعى نەگىزگى اۋىل شارۋاشىلىعى ساناعى كەزىندە اۋىل شارۋاشىلىعىنىڭ جاي- كۇيىن دالىرەك جانە تولىق كورسەتۋگە مۇمكىندىك بەرەدى»، - دەدى ق ر ۇلتتىق ستاتيستيكا بيۋروسىنىڭ باسشىسى ماقسات تۇرلىبايەۆ.
ساناق ساۋالنامالارى ءوز بەتىنشە تولتىرۋ ءۇشىن 20-تامىزدان 30-قىركۇيەككە دەيىن sanaq.gov.kz سايتىندا قولجەتىمدى بولادى. سونداي-اق ءۇي شارۋاشىلىقتارىنا ارنايى كيىنگەن (اق قالپاق پەن ونىڭ جەكە باسىن كۋالاندىراتىن بەيدجى بار) جانە قولىندا پلانشەتى بار ينتەرۆيۋەرلەر كەلەدى. رەسپوندەنتتەرگە اۋىل شارۋاشىلىعىندا اينالىساتىن ەكونوميكالىق قىزمەت ءتۇرى، ينجەنەرلىك-تەحنيكالىق كوممۋنيكاتسيالاردىڭ، دەربەس ەنەرگيا كوزدەرىنىڭ، اۋىل شارۋاشىلىعى ينفراقۇرىلىمىنىڭ قولجەتىمدىلىگى، ەڭبەك رەسۋرستارىنىڭ، وندىرىستىك جايلار مەن يماراتتاردىڭ بولۋى، ءتورت تۇلىك سانى، جەر ۋچاسكەلەرى، ورگانيكالىق ءونىم ءوندىرىسى تۋرالى جانە ت. ب. سۇراقتارعا جاۋاپ بەرۋ قاجەت بولادى.
پيلوتتىق ساناق بارىسىندا 29 مىڭ ءۇي شارۋاشىلىعى مەن 8 مىڭ كاسىپكەرلىك سۋبەكتىسى قامتىلادى دەپ جوسپارلانعان.
اۋىل شارۋاشىلىعى ساناعى ماسەلەلەرى بويىنشا كەڭەس الۋ ءۇشىن 1446 بايلانىس ورتالىعىنا نەمەسە تەلەگرامداعى statgovkz_bot بوتىنا حابارلاسۋعا بولادى.
