يلون ماسكتىڭ اناسى الماتىنىڭ سۇلۋلىعىنا ءتانتى بولدى

الماتى. KAZINFORM - يلون ماسكتىڭ اناسى مەي ماسك الماتىدا وتكەن ورتالىق ازيا ايەلدەرىنىڭ فورۋمىندا قازاقستاننان العان اسەرى تۋرالى ايتىپ، تۇساۋكەسەر داستۇرىنە ءتانتى بولدى.

امەريكالىق كاسىپكەر جانە Tesla كومپانياسىنىڭ نەگىزىن قالاۋشى يلون ماسكتىڭ اناسى مەي ماسكتى ورتالىق ازيا ايەلدەرىنىڭ فورۋمىنا قاتىسۋشىلار زور قوشەمەتپەن قارسى الدى.

كانادالىق-وڭتۇستىك افريكالىق مودەل، ءۇش بالانىڭ اناسى مەي ماسك قازاقستانعا كەلگەنىنە وتە قۋانىشتى ەكەنىن جەتكىزدى.

«مەن شىتىرمان وقيعالاردى جاقسى كورەمىن، ساياحات جاساعاندى ۇناتامىن. الەمنىڭ ءبىرتالاي ەلىندە بولدىم. ءبىراق، قازاقستانعا العاش رەت كەلىپ وتىرمىن. وسىندا كەلگەنىمە وتە قۋانىشتىمىن. مەن قازاقستان جانە الماتى تۋرالى كوبىرەك بىلگىم كەلدى، كەشە اسەم قالادا شاعىن ەكسكۋرسيا جاسادىق. ءبارى كەرەمەت»، - دەدى ول.

سونىمەن قاتار، مەيمان قازاقتىڭ كەرەمەت سالت-ءداستۇرى تۋرالى ايتتى.

«كەشە مەن كىشكەنتاي قىزدىڭ تۇساۋىن كەستىم. كەرەمەت ءداستۇر ەكەن. ماعان مىنانداي ۇلتتىق ناقىشتاعى ساقينا سىيلادى. كەشەلى بەرى تاستاماي تاعىپ ءجۇرمىن»، - دەدى ول.

بۇدان بولەك، مەي ماسك الماتىلىقتارعا دەنساۋلىق، دۇرىس تاماقتانۋ، قارتايۋ، گەندەرلىك تەڭدىك، بالالاردى جالعىز تاربيەلەۋ، قيىندىقتاردى جەڭۋ بويىنشا تاجىربيەسىمەن ءبولىستى.

مەي ماسك - ەكى عىلىم ماگيسترى دارەجەسى بار تاعامتانۋ عىلىمدارىنىڭ دوكتورى. ول 45 جىلدان استام ۋاقىت بويى جەكە تاماقتانۋ بيزنەسىن جۇرگىزەدى.