«ۆيپا» تايفۋنىنا بايلانىستى قىتايدىڭ وڭتۇستىگىندە جوعارى دايىندىق رەجيمى ەنگىزىلدى
استانا. KAZINFORM - قىتايدىڭ وڭتۇستىگىندەگى حاينان جانە گۋاندۋن پروۆينتسيالارى «ۆيپا» تايفۋنى وڭتۇستىك قىتاي تەڭىزىنە ەنگەننەن كەيىن جوعارى دايىندىق رەجيمىنە كوشىرىلدى، دەپ حابارلايدى شينحۋا.
قازىر تايفۋن سالدارىنان بۇل ايماقتارعا قاتتى جەل سوعىپ، نوسەر جاڭبىر جاۋىپ جاتىر.
سەنبى كۇنى تاڭعى ساعات 9:00 دە حاينان پروۆينتسياسىندا سۋ تاسقىنى مەن تايفۋنعا بايلانىستى ءتورتىنشى دەڭگەيدەگى توتەنشە ارەكەت ەتۋ رەجيمى ەنگىزىلدى. ال گۋاندۋن پروۆينتسياسىندا تاڭعى ساعات 11:00 دە بۇل رەجيم ءتورتىنشى دەڭگەيدەن ەكىنشى دەڭگەيگە دەيىن كوتەرىلدى.
حاينان پروۆينتسياسىنىڭ مەتەورولوگيالىق قىزمەتىنىڭ مالىمەتىنشە، سەنبى كۇنى تاڭعى ساعات 8:00 دە «ۆيپا» تايفۋنى تروپيكالىق داۋىلدان كۇشتى تروپيكالىق داۋىلعا اينالدى. ونىڭ ەپيتسەنترى حاينان ارالىنداعى ۆەنچان قالاسىنان شامامەن 930 شاقىرىم شىعىستا، وڭتۇستىك قىتاي تەڭىزىنىڭ سولتۇستىك-شىعىس بولىگىندە ورنالاسقان.
تايفۋن سولتۇستىك-باتىس باعىتتا ساعاتىنا 20 ك م جىلدامدىقپەن جىلجىپ كەلەدى جانە بارعان سايىن كۇشەيىپ جاتىر. ول گۋاندۋن پروۆينتسياسىنداعى شەنچجەن قالاسىنان باستاپ حاينان ارالىنداعى ۆەنچان قالاسىنا دەيىنگى جاعالاۋ ايماقتارىنا جاقىنداپ كەلەدى جانە جەكسەنبى كۇنى كۇندىز بەن ءتۇن اراسىندا قۇرلىققا جەتۋى مۇمكىن.
سەنبىدەن باستاپ 22-شىلدەگە دەيىن حاينان پروۆينتسياسىنىڭ تەڭىز جاعالاۋلارىندا جانە قۇرلىق بولىگىندە قاتتى جاڭبىر مەن ەكپىندى جەل كۇتىلەدى. سونىمەن قاتار، گۋاندۋن مەن حاينان پروۆينتسيالارىن ءبولىپ تۇرعان تسيۋنچجوۋ بۇعازىندا جەكسەنبى مەن 22-شىلدە ارالىعىندا كەمە قاتىناسى ۋاقىتشا توقتاتىلۋى مۇمكىن.
حاينان استاناسى حايكوۋ قالاسىندا كوشەلەردى سۋ باسۋى ىقتيمال. ال گۋاندۋن پروۆينتسياسى نايزاعاي، داۋىلدى جەل جانە تولقىن كوتەرىلۋىنە دايىندىق جۇرگىزىپ جاتىر.
سونداي-اق گۋاندۋندا ارنايى قۇتقارۋ كەمەلەرى، تىكۇشاقتار، قۋاتتى بۋكسيرلەر جانە تازالاۋ كەمەلەرى دايىندىقتا تۇر.
ەسكە سالا كەتەيىك، قىتايدا تايفۋندارعا قارسى توتەنشە ارەكەت ەتۋ جۇيەسى ءتورت دەڭگەيدەن تۇرادى، ونىڭ ىشىندە ءبىرىنشى دەڭگەي - ەڭ جوعارى قاۋىپ دەڭگەيى.
بۇدان بۇرىن قىتايدىڭ ۇلتتىق مەتەورولوگيالىق ورتالىعى (ۇ م و) سەنبى كۇنى وسى جىلى التى رەت تىركەلگەن «ۆيپحا» تايفۋنىنا بايلانىستى «سارى» دەڭگەيدەگى دابىلدى ۇزارتتى.
