وزبەكتىڭ 48 جاستاعى گيمناسشىسى توعىزىنشى رەت وليمپيادا جولداماسىنا تالاسادى

تاشكەنت. KAZINFORM - وزبەك گيمناستشىسى وكسانا چۋسوۆيتينا توعىزىنشى رەت وليمپيادا ويىندارىنا قاتىسۋ ءۇشىن جولداماعا تالاسادى. بۇل تۋرالى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار جازدى.

وزبەكستان ۇلتتىق وليمپيادا كوميتەتىنىڭ (ۇ و ك) اقپاراتى بويىنشا، وكسانا چۋسوۆيتينا سپورتتىق گيمناستيكادان ۇلتتىق قۇراما ساپىندا 15-18- اقپان ارالىعىندا كايردە وتەتىن الەم كۋبوگىنىڭ ءبىرىنشى كەزەڭىنە اتتاندى.

«وسىلايشا، و. چۋسوۆيتينا ءوزىنىڭ سپورتتىق مانسابىندا توعىزىنشى وليمپيادا ويىندارىنا قاتىسۋعا مۇمكىندىك بەرەتىن جولداما ءۇشىن كۇرەسەدى»، - دەپ ءمالىم ەتتى ۇوك.

كوميتەت دەرەگىنە ساي، الەم كۋبوگىنىڭ بارلىق ءتورت كەزەڭىندەگى جاتتىعۋلار بويىنشا ۇزدىك شىققان 2 گيمناست پاريج وليمپياداسىنىڭ جولداماسىن جەڭىپ الادى.

ايتا كەتەيىك، بيىل ماۋسىمدا 49 جاسقا تولاتىن وكسانا چۋسوۆيتينا 8 رەت وليمپيادا ويىندارىنا قاتىسىپ، گيننەستىڭ رەكوردتار كىتابىنا ەنگەن. ول 1992-جىلى بارسەلونادا وتكەن وليمپيادانىڭ كوماندالىق كوپسايىسىندا التىن، 2008-جىلى بەيجىڭدە كۇمىس مەدال ەنشىلەگەن. سونداي-اق اتالعان سپورتشى الەم چەمپيوناتىنىڭ ءۇش دۇركىن جەڭىمپازى بولعان.

توكيو وليمپياداسىنان كەيىن وكسانا چۋسوۆيتينا سپورتتىق مانسابىن اياقتايتىنىن مالىمدەگەن ەدى. الايدا، كەيىن سپورتقا قايتا ورالدى. ەگەر ول فرانتسياداعى ءتورتجىلدىقتىڭ باستى باسەكەسىنە جولداما ۇتىپ السا، وندا چۋسوۆيتينا ءوزىنىڭ رەكوردىن جاڭارتادى.