وزبەكستاننىڭ قازاقستانمەن شەكاراسىندا كونترابانداعا ارنالعان جاسىرىن تۋننەل تابىلدى
تاشكەنت. KAZINFORM - وزبەكستاندا ءۇندىستاندىق ءدارى-دارمەكتەردى قازاقستان ارقىلى ەلگە تاسىمالداۋمەن اينالىسقان ترانسشەكارالىق قىلمىستىق توپتىڭ قىزمەتى اشكەرە بولدى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.
جەدەل ءىس-شارانى مەملەكەتتىك قاۋىپسىزدىك قىزمەتىنىڭ شەكارا اسكەرلەرى جانە كەدەن كوميتەتىنىڭ «تاشكەنت-ا ە ر و» مامانداندىرىلعان كەدەن كەشەنىنىڭ قىزمەتكەرلەرى وتكىزدى.
ونىڭ بارىسىندا ءدارى-دارمەكتەردىڭ كەزەكتى پارتياسى دەليدەن الماتىعا تاشكەنت ارقىلى ترانزيتپەن جەتكىزىلىپ، كەيىن قازاقستاننىڭ سارىاعاش اۋدانىنداعى دوستىق اۋىلىنا اكەلىنگەنى انىقتالدى. ودان سوڭ كونتراباندالىق تاۋارلار ءارى قاراي قۇپيا تۋننەل ارقىلى تاشكەنت وبلىسىنداعى ۋريكزور ماحاللاسىنا اكەلىنگەن.
ۇزىندىعى 310 مەتر بولاتىن تۋننەل 1975-جىلعى ۋريكزور ماحاللاسىنداعى تۇرعىننىڭ ۇيىنەن تابىلدى. جەراستى وتكەلى جارىق جانە جەلدەتۋ جۇيەلەرىمەن جابدىقتالعان. سونىمەن قاتار، ول جەردەن جۇكتى تاسىمالداۋعا ارنالعان اربا مەن ارقاندار تابىلدى.
وزبەكستان مەملەكەتتىك قاۋىپسىزدىك قىزمەتىنىڭ اقپاراتىنشا، قىلمىستىق توپتىڭ مۇشەلەرىنەن جالپى قۇنى 1 ميلليارد سۋمنان (37,5 ميلليون تەڭگە) اساتىن ساپاسى تەكسەرىلمەگەن ءۇندىستاندىق ءدارى-دارمەك تاركىلەندى.
قازىرگى ۋاقىتتا اتالعان فاكتى بويىنشا قىلمىستىق ءىس قوزعالىپ، بىرنەشە كۇدىكتى ۇستالدى.
