وزبەكستاندىق قازاق بوكسشى كاسىپقوي بوكستا ەكىنشى جەڭىسىنە قول جەتكىزدى -شەتەلدەگى قازاق باسپا ءسوزى

Kazinform ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

شىمكەنتتەن قىتايدىڭ سيان قالاسىنا تىكەلەي رەيس اشىلدى -«حالىق گازەتى»

3-شىلدەدە Skat Airlines اۆياكومپانياسىنىڭ رەيسى سيان سيانيان حالىقارالىق اۋەجايىنان ۇشىپ، قازاقستاننىڭ شىمكەنت قالاسىنا قوندى. ءسويتىپ سيان قالاسى ەل بويىنشا كوش باستاپ، ورتالىق ازيانىڭ بەس ەلى مەن سەگىز قالاسىنا رەيس اشتى، دەپ حابارلايدى «حالىق گازەتى» باسىلىمى.

كەلتىرىلگەن دەرەكتەرگە سۇيەنسەك، وسى جىلدىڭ ءبىرىنشى جارتىجىلدىعىندا سيان سيانيان حالىقارالىق اۋەجايىنا ورتالىق ازيا ەلدەرىنەن 78000 نان استام جولاۋشىلار كەلىپ-كەتىپ، 700 دەن استام رەيس قاتىناعان. بۇل وتكەن جىلمەن سالىستىرعاندا سايكەسىنشە 40 پايىز جانە 19 پايىزعا وسكەن.

قىتايلىق ب ا ق- تىڭ دەرەگىنشە، بۇعان دەيىن سياننان شىمكەنتكە توتە باعىت بولماعاندىقتان الماسىپ بارۋعا كەم دەگەندە 12 ساعات كەتەتىن. بۇل باعىتتىڭ اشىلۋى جولاۋشىلار تاسىمالىن 5 ساعاتقا دەيىن قىسقارعان.

سونداي-اق وسى اپتادا «حالىق گازەتى» باسىلىمىندا «قازاقستاندىق كاسىپورىن قىتايعا كۇنباعىس مايىن ەكسپورتتايدى» دەگەن اقپارات جاريالاندى.

بۇل اقپاراتتى قىتايلى باق قازاقستان رەسپۋبليكاسى اۋىل شارۋاشىلىعى مينيسترلىگىنىڭ باسپا ءسوز قىزمەتىنە سىلتەمە جاساپ حابارلاعان.

كەلتىرىلگەن دەرەكتەرگە سۇيەنسەك، قازاقستاندىق Altyn Shyghys وڭدەۋ زاۋىتى قىتايعا تازارتىلماعان كۇنباعىس مايىنىڭ پارتياسىن جەتكىزەدى. دايىن ءونىمدى ساتىپ الۋشى ق ح ر استىق رەزەرۆتەرىن قالىپتاستىرۋعا جاۋاپتى Sinograin مەملەكەتتىك كومپانياسىنىڭ تاپسىرىسى بويىنشا قىتايلىق CITIS Construction Co Ltd. كورپوراتسياسى بولماق. ۋاعدالاستىق قازاقستاندىق كاسىپورىن بازاسىندا كۇنباعىس تۇقىمىن قايتا وڭدەۋدى جانە ودان ءارى قىتايعا ماي جىبەرۋدى كوزدەيدى.

وزبەكستاندىق قازاق بوكسشى كاسىپقوي بوكستا ەكىنشى جەڭىسىنە قول جەتكىزدى-ءو ز ا

تۇركيانىڭ ىستانبۇل قالاسىندا وتكەن كاسىپقوي بوكس بويىنشا «yBA. Pro 7» تۋرنيرىندە جەرلەسىمىز ماديار سايدراحيموۆ جەڭىسكە جەتتى، دەپ جازادى وزبەكستاندىق «ءو ز ا» .

اتالعان اقپارات كوزىنىڭ دەرەگىنشە، الەم چەمپيوناتىنىڭ جۇلدەگەرى، بىرنەشە حالىقارالىق جارىستاردىڭ جەڭىمپازى بولعان ماديار بۇل جارىستا ازەربايجان وكىلى احماد مۋستافايەۆپەن 6 راۋندتىق جەكپە-جەك وتكىزگەن.

تارتىستى وتكەن جەكپە-جەكتە 27 جاستاعى سايدراحيموۆ قارسىلاسىن ۇپاي ايىرماشىلىعىمەن ۇتتى.

ايتا كەتۋ كەرەك، ماديار سايدراحيموۆ 1997-جىلى وزبەكستاننىڭ گازالكەنت قالاسىندا دۇنيەگە كەلگەن. ول ەتنيكالىق قازاق.

ماديار سايدراحيموۆتىڭ بۇل جەڭىسى كاسىپقوي بوكستاعى ەكىنشى تابىستى جەكپە-جەك بولعان. ول 2017-جىلى مالايزيانىڭ كۋالا-لۋمپۋر قالاسىنداعى العاشقى كەزدەسۋىندە دە جەڭىسكە جەتكەن ەدى. سونىمەن قاتار، وزبەكستاندىق قانداسىمىز كۋبا، رەسەي سەكىلدى ەلدەردە IBA جۇيەسىندەگى جارتىلاي كاسىپقوي بوكس جەكپە-جەكتەرىندە دە لايىقتى ناتيجەلەر كورسەتىپ كەلەدى.

سونداي-اق وسى اپتادا «ءو ز ا» - دا «نامانگاندا جاپونيانىڭ ايگىلى ساكۋرا اعاشى كوبەيتىلمەك» دەگەن تاقىرىپتاعى اقپارات جاريالاندى.

نامانگاندا ءوتىپ جاتقان 64-حالىقارالىق «گۇلدەر فەستيۆالى» اياسىندا شەتەلدىك مارتەبەلى دەلەگاتسيالاردىڭ ساپارى جالعاسقان.

اتاپ ايتقاندا، جاپونيانىڭ فۋكۋوكا پرەفەكتۋراسىنا قاراستى دايزايفۋ قالاسىنىڭ مەرى كۋسۋدا دايزو نامانگان وبلىسىنىڭ اكىمى شاۆكات ابدۋراززوقوۆپەن كەزدەستى.

سۇحبات كەزىندە تاراپتار نامانگان وبلىسى مەن دايزايفۋ قالاسى اراسىنداعى بايلانىس پەرسپەكتيۆالارىن تالقىلاپ، ءوزارا اقپارات الماستى. حالىق سانى شامامەن 70 مىڭ بولاتىن دايزايفۋ قالاسىنا جىل سايىن 10 ميلليونعا دەيىن تۋريست كەلەتىندىگى تۋريزم سالاسىنداعى تاجىريبە الماسۋعا ۇلكەن مۇمكىندىك بەرەتىنىن كورسەتتى.

وزبەكستاندىق ب ا ق- تىڭ مالىمەتىنشە، كەزدەسۋ بارىسىندا تاراپتار جاپونيانىڭ ايگىلى ساكۋرا اعاشتارىن نامانگاندا كوبەيتۋ جونىندەگى بىرلەسكەن جوبالار بويىنشا كەلىسىمگە كەلگەن.

ە ى ۇ ايماقتاعى ەكونوميكالىق جانە قاۋىپسىزدىك سالاسىنداعى ىنتىماقتاستىقتى دامىتادى-ParsToday

يران پرەزيدەنتى ەكونوميكالىق ىنتىماقتاستىق ۇيىمى (ە ى ۇ) ءسامميتىن ەكونوميكالىق، الەۋمەتتىك جانە ساياسي ماسەلەلەر بويىنشا پىكىر الماسۋ، سونداي-اق ايماقتىق مۇددەلەرگە سايكەس بىرلەسكەن ىنتىماقتاستىق الاڭدارىن قۇرۋ مۇمكىندىگى دەپ سانايدى. بۇل تۋرالى وسى اپتادا ParsToday اقپارات اگەنتتىگى حابارلادى.

ParsToday اقپارات اگەنتتىگىنىڭ IRNA- عا سىلتەمە جاساپ حابارلاۋى بويىنشا، يران پرەزيدەنتى ماسۋد پەزەشكيان جۇما كۇنى (4-شىلدە) ەكونوميكالىق ىنتىماقتاستىق ۇيىمىنا (ە ى ۇ) مۇشە مەملەكەتتەر باسشىلارىنىڭ 17-سامميتىنە قاتىسۋ ءۇشىن ءازىربايجانعا اتتانار الدىندا ءوز پىكىرىن ءبىلدىردى. ونىڭ ايتۋىنشا، بۇل ساپار بەيبىتشىلىك پەن تۇراقتىلىق ورناتىپ، كورشىلەس ەلدەر اراسىنداعى ىنتىماقتاستىقتى ارتتىرادى.

پەزەشكيان ءازىربايجانعا ساپارىنىڭ يران، تۇركيا جانە پاكىستان اراسىنداعى ءۇشجاقتى قارىم-قاتىناستار اياسىندا ايقىندالعانىن جانە 10 ەلدىڭ ايماقتىق ىنتىماقتاستىعىنىڭ العاشقى قادامى ەكەنىن ايتقان.

ايتا كەتەيىك، بۇل وتىرىسقا قازاقستان، تۇرىكمەنستان، اۋعانستان، وزبەكستان، تاجىكستان جانە ءازىربايجان سياقتى ەلدەردىڭ باسشىلارى دا قاتىسۋدا.

ەسكە سالا كەتۋ كەرەك، ەكونوميكالىق ىنتىماقتاستىق ۇيىمى ايماقتىڭ ىنتىماقتاستىق دامۋ قۇقىعىنا يە، 1985-جىلى قۇرىلعان ۇكىمەتارالىق ايماقتىق ۇيىم بولىپ ەسەپتەلەدى. ەىۇ ءۇش قۇرىلتايشىسى مەملەكەتتىڭ يران يسلام رەسپۋبليكاسى، پاكىستان يسلام رەسپۋبليكاسى جانە تۇركيا رەسپۋبليكاسىنىڭ يزمير شارتىنىڭ كەلىسىمى بويىنشا قول قويىلعان ۋستاۆ اياسىندا ارەكەت جاسادى.

1992-جىلعا دەيىن ەىۇ شەڭبەرىندەگى ىنتىماقتاستىق ەكى جاقتى قاتىناستاعى سيپاتتا بولدى. 1992-جىلدان باستاپ ۇيىم قىزمەتى جاڭا جەتى مەملەكەتتىڭ قازاقستان، ءازىربايجان، تاجىكستان، تۇركمەنستان، اۋعانستان، قىرعىزستان جانە وزبەكستاننىڭ قوسىلۋىنا بايلانىستى بەلسەندى تۇردە دامىدى.

تۇركيا ەكسپورتتا تاعى ءبىر تابىسقا جەتتى-TRT

تۇركيا افريكانىڭ جەتى ەلىن دامۋ جولى جوباسى مەن ورتا ءدالىز ساۋدا باعىتى ارقىلى بايلانىستىرۋ ماقساتىندا بىرنەشە كەلىسىمگە قول قويدى. بۇل تۋرالى وسى اپتادا تۇركيا راديو تەليەۆيزيا پورتالى حابارلادى.

«TRT» - نىڭ دەرەگىنشە، ساۋدا ءمينيسترى ومەر بولاتتىڭ مالىمدەۋىنشە تۇركيانىڭ ەكسپورت كولەمى ماۋسىم ايىندا سوڭعى 12 ايدىڭ ورتاشا كورسەتكىشى بويىنشا 267 ميلليارد دوللارعا جەتىپ، ەڭ جوعارى دەڭگەيگە كوتەرىلدى. بۇل كورسەتكىش ەلدىڭ جاھاندىق ساۋداداعى ىقپالىن كۇشەيتۋگە باعىتتالعان ماڭىزدى كەزەڭ رەتىندە باعالانىپ وتىر.

سونداي-اق سارسەنبى كۇنى ساۋدا مينيسترلىگى جاريالاعان مالىمەتتەرگە سايكەس، تەك ماۋسىم ايىندا ەكسپورت جىلدىق ەسەپتە 8 پايىز ءوسىپ، 20,54 ميلليارد دوللارعا جەتتى. بۇل سوڭعى ءبىر جىل ىشىندەگى ەڭ جوعارى ايلىق ءوسىم بولدى. وسى كەزەڭدە يمپورت 15,3 پايىز ءوسىپ، 28,7 ميلليارد دوللارعا جەتتى. بۇل ماۋسىم ايىنداعى سىرتقى ساۋدا تاپشىلىعىن 8,17 ميلليارد دوللارعا دەيىن ارتتىردى، ال ەكسپورت- يمپورتتى جابۋ اراقاتىناسى 71,5 پايىز بولعان.

اۆتوربەيسەن سۇلتان