وزبەكستانداعى قازاق تىلىندە شىعاتىن «ديدار» باعدارلاماسىنا 60 جىل تولدى

تاشكەنت قالاسىندا وزبەكستان ۇلتتىق تەلەراديوكومپانياسىنىڭ كورەرمەندەر نازارىنا قازاق تىلىندە ۇسىنىلاتىن «ديدار» باعدارلاماسىنىڭ قۇرىلعانىنا 60 جىل تولۋىنا وراي سالتاناتتى شارا ءوتتى، دەپ حابارلايدى Kazinform وزبەكستان رەسپۋبليكاسى مادەنيەت مينيسترلىگىنىڭ باسپا ءسوز قىزمەتىنە سىلتەمە جاساپ.

سالتاناتتى شارادا مەملەكەتتە 130 دان استام ۇلت پەن ۇلىس وكىلدەرى قاتارىندا قازاق ۇلتىنىڭ ازاماتتارى ءبىر-بىرىمەن تاتۋ-ءتاتتى ءومىر ءسۇرىپ، ەلدىڭ دامۋىنا لايىقتى ۇلەس قوسىپ جاتقانى، وزبەكستانداعى قازاق ۇلتتىق مادەني ورتالىعىنىڭ ناتيجەلى جۇمىستارى ەرەكشە اتالىپ ءوتتى.

بۇل تۇرعىدا جۇرگىزىلگەن رەفورمالاردىڭ ناتيجەسىن كورسەتۋدە «ديدار» باعدارلاماسىنىڭ الاتىن ورنى ەرەكشە.

مەرەيتويعا وراي وزبەكستان رەسپۋبليكاسى مادەنيەت ءمينيسترىنىڭ بۇيرىعىنا سايكەس، ءبىر توپ ونەر قايراتكەرلەرى «مادانيات ۆا سانات فيدوكوري» توسبەلگىسىمەن ماراپاتتالدى. مادەنيەت ءمينيسترىنىڭ كەڭەسشىسى شاۆكات ارتىقوۆ ماراپاتتاردى يەلەرىنە سالتاناتتى تۇردە تابىس ەتتى.

شارا اياسىندا مادەنيەت مينيسترلىگى جانىنداعى حالىقارالىق قاتىناستار جانە شەت ەلدەرمەن دوستىق كوميتەتى، وزبەكستانداعى قازاق ۇلتتىق مادەني ورتالىعىمەن بىرلەسىپ، كورەرمەندەرگە جاس ونەرپازداردىڭ پوەزيالىق كەشى مەن كونسەرتتىك باعدارلاماسىن ۇسىندى.

 

اۆتور
جاراسقان نۇرىبايەۆ