وزبەكستانداعى قازاق جازۋشىلارىنىڭ كىتابى جارىق كوردى
تاشكەنت. KAZINFORM - وزبەكستانداعى ءبىرقاتار قازاق جازۋشىسىنىڭ كىتابى جارىق كوردى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.
وزبەكستان جازۋشىلار وداعىنىڭ عيماراتىندا وتكەن كىتاپتىڭ تۇساۋكەسەر سالتاناتىنا وسى ەلدەگى بەلگىلى قالامگەرلەر، جۋرناليستەر جانە قازاق-مادەني ورتالىعىنىڭ ءتوراعاسى جانە مۇشەلەرى، وزبەكستانداعى قازاق ادەبيەتى كەڭەسىنىڭ ءتوراعاسى قاتىستى.
وقىرمانعا جول تارتقالى وتىرعان 3 تۋىندى دا قازاق-مادەني ورتالىعىنىڭ قارجىلاندىرۋىمەن جارىق كورگەن.
ونىڭ العاشقىسى - وزبەكستانداعى بەلگىلى قازاق جازۋشىسى ساپاربەك يمانبەكوۆتىڭ «دوستارىمىز جىرلايدى» كىتابى. اۆتور 4 ۇلتتىڭ ادەبيەت جاۋھارلارىن قازاق تىلىنە اۋدارعان.
«وزبەكستان جازۋشىلار وداعىندا جاڭا تۋىندىلاردىڭ تۇساۋكەسەرى ءوتىپ جاتىر. مەن بيىل ۇلكەن ىسكە كىرىستىم. اتاپ ايتقاندا، وزبەك، ورىس، قاراقالپاق جانە قىرعىز تىلدەرىنەن بەلگىلى قالامگەرلەردىڭ ولەڭىن قازاق تىلىنە اۋداردىم. 44 جىل مەكتەپتە جۇمىس ىستەگەن اداممىن، تيىسىنشە بالالارعا وتە جاقىنمىن. سوندىقتان ءبىزدىڭ قازاق ءتىلدى بۇلدىرشىندەرىمىز وزگە ۇلت وكىلدەرى جازۋشىلارىنىڭ ەڭبەگىمەن تانىسسىن دەگەن ماقساتتا وسى كىتاپتى شىعارىپ وتىرمىن. بۇعان قوسا، ۇلتتار اراسىنداعى دوستىق نىعايا ءتۇسسىن دەگەن ويىم بولدى»، - دەدى ساپاربەك يمانبەكوۆ.
اۆتور اتاپ وتكەندەي، «دوستارىمىز جىرلايدى» تۋىندىسى جاستاردى وتانشىلدىققا، ادامگەرشىلىككە ۇندەيدى.
سونىمەن قاتار تۇساۋكەسەرى وتكەن تاعى ءبىر ەڭبەك - «قايران دۇنيە». ول - وزبەكستانداعى بەلگىلى قازاق جازۋشىسى، 18 كىتاپتىڭ اۆتورى ابدۋللا رۇستەموۆتىڭ تۋىندىسى.
«وسى كىتاپقا جان-دۇنيەمدى، ءبۇتىن ومىرلىك تاجىريبەمدى سالىپ جازدىم. ونىڭ ىشىندە قازاق مەكتەپتەرىندە وقىپ جاتقان بالالارعا ارناپ جازعان تاربيەلىك سيپاتتاعى ولەڭدەرىم توپتاستىرىلدى. مەن كوبىنە اتا-انا، وتان، ادامگەرشىلىك جانە بولاشاق تۋرالى وي تولعادىم، اقىل-كەڭەسىمدى قوستىم. ءوزىمنىڭ بار بىلگەن-كورگەنىمدى ولەڭ ارقىلى جاستارعا مۇرا ەتكىم كەلدى»، - دەپ توقتالدى ابدۋللا رۇستەموۆ.
ونىڭ ايتۋىنشا، بۇگىندە ۇكىمەت جانە وزبەكستانداعى قازاق-مادەني ورتالىعى تاراپىنان باسپا سالاسىنا قولداۋ ارتقان.
«قازاق-مادەني ورتالىعى كەيىنگى 7-8 جىلدا 40 تان استام كىتاپتىڭ جارىق كورۋىنە جاردەمدەستى. مۇنداي بۇرىن-سوندى بولماعان. وسىنداي ىلكىمدى ىستەر جالعاسادى دەگەن سەنىم مول»، - دەپ تۇيىندەدى ابدۋللا رۇستەموۆ.
بۇعان قوسا، جۋرناليست، تەلەجۇرگىزۋشى راحيلا مانسۇروۆانىڭ 80 جاس مەرەيتويىنا ورايلاستىرىلعان «ورلەۋ» اتتى كىتابىنىڭ تۇساۋكەسەرى ءوتتى.
قازاق-مادەني ورتالىعىنىڭ ءتوراعاسى سەرىكباي ۇسەنوۆ اتاپ وتكەندەي، اتالعان ەڭبەكتەردىڭ بارلىعى وزبەكستاننىڭ تۇپكىر-تۇپكىرىندەگى قازاق مەكتەپتەرىنە تاراتىلماق.
ەسكە سالا كەتسەك، بيىل وزبەكستاندا ءبىرقاتار قازاق جازۋشىسىنىڭ مەرەيتويى اتالىپ وتەدى.
