وزبەكستانداعى پارلامەنت سايلاۋىنىڭ الدىن الا قورىتىندىسى جاريالاندى

تاشكەنت. KAZINFORM - وزبەكستاندا وتكەن پارلامەنت سايلاۋىندا 19,9 ميلليون سايلاۋشىنىڭ %74,72 داۋىس بەردى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.

ورتالىق سايلاۋ كوميسسياسىنىڭ الدىن الا قورىتىندىسىنا ساي، زاڭ شىعارۋ پالاتاسىنداعى (پارلامەنتتىڭ تومەنگى پالاتاسى) جالپى سانى 150 ورىننىڭ 64 ءىن وزبەكستاننىڭ ليبەرالدىق- دەموكراتيالىق پارتياسى يەلەندى.

ال «ميللي تيكلانيش» («ۇلتتىق جاڭعىرۋ») دەموكراتيالىق پارتياسى 29 ماندات السا، «ادولات» («ادىلەت») سوتسيال-دەموكراتيالىق پارتياسىنان 21 دەپۋتات سايلانادى. سونىمەن قاتار، حالىقتىق-دەموكراتيالىق پارتياسىنان - 20 ادام، وزبەكستاننىڭ ەكولوگيالىق پارتياسىنان 16 ازامات دەپۋتات اتانادى.

ەسكە سالايىق، كەشە وزبەكستاندا پارلامەنت سايلاۋى ءوتتى. بيىل سايلاۋ تۇڭعىش رەت پروپورتسيونالدى-ماجوريتارلىق جۇيە نەگىزىندە ۇيىمداستىرىلدى.

سونىمەن قاتار، سايلاۋ كۇنى ءتۇرلى سەبەپتەرگە بايلانىستى تۇرعىلىقتى مەكەنجايىندا بولا المايتىن تۇرعىندار ءۇشىن 16-23-قازان ارالىعىندا مەرزىمىنەن بۇرىن داۋىس بەرۋ ۇيىمداستىرىلدى. وندا 1 ميلليوننان استام سايلاۋشى ءوز تاڭداۋىن جاسادى.

بۇعان دەيىن حابارلاعانىمىزداي، وزبەكستانداعى پارلامەنت سايلاۋىندا كەيبىر ۋچاسكەلەرگە ەلەكتروندىق داۋىس بەرۋ جۇيەسى ەنگىزىلدى.