وزبەكستان بيلىگى ينتەرنەتتە ەسىرتكى جارنامالاعاندارعا جازانى كۇشەيتتى
تاشكەنت. KAZINFORM - وزبەكستاندا تەلەكوممۋنيكاتسيا جەلىلەرىن پايدالانىپ جانە كامەلەتكە تولماعانداردى تارتا وتىرىپ، ەسىرتكى نەمەسە پسيحوتروپتىق زاتتاردى جارنامالاعاندارعا زاڭ كۇشەيدى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.
ءتيىستى تۇزەتۋلەر قىلمىستىق، قىلمىستىق ءىس جۇرگىزۋ جانە اكىمشىلىك كودەكستەرگە ەنگىزىلدى. قۇجاتقا 5-قازاندا وزبەكستان پرەزيدەنتى شاۆكات ميرزيەەۆ قول قويدى.
اتالعان كودەكستەرگە جاڭا باپتاردى ەنگىزۋ جونىندەگى شەشىمدى ولي ءماجىلىستىڭ زاڭ شىعارۋشى پالاتاسى بيىل ساۋىردە قابىلداعان، كەيىن ونى ماۋسىم ايىندا سەناتورلار ماقۇلدادى.
وعان ساي، ينتەرنەتتە ەسىكرتكى نەمەسە پسيحوتروپتىق زاتتاردى جارنامالاعاندارعا قىلمىستىق جانە اكىمشىلىك جازا قولدانىلادى.
سونداي-اق، ەسىرتكىنى ساتۋ ماقساتىن كوزدەمەي، ساقتاعاندارعا دا جاۋاپكەرشىلىك قاتاڭ بولماق. بۇل باپ بويىنشا قولدانىلاتىن ەڭ اۋىر جازا - 3 جىلعا باس بوستاندىعىنان ايىرۋ.
