وزبەكستان 2030-جىلعا قاراي جالپى ىشكى ءونىم كولەمىن 200 ميلليارد دوللارعا جەتكىزۋدى جوسپارلاپ وتىر

تاشكەنت. قازاقپارات - 2030-جىلعا قاراي وزبەكستان جالپى ىشكى ءونىم كولەمىن 200 ميلليارد دوللارعا جەتكىزۋگە نيەتتى. بۇعان دەيىنگى مەجە 160 ميلليارد دوللار شاماسىندا بەلگىلەنگەن ەدى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.

پرەزيدەنت شاۆكات ميرزيەيەۆتىڭ توراعالىعىمەن وتكەن كەڭەستەن كەيىن O'zbekiston 24 تەلەارناسىنا سۇحبات بەرگەن ەكونوميكا جانە قارجى ءمينيسترىنىڭ ءبىرىنشى ورىنباسارى يلحوم نوركۋلوۆ ەكونوميكالىق دامۋدىڭ جاڭارتىلعان جوسپارى تۋرالى باياندادى.

ونىڭ سوزىنشە، الداعى 5 جىلدا جان باسىنا شاققانداعى ج ءى و 5 مىڭ دوللارعا تەڭەلۋى ءتيىس. بۇعان دەيىنگى جوسپارعا ساي، 2030-جىلعا قاراي ەلدىڭ ج ءى و كولەمى 160 ميلليارد دوللارعا جەتىپ، ونىڭ جان باسىنا شاققانداعى ۇلەسى 4 مىڭ دوللار بولۋى قاجەت ەدى.

«پرەزيدەنت 2030-جىلعا قاراي ج ءى و كولەمىن 200 ميلليارد دوللارعا، ال ونىڭ جان باسىنا شاققانداعى ۇلەسىن 5 مىڭ دوللاردان اسىرىپ ءتۇسىرۋ مىندەتىن ەش قيىندىقسىز ورىنداۋعا بولاتىنىن اتاپ ءوتتى. بۇل ەل ەكونوميكاسىنىڭ سان تۇرعىسىنان عانا ەمەس، جالپى ساپالى داميتىنىن بىلدىرەدى»، - دەدى يلحوم نوركۋلوۆ.

ونىڭ ايتۋىنشا، كەلەر جىلى ينفلياتسيانى 7 پايىز دەڭگەيىندە ۇستاپ تۇرۋ مىندەتى قويىلعان. ال 2026-جىلى 5-6 پايىز كولەمىندە تەجەۋ جوسپارلانسا، 2027-جىلدان باستاپ 5 پايىز نەمەسە ودان از مولشەرگە تومەندەتۋ كوزدەلگەن.

ايتا كەتەيىك، ءتۇرلى باعالاۋ بويىنشا بىلتىر وزبەكستاننىڭ جالپى ىشكى ءونىم كولەمى 100 ميلليارد دوللاردان استى.

ەسكە سالايىق، وزبەكستان الداعى 5 جىلدا جالپى ىشكى ءونىمدى 160 ميلليارد دوللارعا جەتكىزۋدى جوسپارلاعان.

قوسا كەتسەك، وزبەكستاندا كولەڭكەلى ەكونوميكانىڭ ج ءى و- دەگى ۇلەسى 45 پايىزعا دەيىن جەتەدى.