ويىنشىق ءوندىرۋشىگە قاتىستى دۇربەلەڭ: ۇلى بريتانيا دۇكەندەرىندە ساتىلىم ماۋسىمعا دەيىن توقتادى
لوندون. KAZINFORM - قىتايلىق Pop Mart ويىنشىق ءوندىرۋشىسى ۇلى بريتانياداعى دۇكەندەرىندە Labubu دەپ اتالاتىن تانىمال جۇمساق ويىنشىقتاردىڭ ساتىلىمىن ۋاقىتشا توقتاتتى، دەپ جازدى Kazinform اگەنتتىگىنىڭ مەنشىكتى ءتىلشىسى.
بۇل شەشىم دۇكەندەگى تۇتىنۋشىلار اراسىنداعى توبەلەس پەن تالاستان كەيىن قابىلدانعان.
Labubu - گونكونگ سۋرەتشىسى كاسينگ لۋنگ جاساعان، قويان-مونسترعا ۇقسايتىن ەرەكشە ءپىشىندى جۇمساق ويىنشىقتار سەرياسى. ولار «سوقىر قوراپ» فورماتىندا ساتىلادى - ياعني، ساتىپ الۋشى ىشىندەگى ناقتى ويىنشىق قانداي بولاتىنىن الدىن الا بىلمەيدى. بۇل ءتاسىل جانە شەكتەۋلى تيراج كوللەكتسيونەرلەر مەن جانكۇيەرلەر اراسىندا سۇرانىستى ارتتىرىپ وتىر.
2022 -جىلى لوندوندا Pop Mart-تىڭ العاشقى ەۋروپالىق دۇكەنى اشىلعالى بەرى ۇلى بريتانيادا Labubu-عا دەگەن قىزىعۋشىلىق كۇرت ارتتى. بۇعان الەۋمەتتىك جەلىلەردەگى جارناما ايتارلىقتاي اسەر ەتتى: ويىنشىقتار رياننا، دۋا ليپا سياقتى تانىمال جۇلدىزدار مەن بلوگەرلەر ارقىلى كەڭىنەن ناسيحاتتالدى.
دۇكەندەردىڭ الدىندا ادامدار تاڭنان نەمەسە ءتىپتى تۇننەن باستاپ جينالاتىن بولعان. كەيبىر جاعدايلاردا بۇل جاعداي باقىلاۋدان شىعىپ، يتەرىس- تالاس پەن جانجالدارعا ۇلاسقان.
مىسالى، وتكەن اپتادا Daily Mail باسىلىمى وسىنداي كەزەكتەردىڭ بىرىندە ساتىپ الۋشىلار اراسىندا جاپپاي توبەلەس بولعانىن جازدى. وقيعا ورنىنان تۇسىرىلگەن ۆيدەولار الەۋمەتتىك جەلىلەردە تارالىپ، بىرنەشە ادامنىڭ ءبىر- بىرىنە قول جۇمساپ، كۇزەتشىلەردىڭ جاعدايدى رەتتەۋگە تىرىسقانىن كورسەتتى.
وسى وقيعالارعا بايلانىستى Pop Mart Instagram پاراقشاسىندا ۇلى بريتانياداعى بارلىق 16 دۇكەنىندە Labubu ساتىلىمىنىڭ ماۋسىم ايىنا دەيىن ۋاقىتشا توقتاتىلعانىن حابارلادى. كومپانيا مۇنى قاۋىپسىزدىك ماسەلەلەرىنىڭ الدىن الۋ شاراسى دەپ ءتۇسىندىردى.
- بۇل جاعداي Labubu مەن مونسترلارعا دەگەن سۇيىسپەنشىلىك پەن قىزىعۋشىلىقتىڭ دەڭگەيىن كورسەتكەنىمەن، ءبىز ءۇشىن باستىسى - بارلىق كليەنتتەر مەن قىزمەتكەرلەر ءۇشىن قاۋىپسىز، ءادىل ءارى جايلى ساۋدا جاساۋ مۇمكىندىگىن قامتاماسىز ەتۋ، - دەلىنگەن رەسمي مالىمدەمەدە.
سونىمەن قاتار Pop Mart ونلاين ساتىلىمنىڭ جالعاسا بەرەتىنىن، ال بولاشاقتا ساتىپ الۋ ۇدەرىسىن ءادىل ءارى ۇيىمداسقان جۇيەسىن ازىرلەپ جاتقانىن مالىمدەدى. كومپانيا ويىنشىقتىڭ كەلەسى پارتياسى تۋرالى اقپاراتتى وزدەرىنىڭ رەسمي ارنالارىنان قاداعالاۋدى سۇرادى.
ايتا كەتەيىك، TikTok جەلىسىندە #Labubu حەشتەگى 1,4 ميلليوننان استام، ال ىnstagram-دا 925 مىڭنان استام جازبا جيناعان.
بۇعان دەيىن حابارلانعانداي، Lego وڭدەلگەن پلاستيكتەن ويىنشىق جاساۋ جوسپارىنان باس تارتتى.
اۆتور
باقىتگۇل اباي قىزى
