«ويان، قازاقتى» تۇسىرگەن رەجيسسەر ەندى بوكسشىلار تۋرالى فيلمدى قولعا الدى

 قازاقستان بوكس فەدەراتسياسىنىڭ پرەزيدەنتى كەڭەس راقىشەۆ جاس رەجيسسەر مۇرات ەسجان جازۋشى بەردىبەك سوقپاقپايەۆتىڭ «جەكپە-جەك» تۋىندىسى بويىنشا بوكسشىلار تۋرالى فيلم تۇسىرەتىنىن ءمالىم ەتتى، دەپ حابارلايدى Bassport.kz. 

دوستار، قازىر قازاقستاننىڭ بارلىق كينوتەاترلارىندا «ءمىرجاقىپ. ويان، قازاق!» دەگەن وتاندىق كينەماتوگراف تاريحىنداعى ەڭ تانىمال فيلمدەردىڭ ءبىرى كورسەتىلىپ جاتىر. كارتينانىڭ رەجيسسەرى مۇرات ەسجان. بۇل كىسىنى حالقىمىزدىڭ سانا-سەزىمىندە ناعىز پاتريوتيزمدى وياتقان ماەسترو دەسەم قاتەلەسپەيمىن. ءبىزدىڭ كەزدەسۋىمىز جەمىستى ءوتتى. مەن مۇراتتى شوقان ءۋاليحانوۆ اتىنداعى مەكتەپكە، وقۋشىلارعا ءدارىس وقۋ ءۇشىن ارنايى شاقىردىم. سونىمەن قاتار، مەكتەپ قابىرعاسىندا «ءمىرجاقىپ. ويان، قازاق!» سەريالىنىڭ جابىق كورسەتىلىمى وتەتىنىن ايتقىم كەلەدى، - دەيدى كەڭەس راقىشەۆ.

ول رەجيسسەرمەن فيلم تۋرالى اڭگىمەلەسكەنىن، وسكەلەڭ ۇرپاق ءۇشىن ۇلكەن مۇرا بولىپ قالارىن تالقىلاعانىن ايتتى. ءبىراق ءىس مۇنىمەن بىتپەيدى.

مۇرات ناعىز رەجيسسەر رەتىندە ءوزىنىڭ جاڭا جوباسىن ۇسىندى. اتاقتى جازۋشى بەردىبەك سوقپاقپايەۆتىڭ «جەكپە-جەك» تۋىندىسى بويىنشا، ول سپورتتىق نەگىزدەگى فيلم تۇسىرمەك. بۇل يدەيا مەنى بىردەن قىزىقتىردى. ويتكەنى، مۇنداي جوبا قازاقستان بوكس فەدەراتسياسىنا وڭ سەپتىگىن تيگىزەدى، جانە ءبىزدىڭ جانكۇيەرلەر مەن كورەرمەندەردىڭ جۇرەگىن جاۋلاپ الادى دەگەن نىق سەنىمدەمىن. سوندىقتان ءوز ءىسىنىڭ ناعىز شەبەرىنە قولداۋ كورسەتەمىن. مۇرات ەسجانعا ساتتىلىك تىلەيمىن. ونىڭ شىعارماشىلىعىندا ءبىزدىڭ جاستاردى دۇرىس باعىتتا تاربيەلەي الاتىن فيلمدەر كوپ بولسىن، - دەيدى قازاقستان بوكس فەدەراتسياسىنىڭ پرەزيدەنتى.