وتشاشۋ بۇيىمدارىن زاڭسىز ساتقاندارعا 40 ميلليون تەڭگە ايىپپۇل سالىندى
ىشكى ىستەر مينيسترلىگى وتكەن جىلدىڭ 25- جەلتوقسانى مەن 2024-جىلدىڭ 3- قاڭتارى ارالىعىندا توتەنشە جاعدايلار مينيسترلىگىنىڭ ازاماتتىق قورعاۋ بولىمشەلەرى قىزمەتكەرلەرىمەن بىرلەسىپ «پيروتەحنيكا» جەدەل الدىن الۋ ءىس-شاراسىن وتكىزدى.
Kazinform بۇل تۋرالى Polisia.kz-كە سىلتەمە جاساپ حابارلايدى.
بۇل نارىقتا سەرتيفيكاتتالماعان پيروتەحنيكالىق بۇيىمداردى ساتۋ فاكتىلەرىن انىقتاۋعا جانە جولىن كەسۋگە، سونداي-اق جەكە جانە زاڭدى تۇلعالارمەن پيروتەحنيكالىق بۇيىمداردىڭ اينالىمى قاعيدالارىنىڭ ساقتالۋىنا باعىتتالعان. ءىس-شارا بارىسىندا ازاماتتىق قورعاۋ بولىنىستەرى قىزمەتكەرلەرىمەن بىرلەسىپ ساۋدا ورىندارىندا 4,5 مىڭنان استام رەيد جۇرگىزىلدى.
پيروتەحنيكالىق بۇيىمداردىڭ اينالىمى قاعيدالارىنىڭ 900 دەن استام بۇزۋشىلىعى انىقتالدى (2022-جىلى 800 دەرەك). بارلىق قۇقىق بۇزۋشى اكىمشىلىك جاۋاپكەرشىلىككە تارتىلدى: ونىڭ ىشىندە 800 دەن استامى ەركىن ساۋدا جاساۋعا زاڭناماسىمەن تىيىم سالىنعان تاۋارلاردى ساتقانى ءۇشىن، پيروتەحنيكانى پايدالانۋ ءتارتىبىن بۇزعانى ءۇشىن – 32، پيروتەحنيكانى ساقتاۋ جانە تاسىمالداعانى ءۇشىن - 4. بۇزاقىلارعا شامامەن 40 ميلليون تەڭگەدەن استام ايىپپۇل سالىندى.
ءىس-شارا بارىسىندا 12 مىڭنان استام سەرتيفيكاتتالماعان پيروتەحنيكالىق بۇيىم تاركىلەندى. پيروتەحنيكالىق بۇيىمداردى پايدالانۋ كەزىندە جاراقات الۋدىڭ پروفيلاكتيكاسىنا ەرەكشە كوڭىل ءبولىندى.
وكىنىشكە قاراي، قابىلدانعان شارالارعا قاراماستان، ەلىمىزدە ازاماتتار وتشاشۋدى پايدالانۋ كەزىندە ساقتىق شارالارىن ساقتاماعاندىقتان كۇيىك الۋدىڭ 23 فاكتىسى تىركەلدى، ونىڭ ىشىندە 14 بالا بار. مىسالى، اقتوبە قالاسىندا وتكەن جىلدىڭ 26- جەلتوقسانىندا كەشكە كوپقاباتتى ءۇيدىڭ اۋلاسىندا 16 جاستاعى جاس ءوسپىرىم پيروتەحنيكانى (جارىلعىش) دۇرىس پايدالانباعاننان كوزىنە زاقىم كەلگەن.
الماتى قالاسىندا 1- قاڭتار تۇنگى ۋاقىتتا اقجار شاعىن اۋدانىندا پيروتەحنيكالىق جارىلعىشتاردى قولدانۋ كەزىندە ساقتىق شارالارىن ساقتاماعاننان 10 جاستاعى بالانىڭ بەتى مەن قولى كۇيىپ قالدى. وسىعان ۇقساس جاعداي وسكەمەن قالاسىندا 1-قاڭتاردا بولدى. 13 جاستاعى جاس ءوسپىرىم وتشاشۋدى تاۋىپ الىپ جاققان، ول ونىڭ قولىندا جارىلعان، سالدارىنان بەتىن جانە ساۋساقتارى جارالانعان.
بۇدان باسقا ەرەسەك ادامدار كۇيىك جاراقاتىن الۋ فاكتىلەرى دە تىركەلدى. ولار الكوگولدىك ماس كۇيىندە قاۋىپسىزدىك شارالارىن ساقتاماي، پيروتەحنيكالىق بۇيىمداردى قولدانعان، سالدارىنان وزدەرى عانا ەمەس جانىندا كەتىپ بارا جاتقان ادامدار دا جاراقات العان.
