وسكەمەندىك ايەل بالانىڭ لوگيكاسىن جەتىلدىرەتىن ۇلتتىق ناقىشتاعى ويىنشىقتار جاساپ ءجۇر
وسكەمەن. KAZINFORM - وسكەمەندىك سۋرەتشى اياجان قۋاتبەك قىزى ءتۇرلى ويىنشىق جاساۋدى قولعا العان. بالانىڭ دامۋىنا اسەر ەتەتىن، موتوريكاسىن، لوگيكاسىن جەتىلدىرەتىن ويىنشىقتاردى ۇلتتىق ناقىشتا ازىرلەيدى. بۇدان بولەك، قازاق ەرتەگىلەرىن ويىن فورماتىندا دا ۇسىنادى.
- سۋرەت ونەرىنە قىزىعۋشىلىعىڭىز قالاي باستالدى؟
- شىنىمدى ايتسام، بالا كەزىمدە سۋرەت سالۋعا ەرەكشە قىزىعۋشىلىعىم بولماعان. ءبىراق مەكتەپكە جاڭادان كەلگەن سۋرەت ءپانىنىڭ ءمۇعالىمى بويىمداعى قابىلەتتى بايقاپ، ماعان سەنىم ارتتى. سول كىسىنىڭ قولداۋى مەن باعىت- باعدارى مەنىڭ ونەرگە دەگەن كوزقاراسىمدى وزگەرتىپ، بۇگىنگى تاڭدا شىعارماشىلىق جولدى تاڭداۋىما سەبەپ بولدى.
- ال ويىنشىق جاساۋ يدەياسى قالاي تۋدى؟
- مەنىڭ ويىمشا، ويىنشىق جاساۋ يدەياسىنىڭ ءتۇپ-تامىرى بالا كەزىمدە قالانعان. اپام مەكتەپتە ءمۇعالىم بولىپ، بالالاردىڭ قىزىعۋشىلىعىن ارتتىرۋ ءۇشىن ءارتۇرلى زاتتاردى ءوز قولىمەن جاساپ جۇرەتىن. سول ەڭبەكتى كورىپ ءوسۋ مەنىڭ شىعارماشىلىققا دەگەن كوزقاراسىمدى قالىپتاستىرىپ، قازىرگى ىسىمە نەگىز بولدى.
- ەڭ ءبىرىنشى جاساعان لوگيكالىق ويىنشىعىڭىز قانداي بولدى؟
- العاشقى لوگيكالىق ويىنشىعىمدى ينتەرنەتتەن تاپقان شابلون نەگىزىندە جاساپ كوردىم. رەسەيلىك سايتتاردان ءتۇرلى كورنەكىلىكتەردى ءجيى زەرتتەيتىنمىن. ءبىر كۇنى تەگىن شابلوندى جۇكتەپ الىپ، سونى وزىمشە جۇزەگە اسىردىم. ديزاينعا بەيىمدىلىگىم بولعاندىقتان، ونى قازاقى ستيلدە جاساۋدى ءجون كوردىم. سول تاجىريبە مەنىڭ وسى باعىتتاعى جۇمىسىما ۇلكەن سەرپىن بەردى.
- قازىر ويىنشىقتاردىڭ قانداي تۇرلەرىن جاسايسىز؟
- ءتۇرلى فورماتتاعى ويىنشىقتاردى دايىندايمىن. ولاردىڭ قاتارىندا قاعاز نەگىزىندە لاميناتتالعان، ليپۋچكامەن جانە قىسقىشتار ارقىلى وينالاتىن ويىنشىقتار، فەتردەن تىگىلگەن بۇيىمدار، ءىرى كولەمدەگى اعاشتان جاسالعان كورنەكىلىكتەر بار. بۇل ونىمدەردىڭ بارلىعى بالالاردىڭ ويلاۋ قابىلەتىن دامىتۋعا باعىتتالعان.
- ونىمدەرىڭىزدى قالاي ساتاسىز؟
- نەگىزىنەن الەۋمەتتىك جەلىلەر ارقىلى ساۋدالايمىن. Instagram پاراقشامدا جۇمىستارىمدى تانىستىرىپ، سول جەردە تاپسىرىستار قابىلدايمىن. كليەنتتەردىڭ سۇرانىسىنا ساي جەكە تاپسىرىستار ازىرلەۋمەن قاتار، دايىن ونىمدەردى دە ۇسىنامىن. بۇل ءتاسىل ماعان اۋديتوريامەن تىكەلەي بايلانىس ورناتىپ، ولاردىڭ قاجەتتىلىگىن ناقتى تۇسىنۋگە مۇمكىندىك بەرەدى. «سارافان راديوسى» ءادىسى دە ءالى بار. ريزا بولعان كليەنتتەر ءبىر-بىرىنەن ەستىپ كەلەدى.
- نارىقتى قالاي زەرتتەيسىز؟ قازىر اتا-انالار كوبىنە قانداي ويىنشىقتاردى ىزدەيدى؟
- نارىقتى الەۋمەتتىك جەلىلەر مەن كليەنتتەرمەن تىكەلەي بايلانىس ارقىلى زەرتتەيمىن. Instagram پاراقشامداعى سۇرانىستاردى، پىكىرلەردى، قانداي ونىمدەرگە قىزىعۋشىلىق كوپ ەكەنىن ۇنەمى تالداپ وتىرامىن. سونىمەن قاتار باسقا شەبەرلەردىڭ جۇمىستارىن دا قاراپ، ترەندتەردى باقىلاۋعا تىرىسامىن. قازىرگى كەزدە اتا-انالار بالانىڭ دامۋىنا اسەر ەتەتىن، موتوريكاسىن، لوگيكاسىن جەتىلدىرەتىن، قاۋىپسىز ءارى ساپالى ويىنشىقتاردى كوبىرەك ىزدەيدى.
- ءسىزدىڭ ونىمدەرىڭىزدى وزگەلەردەن ەرەكشەلەيتىن باستى ايىرماشىلىق قانداي؟
- مەنىڭ ونىمدەرىمدى وزگەلەردەن ەرەكشەلەيتىن باستى ايىرماشىلىق - ولاردىڭ بارلىعىنىڭ قولمەن جاسالۋى جانە ۇلتتىق ستيل ەلەمەنتتەرىنىڭ قولدانىلۋى. ءاربىر ويىنشىق تەك ادەمى عانا ەمەس، بالانىڭ ويلاۋ قابىلەتىن، موتوريكاسىن دامىتۋعا باعىتتالادى. سونىمەن قاتار ءار تاپسىرىسقا جەكە كوزقاراسپەن قاراپ، ساپاعا ەرەكشە ءمان بەرەمىن.
- قازاقى ناقىشقا باسىمدىق بەرەدى ەكەنسىز. سول جايلى ايتا كەتسەڭىز.
- قازاقى ناقىش - مەنىڭ جۇمىستارىمنىڭ ماڭىزدى بولىگى. ءار ونىمدە ۇلتتىق ويۋ- ورنەكتەردى، تۇستەردى قولدانۋ ارقىلى بالالارعا ءوز مادەنيەتىمىزدى تانىتۋدى ماقسات ەتەمىن. بۇل تەك ويىنشىق ەمەس، تاربيەلىك ءمانى بار قۇرال دەپ ەسەپتەيمىن.
- بالالار ويىنشىعى ارقىلى ۇلتتىق قۇندىلىقتاردى ءسىڭىرۋ قانشالىقتى ماڭىزدى دەپ ويلايسىز؟
- بۇل وتە ماڭىزدى. ويتكەنى بالا ويىن ارقىلى ۇيرەنەدى، دۇنيەنى تانيدى. ەگەر ويىنشىقتاردا ۇلتتىق ەلەمەنتتەر بولسا، بالا ونى بايقاماي-اق قابىلداپ، ءوز مادەنيەتىنە جاقىن بولىپ وسەدى. بۇل تاربيەنىڭ ەڭ نازىك ءارى ءتيىمدى تاسىلدەرىنىڭ ءبىرى.
- قازىرگى بالالار شەتەلدىك كونتەنتكە تاۋەلدى دەگەن پىكىر بار. ءسىز بۇعان قالاي قارايسىز؟
- شىنىمەن دە، قازىرگى بالالار شەتەلدىك كونتەنتتى كوپ تۇتىنادى. بۇل اقپاراتتىڭ قولجەتىمدىلىگىنە بايلانىستى قالىپتى جاعداي. ءبىز ءوزىمىزدىڭ ۇلتتىق مازمۇنىن كوبەيتىپ، بالالارعا قىزىقتى ءارى ساپالى ءونىم ۇسىنۋىمىز كەرەك دەپ ويلايمىن. سوندا عانا بالانس ساقتالادى.
- قازاق ەرتەگىلەرىن ويىن فورماتىندا ۇسىنۋ يدەياسى جايلى ايتا كەتسەڭىز؟
- قازاق ەرتەگىلەرىن دارىپتەيتىن ويىندار جاساۋ - بالالارعا ۇلتتىق دۇنيەنى قىزىقتى جەتكىزۋدىڭ ءبىر جولى. قازىرگى بالالارعا جاي تىڭداعاننان گورى، قولمەن ۇستاپ، ويناپ ۇيرەنۋ جاقىنىراق. سوندىقتان ەرتەگىنى ويىنمەن بايلانىستىرۋ ارقىلى ولاردىڭ قىزىعۋشىلىعىن ارتتىرۋعا بولادى.
- ءسىزدىڭ ويىڭىزشا، ۇلتتىق برەندكە اينالاتىن ويىنشىق قانداي بولۋى كەرەك؟
- ۇلتتىق برەندكە اينالاتىن ويىنشىق ەڭ الدىمەن ساپالى، قاۋىپسىز ءارى بالانىڭ دامۋىنا پايدالى بولۋى كەرەك. سونىمەن بىرگە ونىڭ مازمۇنىندا قازاقى ناقىش، ۇلتتىق قۇندىلىقتار كورىنىس تابۋى قاجەت. ەڭ باستىسى، ول زاماناۋي، بالالارعا قىزىقتى، تارتىمدى فورماتتا ۇسىنىلۋى ءتيىس.
- IT مەن جاساندى ينتەللەكتىنى ويىنشىق وندىرىسىنە قالاي ەنگىزۋگە بولادى دەپ ويلايسىز؟
- بۇل ۇلكەن مۇمكىندىك. مىسالى، ينتەراكتيۆتى ويىنشىقتار، دىبىسپەن نەمەسە قوسىمشا ارقىلى جۇمىس ىستەيتىن ونىمدەر جاساۋعا بولادى. بۇل بالالاردىڭ قىزىعۋشىلىعىن ارتتىرىپ، ءبىلىم الۋ پروتسەسىن جەڭىلدەتەدى.
- وتباسىڭىز جايلى ايتا كەتسەڭىز. بالالارىڭىز ءسىزدىڭ جاساعان ويىنشىقتارمەن ويناي ما؟
- وتباسىم - مەنىڭ ەڭ ۇلكەن قولداۋشىلارىم ءارى شابىتىمنىڭ كوزى. جولداسىم جانە بالالارىم بار. بالاپاندارىم مەنىڭ جاساعان ويىنشىقتارىممەن ويناپ، ولاردىڭ العاشقى باعالاۋشىلارىنا اينالادى. سول ارقىلى مەن ولاردىڭ قىزىعۋشىلىعىن بايقاپ، ونىمدەرىمدى جەتىلدىرىپ وتىرامىن. بۇل مەن ءۇشىن تەك جۇمىس ەمەس، وتباسىممەن بايلانىستىراتىن ەرەكشە شىعارماشىلىق پروتسەس.
- كاسىپ باستايمىن دەپ جۇرگەن قىز-كەلىنشەكتەرگە نە ايتار ەدىڭىز؟
- ەڭ الدىمەن وزىڭىزگە سەنىڭىز. باستاپقىدا قيىندىقتار بولۋى مۇمكىن، ءبىراق بۇل قالىپتى جاعداي. ەڭ باستىسى، ارەكەت ەتۋ، ۇيرەنۋ جانە توقتاماۋ. كىشكەنتاي قادامداردىڭ ءوزى ۇلكەن ناتيجەگە الىپ كەلەدى.
ەسكە سالساق، وسىعان دەيىن سيفرلىق تەحنولوگيالار داۋىرىندە بالالاردىڭ كىتاپقا قىزىعۋشىعىن قالاي وياتۋعا بولاتىندىعى تۋرالى جازعانبىز.
