وسكەمەندەگى مەديتسينالىق مەكەمەلەر ەسكى جابدىقتاردى جاڭا رەتىندە ساتىپ الىپ وتىرعان - انتيكور

وسكەمەن. KAZINFORM - وسكەمەن قالاسىنداعى مەديتسينالىق مەكەمەلەردىڭ ەسكى جابدىقتاردى جاڭا رەتىندە ساتىپ الىپ وتىرعانى انىقتالدى.

ش ق و سىبايلاس جەمقورلىققا قارسى كۇرەس قىزمەتى ءوڭىردىڭ دەنساۋلىق ساقتاۋ سالاسىنا تالداۋ جۇرگىزىپ، مەديتسينالىق مەكەمەلەردە كورسەتىلەتىن قىزمەتتەردىڭ ساپاسىنا تەرىس اسەر ەتەتىن سىبايلاس جەمقورلىق تاۋەكەلدەرىن انىقتادى. ماسەلەن، ءبىرقاتار مەديتسينالىق مەكەمە ەسكى جابدىقتاردى جاڭا رەتىندە ساتىپ الىپ وتىرعان.

«مەديتسينالىق تەحنيكاعا قويىلاتىن نورماتيۆتىك تالاپتارعا سايكەس جابدىقتار جاڭا، بۇعان دەيىن پايدالانىلماعان بولۋى ءتيىس. الايدا انا مەن بالا ورتالىعىندا جانە وبلىستىق اۋرۋحانادا اتالعان تالاپتارعا سايكەس كەلمەيتىن جابدىقتار الىنعان. مۇنداي جابدىقتى قابىلداۋ كەيىن ونىڭ دۇرىس جۇمىس ىستەمەۋىنە، ەرتە توزۋىنا جانە تەحنيكالىق ەسكىرۋىنە اكەلۋى مۇمكىن»، - دەيدى وبلىس بويىنشا سىبايلاس جەمقورلىققا قارسى قىزمەتتىڭ باسشىسى دەنيس شاكەنوۆ.

سونداي-اق مەديتسينالىق مەكەمەلەر تاۋار جەتكىزۋشىلەردەن جابدىقتى ۋاقتىلى جەتكىزبەگەنى ءۇشىن تۇراقسىزدىق ايىبىن تولەۋدى تالاپ ەتپەگەن.

«مىسالى، كۇرشىم اۋداندىق اۋرۋحاناسىنا 88,8 ميلليون تەڭگە تۇراتىن مامموگرافيالىق سيفرلىق اپپاراتتى بەكىتىلگەن جەتكىزۋ مەرزىمىنەن 34 كۇن كەشىكتىرىپ جەتكىزگەن، الايدا اۋرۋحانا باسشىلىعىمەن 533 مىڭ تەڭگە تۇراقسىزدىق ايىبى وندىرىلمەگەن. گلۋبوكوە اۋداندىق اۋرۋحاناسىندا دا ۇقساس جاعداي بولدى. قۇنى 14,7 ميلليون تەڭگە بولاتىن وكپەنى جاساندى جەلدەتۋ اپپاراتى ۋاقتىلى جەتكىزىلمەي، 882 مىڭ تەڭگە تۇراقسىزدىق ايىبى وندىرىلمەگەن»، - دەيدى د. شاكەنوۆ.

اۆتور
تالعاتجان مۇحامەتبەك ۇلى