وسكەمەن تۇرعىندارىنىڭ جولعا تۇز سەبۋگە قارسى تالاپ ارىزىن سوت قاناعاتتاندىرمادى
وسكەمەن. KAZINFORM - وسكەمەن قالالىق سوتى «تازا وسكەمەن» كاسىپورنىنىڭ جولعا تۇز سەبۋىنە قاتىستى تالاپ ارىزدى قاناعاتتاندىرمادى.

وسىنداي تالاپ ارىز بەرگەن تۇرعىندار تۇزدىڭ قورشاعان ورتاعا زيانىن تيگىزىپ، جازاتايىم وقيعالاردى كوبەيتەتىنىن العا تارتتى. الايدا سوت بۇعان كەلىسپەدى.
- ارىز بەرۋشىلەر جولعا %23 تەحنيكالىق تۇز جانە %77 سۋدان تۇراتىن ەرىتىندىنىڭ سەبىلەتىنىن، قار ەرىگەن كەزدە رەاگەنتتەر ەرتىسكە قۇيىلىپ، وزەندى لاستايتىنىن جەتكىزدى. سونداي-اق ولار بۇل قوسپا جولداردى تايعاق ەتىپ، كولىكتەردىڭ ءجۇرۋىن قيىنداتاتىنىن مالىمدەدى. ال «تازا وسكەمەن» كاسىپورنىنىڭ وكىلدەرى سوت بارىسىندا قوسپانىڭ قورشاعان ورتاعا جانە حالىقتىڭ دەنساۋلىعىنا زيان كەلتىرگەنى تۋرالى ەشقانداي دالەل جوقتىعىن ايتتى. سوت تاراپتاردىڭ ۋاجدەرىن تىڭداي كەلە، سۋ-تۇز ەرىتىندىسىنە تىيىم سالۋعا نەگىزدەردىڭ جەتكىلىكسىزدىگى تۋرالى قورىتىندىعا كەلدى، - دەلىنگەن اقپاراتتا.
ۇكىم ءالى زاڭدى كۇشىنە ەنگەن جوق. سوندىقتان تاراپتاردىڭ بۇل شەشىمگە اپەللياتسيالىق شاعىم تۇسىرۋگە قاقى بار.
اۆتور
تالعاتجان مۇحامەتبەك ۇلى