وسكەمەن نەگە 10 كۇن بويى تۇسىنىكسىز ءتۇتىننىڭ قۇرساۋىندا قالدى - مينيستر جاۋابى
استانا. KAZINFORM - ەكولوگيا جانە تابيعي رەسۋرستار ءمينيسترى ەرلان نىسانبايەۆ قاراشا ايىنىڭ سوڭعى 10 كۇنىندە وسكەمەن نەگە تۇسىنىكسىز ءتۇتىننىڭ قۇرساۋىندا قالعانى تۋرالى رەسمي نۇسقانى ايتتى.

- ول جەردە قورشاعان ورتاعا كۇندەلىكتى كولەمدە شىعارىندى تاستالعان. اعاشتىڭ باسى قوزعالمايتىنداي تىمىرسىق اۋا رايىنا بايلانىستى شىعارىندىلار اۋىرلاپ، ۇشىپ كەتپەي جايمەن تۇرا بەرگەن. ارينە شىعارىندى كوپ جينالعاندىقتان قاپ-قارا بولىپ كورىنەدى. 2022-جىلدان بەرى مەموراندۋم بار. قورشاعان ورتانى ءىرى لاستاۋشىلار قولايسىز مەتەورولوگيالىق جاعداي بولعان كەزدە شىعارىندىلاردىڭ كولەمىن 20 پايىز ازايتۋ كەرەك. وسكەمەندەگى ءۇلبى مەتاللۋرگيالىق زاۋىتى مەن «قازتسينك»، سوگرا جىلۋ-ەلەكتر ورتالىعى سياقتى كاسىپورىنداردىڭ ءبارى ول مەموراندۋمعا قول قويعان. ءسىز ايتىپ وتىرعان كەزەڭدە كاسىپورىنداردىڭ ءبارى سول كەلىسىم بويىنشا جۇمىس جۇرگىزدى. ەندى وڭىرلىك ءماسليحات قولايسىز مەتەو جاعداي كەزىندە تەحنولوگياسى 24 ساعات بويى ۇزدىك جۇمىس ىستەۋدى تالاپ ەتپەيتىن وندىرىستەردىڭ توقتات تۇرۋ ماسەلەسىن تالقىلاپ جاتىر. وسىنداي ەرەجەلەر قولداناتىن بولادى، - دەدى مينيستر.
سونداي-اق ول اتالعان تاجىريبە وسكەمەندە ءساتتى ىسكە اسسا، وزگە وڭىرلەرگە دە ەنگىزىلەتىنىن ايتتى.
- بۇكىل رەسپۋبليكاعا تاراتۋ ءۇشىن كاسىپورىنداردىڭ ەرەكشەلىگى ەسكەرۋ كەرەك. مىسالى جەزقازعاندا بولمايدى. ويتكەنى 24 ساعات بويى ۇزدىكسىز جۇمىس ىستەپ تۇراتىن مىس ءوندىرىپ، بالقىتاتىن كاسىپورىندار بار. ارينە، مۇنداي تاجىريبەنى تاراتۋ كەرەك. ءبىراق اۋەلى وسكەمەندە قالاي بولاتىنىن كورەيىك، - دەدى ەرلان نىسانبايەۆ.
بۇعان دەيىن «قازتسينكتىڭ» وسكەمەندەگى كاسىپورىندارىن پروكۋراتۋرا تەكسەرىپ جاتقانىن جازعان ەدىك.