ورتالىق ازيا باسشىلارى مەن قىتاي ءتوراعاسى ىقپالداستىق ماسەلەلەرىن تالقىعا سالادى
استانا. KAZINFORM - بۇگىن ەلوردادا «ورتالىق ازيا - قىتاي» Ⅱ سامميتى وتەدى. وعان وڭىردەگى 5 مەملەكەتتىڭ باسشىلارى مەن قىتاي حالىق رەسپۋبليكاسىنىڭ ءتوراعاسى قاتىسادى.
ايتا كەتەرلىگى، ءبىرىنشى سامميت 2023 -جىلدىڭ 19-مامىردا قىتايدىڭ سيان قالاسىندا وتكەن ەدى. مەملەكەت باسشىسى قاسىم- جومارت توقايەۆ ارنايى بارىپ قاتىسقان سول سامميتتە قىتاي حالىق رەسپۋبليكاسىنىڭ ءتوراعاسى شي جينپيڭ، قىرعىزستان پرەزيدەنتى سادىر جاپاروۆ، تاجىكستان پرەزيدەنتى ەمومالي راحمون، تۇرىكمەنستان پرەزيدەنتى سەردار بەردىمۇحامەدوۆ، وزبەكستان پرەزيدەنتى شاۆكات ميرزيەيەۆ ءسوز سويلەپ، ءوڭىر مەن قىتاي اراسىنداعى ىقپالداستىقتىڭ وزەكتى ماسەلەلەرىن تالقىعا سالعان بولاتىن. سامميت قورىتىندىسىندا مەملەكەتتەر باسشىلارى شيان دەكلاراتسياسىنا قول قويىپ، ءبىرقاتار باستامانى قابىلداعان- دى.
العاشقى سامميتتە قازاقستان پرەزيدەنتى ايماقتاعى ەل باسشىلارىنىڭ بىرلەسكەن كۇش- جىگەرىن تالاپ ەتەتىن ىنتىماقتاستىقتىڭ مىناداي باعىتتارىن ايقىنداعانى ەستە:
- تاۋار اينالىمىنىڭ كولەمىن ارتتىرۋ؛
- ورتالىق ازيا مەملەكەتتەرى قازاق- قىتاي شەكاراسىنداعى «قورعاس» حالىقارالىق ساۋدا ورتالىعىنىڭ الەۋەتىن بىرگە پايدالانۋ؛
- ەلەكتروندى كوممەرتسيا سالاسىندا ءوزارا الىس- بەرىستى ارتتىرۋ؛
- ورتالىق ازيا ەلدەرى ونىمدەرىن قىتاي نارىعىنا بىرلەسە شىعارۋ ءۇشىن سول ەلدىڭ ءىرى ەلەكتروندى ساۋدا الاڭدارىن كەڭىنەن پايدالانۋ؛
- قازاقستاندا اشىلعان جاڭا كەدەن قويمالارىندا سەرىكتەستەردىڭ تاۋارىن ساقتاۋ؛
- بۇل جۇمىستى «c5+china» ءبىرىڭعاي ەلەكتروندى ساۋدا پلاتفورماسىن ەنگىزۋ ارقىلى ۇيلەستىرۋ؛
- كولىك- لوگيستيكا ينفراقۇرىلىمىن دامىتۋ؛
- ونەركاسىپ سالاسىنداعى ىنتىماقتاستىقتى نىعايتۋ. ول ءۇشىن ورتالىق ازيا مەن قىتايدىڭ ونەركاسىپ سالاسىنداعى ىنتىماقتاستىعىن دامىتۋ جوسپارىن ازىرلەۋ؛
- ەنەرگەتيكا سالاسىندا، ونىڭ ىشىندە مۇناي-گاز سەكتورىنداعى قارىم-قاتىناستى دامىتۋ؛
- اۋىل شارۋاشىلىعى سالاسىنداعى ىقپالداستىقتى دامىتۋ. ول ءۇشىن ورتالىق ازيا مەملەكەتتەرىنىڭ اگرارلىق الەۋەتىن ءتيىمدى پايدالانىپ، «قورعاس» حالىقارالىق ساۋدا ورتالىعىندا بىرلەسكەن ازىق- تۇلىك حابىن قۇرۋ.
- ترانسشەكارالىق سۋ رەسۋرستارىن ءتيىمدى پايدالانۋ. سول ءۇشىن قىتايمەن بىرگە سۋ شارۋاشىلىعى سالاسىنا جاڭا تەحنولوگيا ەنگىزۋ جوسپارىن ازىرلەۋ؛
- مادەنيەت جانە ءبىلىم ىنتىماقتاستىعىن، سونداي-اق تۋريزمدى دامىتۋ. ول ءۇشىن «جىبەك جولى» تۋريستىك وپەراتورلارىنىڭ ءتىزىمىن جاساپ، توپتىق تۋرلار ءۇشىن ۆيزاسىز رەجيم ەنگىزىپ، ءبىرىڭعاي تۋريستىك كلاستەر قۇرۋ؛
- ايماقتىڭ قاۋىپسىزدىگىن جانە تۇراقتىلىعىن قامتاماسىز ەتۋ.
