ورازا-2024: ۋاقىت بەلدەۋىنىڭ وزگەرۋىنە بايلانىستى جاڭارتىلعان كەستە جاريالاندى
استانا. KAZINFORM - قاسيەتتى ايلاردىڭ ءبىرى ءارى بىرەگەيى - رامازان ايى. بيىل ونىڭ ۇزاقتىعى - 30 كۇن.
رامازان ايىنىڭ ەرەكشەلىگى سول - مۇمىندەر بۇل كەزدە ءبىر اي بويى ورازا ۇستايدى. رامازان - مەيىرىمدىلىكتىڭ، قايىرىمدىلىقتىڭ، سابىرلىقتىڭ، كەشىرىمدىلىكتىڭ، تاقۋالىقتىڭ جانە ءناپسىنى تاربيەلەۋ، ءوز-وزىڭە ەسەپ بەرۋ ايى.
وسىمەن قاتار، رامازان قۇران ايى، تاقۋالىق پەن تاربيە ايى رەتىندە بايىپتالادى. رامازان - ايلاردىڭ سۇلتانى، كۇنالاردىڭ كەشىرىلەتىن، مىڭ ايدان دا قايىرلى قادىر ءتۇنى بار شوقتىعى بيىك اي.
مۇسىلمان كۇنتىزبەسى اي كۇنتىزبەسىنە نەگىزدەلگەن، سوندىقتان جىل سايىن رامازان ايىنىڭ باستالۋ جانە اياقتالۋ كۇندەرى وزگەرەدى. ورتاق ءپاتۋاعا سايكەس، قاسيەتتى رامازان ايى 11- ناۋرىزدا باستالادى. ال ءساۋىر ايىنىڭ 5 نەن 6 نا قاراعان ءتۇن - قاسيەتتى قادىر ءتۇنى. 10- ءساۋىر - ورازا ايت مەرەكەسى.
