ورال قالاسىندا شاعان جانە دەركول وزەندەرى قاۋىپتى دەڭگەيدەن اسىپ كەتتى
ورال. KAZINFORM - ورال قالاسىندا شاعان جانە دەركول وزەندەرى قاۋىپتى دەڭگەيدەن اسىپ كەتتى. مامانداردىڭ باعالاۋىنشا، دەركول وزەنىنىڭ گيدروبەكەتىندە سۋ دەڭگەيى 708 (قاۋىپتى دەڭگەيى - 600-650 س م)، شاعاندا 1 264 سانتيمەترگە، سونداي-اق جايىقتا 583 سانتيمەترگە جەتتى.
شاعان جانە دەركول وزەنى ءبىر ارنادى تولىق توعىستى. جايىق وزەنىنىڭ كوتەرىلۋى جانە اتالمىش ەكى وزەننىڭ توعىسۋى سۋدىڭ اعىسپەن كەتپەي، سىرتقا شىعۋىنا الىپ كەلدى.
سونىڭ سالدارىنان وزەن سۋلارى ارناعا سىيماي، ورال قالاسىنداعى سامال شاعىن اۋدانىنا جايىلا باستادى.
قازىرگى ۋاقىتتا سامال شاعىن اۋدانىنىڭ تۇرعىندارىن قاۋىپسىز جەرلەرگە، ەۆاكۋاتسيالىق پۋنكتتەرگە كوشىرۋ جۇرگىزىلۋدە. توتەنشە جاعدايلار مەن كوممۋنالدىق قىزمەت ماماندارى جۇمىس ىستەپ جاتىر.
ب ق و اكىمى ناريمان تورەعاليەۆ سامال شاعىن اۋدانىنا بارىپ، جاعدايدى ءجىتى باقىلاۋدا ۇستاپ وتىر. ءتيىستى جۇمىستار جۇرگىزىلۋدە.
ب ق و ت ج دەپارتامەنتىنىڭ باسپا ءسوز قىزمەتىنەن ءمالىم ەتكەنىندەي، قۇتقارۋشىلار دەركول كەنتى قازاق-تۇرىك ليتسەيى اۋدانى جانە «سامال 3» شاعىناۋدانىندا اۋلالاردى قاراپ شىقتى. تۇرعىنداردىڭ جارتىسىنان كوبى تۋىستارىنا الدىن الا كەتكەن. قالعاندارى ەۆاكۋاتسيادان باس تارتتى.
«جارىق بار، تۇيىقتالۋدان قامتاماسىز ەتىلدى. ەۆاكۋاتسيالاۋعا ب ق و ت ج د جەكە قۇرامى، اپاتتار مەديتسيناسى ورتالىعى، №28237-اسكەري ءبولىمى، ۇلتتىق ۇلاننىڭ №5517-اسكەري ءبولىمى، اۋماقتىق قورعانىس ارنايى تەحنيكالارمەن قاتىسۋدا. وبلىس جانە قالا باسشىلارى، ت ج د باستىعى وقيعا ورنىندا. توتەنشە جاعدايلار، پوليتسيا دەپارتامەنتتەرىمەن كەزەكشىلىك ۇيىمداستىرىلعان. تۇرعىنداردان دۇربەلەڭگە تۇسپەۋدى، توتەنشە جاعدايلار دەپارتامەنتى مەن جەرگىلىكتى اتقارۋشى ورگانداردىڭ ۇسىنىستارىنا سايكەس ارەكەت ەتۋدى جانە قاجەت بولعان جاعدايدا قاۋىپسىز جەرلەرگە كوشۋدى سۇرايمىز. كومەك قاجەت جاعدايدا 112 تەلەفونىنا حابارلاسۋعا بولادى»، - دەدى دەپارتامەنتتىڭ باسپا ءسوز قىزمەتى.
سونىمەن قاتار سۋ باسۋ قاۋپى تونگەن تەرەكتى اۋدانى ۇزىنكول اۋىلىنان 705 ادام كوشىرىلسە، سونىڭ 230 ى - بالالار. ولاردىڭ 685 ى (223 ى - بالالار) تۋىستارىنا كەتسە، قالعاندارى تەرەكتى اۋدانى پودستەپنىي اۋىلىنداعى جانە ورال قالاسىنداعى مەكتەپتەرگە ورنالاستىرىلدى.
ەسكە سالا كەتەيىك، بۇدان بۇرىن باتىس قازاقستاندا سۋعا كەتكەن ۇيلەر سانى 500 دەن اسقانىن جازعان بولاتىنبىز.
اۆتور
عايساعالي سەيتاق
